BꞌIT KAW SAQꞌAL YOKI
1. YICHEBꞌANIL KUYBꞌANILE
(1:1)
Ix ixale yebꞌ ebꞌix kutzꞌine ay konhobꞌ Jerusalén
1
Hunteqꞌan bꞌit kaw saqꞌalkano yoki yet yaꞌ Salomón.2. BꞌIT KAW SAQꞌALKANO YOKI
(1:2–8:14)
Ix ixale:
2 Tzꞌoh intiꞌan yu hatiꞌ,
yuto hayet chachtzalako winhan, ekꞌbꞌalto kꞌul sata vino.
3 Haꞌ haperfume chawako tawinh kaw saqꞌalkano isxuqꞌal sam, haxa yet chibꞌina habꞌi,
lahan chiwabꞌehan hakaꞌ xuqꞌal sam perfume yet chikojobꞌniko jinh;
yuxin kaw ochebꞌil hach yu ebꞌix qꞌopo.
4 Iqꞌintojan takꞌatanh. Tonh yinh anhe.
Haꞌ naj rey tiꞌ kinyitojan naj yatut.
Ebꞌix ah Jerusalén chibꞌitni:
Kaw chijaqꞌ tzalaho kokꞌulanh takꞌatanh,
haꞌ iskꞌulchꞌanil hakꞌul kaw saqꞌal sata teꞌ vino.
Yuxin kaw ochebꞌil hach.
Ix ixale:
5 Hex ix ah Jerusalén, hanintiꞌan qꞌejla ix hinan, yajaꞌ xin kaw ochebꞌil hinan.
Lahan jilni hinan hakaꞌ jilni qꞌap mantiado bꞌey Cedar,
yebꞌ xin hakaꞌ jilni qꞌap qꞌap litxꞌankanh yinh isventanah yatut yaꞌ rey Salomón.a
6 Mach chexok tꞌanhno winhan, wal xin haꞌ yoj tzꞌayik kinaqꞌni qꞌejbꞌolojan.
Haꞌ ebꞌnaj yunin inmiꞌan tit ishowal ebꞌnaj winhan;
kinyanikojan ebꞌnaj tanhe uva, wal teꞌ uva wetan mach kinokan intanheꞌan teꞌ.
7 Hach bꞌay kaw aykaniko wanmatiꞌan, halilo wetan bꞌaytuꞌwal chatanhe hameꞌ,
yebꞌ bꞌaytuꞌwal chaxhxew yebꞌ noꞌ yinh chuman tzꞌayik.
¿Tzet yinh xin chinkꞌayikꞌojan hakaꞌ chu ix ix chikꞌayikꞌoj?
Mach kꞌulo ta chinekꞌkolohan xol ebꞌnaj hawamigo yet chistanhen ismeꞌ.
Anma chibꞌitni:
8 Hach kawla ix hach xol ebꞌix hawet ixal, tato mach hawohtajoj,
okanh tzujno yinta yojlen noꞌ meꞌ,
kat hato hatanheno hachiw yinhla ispat ebꞌnaj tanhem meꞌ.
Naj ichamile:
9 Hach bꞌay chintzalahan, lahan kach wilnihan hakaꞌ noꞌ ix cheh chinhikꞌnikꞌo iscarruaje naj faraón.
10 Kaw kꞌulchꞌan jilni hakelem xol hawelawil,
kaw saqꞌal jilni hanuqꞌ xol hawuwe.
11 Chinwatxꞌehan hawome chꞌen oro, kat yok chꞌen plata yelawiloj.
Ix ixale:
12 Hayet qꞌehan wahawilan yul istzꞌonhobꞌal kaw xuqꞌ yekꞌ sam nardob chiwakojan winhan.
13 Haꞌ naj bꞌay kaw ayko wanma tuꞌan
lahan naj hakaꞌ hunu nichꞌan txꞌuy mirra yul insatan,
chiꞌehayo yibꞌanh istxam inkꞌulan.
14 Lahan naj hakaꞌ hunu yachan isxumakil teꞌ alheña chichꞌibꞌ xolaj teꞌ uva bꞌey En-gadi,
hak tuꞌ naj bꞌay ayko wanma tuꞌan.
Naj ichamile:
15 Hach bꞌay ayko wanmatiꞌan kaw kꞌulchꞌan hachkanoj,
kaw kawla ixach.
Haꞌ isbꞌaqꞌ hasat kaw lahan jilni hakaꞌ noꞌ kuwis.
Ix ixale:
16 Hach bꞌay ayko wanmatiꞌan kaw kawla winaj hach,
kaw saqꞌal hachkanoj.
Naj ichamile:
Haꞌ teꞌ telaj kaw yax haꞌ kotxꞌat:
17 Haꞌ ispatzabꞌil jatut, cedro teꞌ,
wal yibꞌanh jatut tuꞌ xin, tzꞌisis teꞌ.