Istꞌinhanil chiyaqꞌ Komam Dios tet Israel
41
Chiyal Komam Dios hakaꞌ tiꞌ:«Hex ay hex istiꞌla haꞌ mar, abꞌewe tzet chiwalan,
cheyaniko yip heyanma hex konhobꞌlaj; hitzanhwetij,
kat kotzoteli, hun xin chijute konabꞌal, kat jilni tzet chꞌeliko huneꞌ tiꞌ.
2 ¿Mak inilo iswayanh yaꞌ winaj tohol isnabꞌal, ay bꞌey yetkꞌulal bꞌay chiꞌahilo tzꞌayik,
yawtelax yaꞌ yu yok tzujno yaꞌ yinta mak awten yaꞌ?
¿Mak aniko nimeta konhobꞌ yul isqꞌabꞌ yaꞌ? Yebꞌ xin,
¿Mak aniko yaꞌ yahawilo yinh ebꞌnaj rey?
¿Mak aniko anma tet yespada yebꞌ tet islitꞌ yaꞌ, kaw xin kokꞌ ayiko anma tuꞌ hakaꞌ pojoj,
yijnito hakaꞌ yijlaxto xaj teꞌ tajin teꞌ yu jaqꞌeqꞌ?a
3 Ok tzujno yaꞌ yinta ebꞌnaj yinh aqꞌankꞌulal,
to yaꞌ yul huneꞌ bꞌeh bꞌay maxhto chayo yoj yaꞌ huneloj.
4 ¿Mak aqꞌni watxꞌeꞌ hunteqꞌan tiꞌ?
¿Mak ekꞌ yinh isnabꞌal iswatxꞌen sunil tiꞌ yettax yichebꞌanil?
Hanin Jahawil intiꞌan, haninan bꞌabꞌel,
haninpaxojan chiwaqꞌ watxꞌeꞌan tzetaj ye tuꞌ yinh islahobꞌal.
5 Haꞌ ej konhobꞌ ayayo istiꞌla haꞌ mar ilni tzetaj inwatxꞌehan, isxiwkanh,
isxiwpaxokanh anma ay bꞌay chita kachnakanapno txꞌo txꞌotxꞌ,
iskutxbꞌaniko isbꞌa, istita.
6 Hunun mak kolwa yinh yet anmahil ayayo iskawilal yebꞌ yinh yuxhtaj, chalni:
“Ako yip hawanma,” xhi.
7 Haꞌ naj polom teꞌ chiyiptze naj naj chakꞌom plata;
haxa naj chipahnayto lawuxh xin, haꞌ chiꞌiptzen naj watxꞌem soldadura.
Haꞌ mak tuꞌ chalni: “Haꞌ huneꞌ soldadura tiꞌ kaw kꞌul maꞌelikoj,” xhi.
Lahwi tuꞌ islinhbꞌankanh naj huneꞌ tioxh tuꞌ yu lawuxh yunhe machi bꞌili.
8 Yajaꞌ wal hach tiꞌ Israel, inchejabꞌan hawehi, hach Jacob,
kach insikꞌilojan, titnaj hach yinh yaꞌ Abraham, yaꞌ wamigohan.
9 Yuto kach witijan bꞌay kachankan apno txꞌo txꞌotxꞌ bꞌay ayach,
bꞌay kaw nahatkanoj kach wawtehan, walnihan tawet:
“Hach tiꞌ inchejabꞌan chawukoj, kach insikꞌilojan, mach xin kach wintanheltojan.
10 Mach chaxhxiwi, yuto ayinikojan takꞌatanh;
mach chipaxpaxo hawip, yuto haninan haDiosal, chinkolwahan tawinh;
chiwaqꞌnihan tzet chiꞌokniko hawu yinh sunilbꞌal ej tiempo,
haꞌ inqꞌabꞌan chiwatxꞌen istoholal, haꞌ chꞌaqꞌni tawet.
11 Haꞌ sunil ebꞌnaj chiꞌaniko ishowal tawinh, chikankano ebꞌnaj yinh txꞌixwilal,
kat issomchakanh isnabꞌal, haꞌ mak chiꞌaniko howal tawinh, chitanhkaniloj,
lahan chꞌelkaniko hakaꞌto mach itzitzo yul sat yibꞌanhqꞌinal tiꞌ.
12 Chasayaꞌ ebꞌnaj aniko howal tawinh tuꞌ, yajaꞌ matxa ebꞌnaj,
haꞌ ebꞌnaj chiyaqꞌ howal tawinh tuꞌ matxa yelapno chiꞌelkaniko ebꞌnaj yebꞌ xin hakaꞌta mach ekꞌ ebꞌnaj sat yibꞌanhqꞌinal tiꞌ.
13 Yuto hanin Yahawilintiꞌan, haꞌ haDiosal,
tzabꞌan inikojan yinh hawatxꞌqꞌabꞌ, chiwalnihan tawet:
‘mach chachxiwi, haninan chinkolwahan tawinh,’ quinchihan.
14 Yuxin mach chexxiwi, hex Israel iskonhobꞌ yaꞌ Jacob.
Lahan hex hakaꞌ noꞌ tzojoy machi yip, yebꞌ xin haywanh hexchꞌan.
Yajaꞌ mach chexxiwi yuto haninan chinkolwahan teyinh, hanin Yahawilintiꞌan,
isDiosal Israel machi istxꞌojal winhan, haninan heKolomal.b
15 Chexwakojan hakaꞌ chꞌen trillo, chꞌen kaw akꞌ,
kaw ay ye; chemaqꞌ poho nimeta witz, kaw kokꞌ chiꞌaykaniko heyu,
haxa ej wonhan, pojoj chꞌelkaniko heyu, hakaꞌ matzꞌik.
