Ischejabꞌ Komam Jahawil
42
Chiyal Komam Jahawil hakaꞌ tiꞌ:«Ay huneꞌ inchejabꞌtiꞌan, haninan chiwaqꞌan yip,
sikꞌbꞌililo wuhan, kaw chintzalahan yinh; xawakojan Wespírituhan yinh,
haꞌ chꞌaqꞌni istoholal tet ej nime konhobꞌ.
2 Mach chiꞌawi, machi el yaw yinh kaw ip yulaj bꞌeh.
3 Mach chisqꞌahto teꞌ ah pohnaxakanh sat, mach chisbꞌuttanho qꞌaꞌ yinh ismechahil cantil tonhe chimutzꞌmun qꞌaꞌ yinh.
Yu isyelal chala, chiyaqꞌkano istoholal tet anma.a
4 Mach chisiki, mach chipaxpaxo yip masanto chiyaqꞌkano aqꞌankꞌulal sat txꞌo txꞌotxꞌ tiꞌ.
Haꞌ anma ay yulajla konhobꞌ ay istiꞌla haꞌ mar, echmabꞌil kuybꞌanile chaqꞌaꞌ naj yu,» xhi Komam.
5 Haꞌ Komam Jahawil, koDiosal, Komam lehnito satkanh yet iswatxꞌeni,
Komam watxꞌenhe txꞌo txꞌotxꞌ, yebꞌ chꞌaqꞌni sat tzꞌunubꞌ,
Komam chiꞌaqꞌni iskawil anma ayayo sat txꞌotxꞌ,
Komam chꞌaqꞌni jaqꞌeqꞌ tet makta chꞌekꞌ sat txꞌotxꞌ.
Haꞌ Komam chalni hakaꞌ tiꞌ tet ischejabꞌ tuꞌ:
6 «Hanin Yahawilintiꞌan, kach wawtehan yu hawatxꞌen istoholal,
tzabꞌil haqꞌabꞌ wuhan chachinkꞌubꞌanan.
Hach chachwaqꞌbꞌalnhehan yet chintꞌinhbꞌankanojan intzotiꞌan yebꞌ inkonhobꞌan.
Chach wanikojan issajilo qꞌinal xol ej nimeta konhobꞌ,b
7 yu hawaqꞌni hajlo sat makta mach chu yilni, yu habꞌejtzonilti ebꞌnaj ayikto yul preso,
yebꞌ yu hawinilti makta ayko preso yulaj nha xol qꞌejholo.
8 ¡Hanintiꞌan, Yahawil hinan, hak tuꞌ inbꞌihan!
Mach chiwaqꞌan iskꞌulchꞌanil isqꞌaqꞌal inmayan tet hunuxa maka,
yebꞌ tet tioxh, yu yinayo isbꞌa anma tet inselelojan.
9 Haꞌ tzet bꞌabꞌel walan, xayijkano isbꞌa,
kat xin walnihan hunteqꞌanxa tzet ye tuꞌ akꞌto,
haꞌ chiwaqꞌkanojan ohtanhelaxoj yalanhto maxhto chiyij isbꞌa,» xhi Komam.
Chibꞌitnhelax Komam Jahawil yu kolbꞌanile kaw ay ismay chaqꞌa
10 Bꞌitnhewe hunu akꞌ bꞌit tet Komam Jahawil, mak hex nahat ay hex,
halwe kꞌul-la tzotiꞌ yinh Komam, yebꞌ hex chexekꞌ yibꞌanh haꞌ mar,
haꞌ sunil tzet ay xol haꞌ mar tuꞌ alaxojabꞌiko ismay Komam yu,
hakpax tuꞌ sunil anma ay yulajla konhobꞌ ayayo istiꞌla haꞌ mar tuꞌ bꞌitnhelax Komam yu.
11 Elojabꞌ heyaw hex ay hex sat txꞌotxꞌ desierto yebꞌ konhobꞌ ayayo sat txꞌotxꞌ yu tzalahilal,
yebꞌ hunteqꞌan aldea bꞌay ay yuninal naj Cedar.
Bꞌitnanhwe hex ay hex yul konhobꞌ Sela;
elojabꞌ heyaw iswiꞌla witz yu tzalahilal.
12 Aweko ismay Komam Jahawil, haꞌ konhobꞌ ay istiꞌla haꞌ mar yalabꞌ kꞌul-la tzotiꞌ yinh Komam.
13 Chꞌelti Komam Jahawil hakaꞌ hunu naj winaj kaw tzet hun istel,
kaw ay yip, kat istit ishowal hakaꞌ hunu naj winaj yet howal,
kat yahwi yinh kaw ip.
Chiꞌawi yinh kaw ip chalni ta yichixako howal,
kat isqꞌoji yinh ebꞌnaj chichiwako iskꞌul yinh.
14 Chalni Komam hakaꞌ tiꞌ: «Payxatax matzet walan,
machi hunu tzotiꞌ tiꞌ elti yul intiꞌan, tonhe tukan hinan,
yajaꞌ wal tinanh xin yahxa wawan yinh kaw ip hakaꞌ yel yaw ix ix lanhan iswatxꞌi iskꞌul,
hun xin chu wanayojan isyaꞌtajil kat intanhtzenilojan tzetaj ye tuꞌ.
15 Chinmeltzokojan ej witz yebꞌ ej wonhan yinh manhqꞌebꞌtajil,
kat iskankano tzꞌinhnoj.
Chiwaqꞌ tajolojan sunil te teꞌ,
kat waqꞌni tajoyojan ha haꞌ chꞌel yojomal,
chiwaqꞌnipaxo tajoyojan ha haꞌ panhan.
16 Chiwijbꞌakꞌojan ebꞌnaj mach chu yilni yul huneꞌ bꞌeh mach ohtabꞌiloj.
Chiwaqꞌ bꞌelwojan ebꞌnaj yul huneꞌ bꞌeh mach yohtajo ebꞌnaj.
Haꞌ qꞌejholo chimeltzoko yinh sajilqꞌinal sata ebꞌnaj,
haxa bꞌeh hopkixhtanhe chiwaqꞌ akꞌalnhehan sata ebꞌnaj.
Haꞌ hunteqꞌan tiꞌ chinwatxꞌehan yinh ebꞌnaj, mach xin chinbꞌejkanojan ebꞌnaj.
17 Chimeltzo yintaj kat issomchakanh isnabꞌal makta chikawxi iskꞌul yinh tioxh,
chiyalni tet chꞌen tioxh: “Hex tiꞌ hex, kodiosalanh,” xhi anma,» xhi Komam.
Israel maxhtikꞌa chikuychahi
18 Yalnipaxo Komam: «Hex mach cheyabꞌe,
abꞌewej, haxa hex mach cheyila,
kam chehaj isbꞌaqꞌ hesat yu heyilni.
19 ¿Mak hunu mak mutzꞌan sat? haꞌ ton ebꞌnaj inchejabꞌan.
¿Mak kaw majan istxikin? haꞌ ton ebꞌnaj chiꞌinito intzotiꞌan chejbꞌil wuhan.
¿Mak kaw mutzꞌan sat? hakaꞌ ebꞌnaj sikꞌbꞌiliko wuhan.
Kaw mutzꞌan sat hakaꞌ ebꞌnaj ischejabꞌ Komam Jahawil.
20 Kaw txꞌiꞌal tzet chilayilah, yajaꞌ mach chitxumcha yu,
chishaj istxikin yunhe yabꞌeni, yajaꞌ mach chabꞌe,» xhi Komam.
21 Yoche Komam Jahawil isyebꞌalo iskꞌulal iskꞌul,
yuto haꞌ istoholal chiswatxꞌe Komam, yuxin yaqꞌ Komam chejbꞌanile kaw ay yelapno tet iskonhobꞌ.
22 Yajaꞌ wal huneꞌ konhobꞌ tiꞌ chiꞌelqꞌalaxto tzetaj aya yu ebꞌnaj ayko ishowal yinh,
kat isxanhobꞌtanhelaxikꞌoj, chimajchelaxkano yulaj chꞌen nhachꞌen,
kat yokkano ebꞌnaj preso.
Chiꞌaykꞌay ebꞌnaj yul isqꞌabꞌ ebꞌnaj ayko ishowal yinh,
yajaꞌ machi mak chikolnilo ebꞌnaj,
chiꞌelqꞌalaxto tzet ay ebꞌnaj,
yajaꞌ machi mak chihalni ta chꞌaqꞌlax meltzoho tzet chꞌelqꞌalaxilo tet ebꞌnaj.
23 Yajaꞌ ¿mak hunu hex cheyabꞌeto huneꞌ tiꞌ?
¿Mak xin chichahni yabꞌeꞌ yinh tzet chito yuhi?
24 ¿Mak chahni elqꞌalaxto tzet ay yaꞌ Jacob?
Yebꞌ xin ¿mak anheko ebꞌnaj Israel yul isqꞌabꞌ ebꞌnaj ayko ishowal yinh, yilaxto ebꞌnaj preso?
¿Tom maxhtaj Komam Jahawil, Komam bꞌay yako ebꞌnaj ismul?
Mach isje ebꞌnaj bꞌelwo yul isbꞌeh Komam, mach yabꞌepaxo ebꞌnaj chejbꞌanile yal Komam.
25 Yuxin yayo Komam ishowal sikꞌlebꞌil yibꞌanh ebꞌnaj,
yiqꞌnikanh yip howal yinh ebꞌnaj,
yati Komam isyaꞌtajil yibꞌanh ebꞌnaj sunil bꞌayejtuꞌwal,
hakaꞌ xaj qꞌa qꞌaꞌ, yajaꞌ maxhtikꞌa yaqꞌ ebꞌnaj yul iswiꞌ,
waxanhka yako Komam qꞌaꞌ yinh ebꞌnaj, yajaꞌ maxhtikꞌa yabꞌeto ebꞌnaj.