16 Chexitnitoj kat yijnito jaqꞌeqꞌ, kat issajlemito yu kajtuxkum,
yajaꞌ wal hex xin cheyaqꞌ tzalaho heyanma winhan hanin Yahawilintiꞌan,
chemaynhen hebꞌa winhan, hanin machi intxꞌojalan, isDiosal Israel.
17 Haꞌ makta chꞌekꞌyaꞌ, yebꞌ ayko yinh manhtzetal,
chꞌekꞌ sayson yinh ha haꞌ, yajaꞌ mach chiꞌilcha haꞌ yu, kaw tajin yul istiꞌ yu tajintiꞌal.
Hanin heYahawilintiꞌan, chiwabꞌehan isyaꞌtajil chiyaqꞌle anma tuꞌ,
hanin isDiosal Israel intiꞌan, mach chinbꞌejkanojan anma tuꞌ.
18 Chiwaqꞌ elotijan haꞌ nime haꞌ iswiꞌla witz, chiwaqꞌni aholojan isnuqꞌ ha haꞌ sat ejla akꞌal,
chiwaqꞌni aholojan ha haꞌ, kat ispanhi haꞌ sat ejla txꞌotxꞌ desierto,
chiwaqꞌni aholojan isnuqꞌ ha haꞌ sat txꞌotxꞌ tajin txꞌotxꞌ.
19 Chiwaqꞌ chꞌibꞌojan teꞌ cedro, teꞌ acacia,
teꞌ arrayán yebꞌ teꞌ olivo sat txꞌotxꞌ desierto,
haxa bꞌey txꞌo txꞌotxꞌ tajin sat, chiwaqꞌ chꞌibꞌojan teꞌ tzꞌisis, teꞌ tah,
yebꞌ teꞌ qꞌubꞌtah hun chu ischꞌibꞌkanh teꞌ.
20 Chichꞌibꞌkanh ej teꞌ yu heyilni kat heyohtanheniloj kat heyalnikꞌoj,
yunhe istxumchalo yu sunil anma tato haꞌ inqꞌabꞌan,
hanin heYahawilintiꞌan watxꞌenhe sunil tiꞌ,
ta hanin machi istxꞌojal winhan isDiosal Israel watxꞌenhe,» xhi Komam.
Chal Komam Dios ta machi yelapno hunteqꞌan tioxh chaliko anma isdiosaloj
21 Chal Komam Dios, Jahawil, isReyal yaꞌ Jacob hakaꞌ tiꞌ:
«Hex tioxh, hex tiꞌ, kolwe hebꞌa tinanh, yeweloj ta kaw yeli ay heyip.
22 Yewelo heyip, hulanhwe heyalaꞌ jetanh tzet chitohuli,
kat heyalni tzet watxꞌi yettax yichebꞌanil, chijanayto yul janmahanh yinh tzet cheyala,
cheyaqꞌnipaxo johtanhelojanh tzet chiyu yet tzujanilxa.
¡Aqꞌwe johtanhelojanh tzet chito yu yet bꞌaqꞌinh!
23 Halwe jetanh tzetaj chiyu yet tzujanilxa,
yu johtanhenilojanh tato dios hex,
maka watxꞌewe hunu tzet ye tuꞌ kꞌul maka txꞌoj jilaꞌanh,
yu jalnikꞌojanh kat iskꞌaypaxokanh kokꞌulanh jilnihanh.
24 Wal xin, hex tiꞌ kaw machi heyelapnoj, matzet kꞌul tzet hewatxꞌeni.
Haꞌ mak kexsayniko isdiosaloj kaw yahbꞌetaj.
25 Haꞌ yinh yetkꞌulal norte chiwikanhan huneꞌ naj,
kat yul naj kat yaqꞌni bꞌinaho naj inbꞌihan yinh yetkꞌulal bꞌay chiꞌahilo tzꞌayik.
Chisxanhobꞌtanhe naj ebꞌnaj yahaw konhobꞌ hakaꞌ isxanhobꞌtanhelax tzꞌotzꞌew,
maka hakaꞌ chu issomobꞌtanhen naj tzꞌajom xi txꞌotxꞌ qꞌantxꞌotxꞌ yu yoj.
26 ¿Mak halnikano huneꞌ tiꞌ yettax yichebꞌanil, yunhe johtanheniloj? maka
¿mak aqꞌni johtanhelo payat tuꞌ, yunhe jalnihanh tato yeli haꞌ ton istoholal?
Yinh kaw yeli machi hunujex tiꞌ heyala; hoꞌ machi hunujex tiꞌ hekuykano anma yinh tzet chal yelapnoj;
yinh kaw yeli machi hunu mak abꞌeni ta ay tzotiꞌ elti yul hetiꞌ.
27 Hanintiꞌan bꞌabꞌel waqꞌan hunteqꞌan tiꞌ yohtanhelo anma ay bꞌey Sión,
chinchejnitojan huneꞌ inchejabꞌan yalno tzotiꞌ istzalabꞌalo iskꞌul anma ay bꞌey Jerusalén.
28 Wok tuknojan, yajaꞌ machi hunu mak apni, inqꞌambꞌenan yinh hunteqꞌan tiꞌ,
yajaꞌ machi hunu mak tiꞌ tzꞌajbꞌan inkꞌulan,
inqꞌambꞌenan xin, yajaꞌ machi hunu mak pajtzen intzotiꞌan.
29 Wal xin haꞌ sunil hunteqꞌan chihal-lax diosal tuꞌ matzet yelapnoj.
¡Haꞌ tzet chiswatxꞌe matzet chaliloj, yuxin lahan hakaꞌ jaqꞌeqꞌ,
nabꞌanhe hunteqꞌan chꞌen tioxh watxꞌebꞌil!» xhi Komam.