ECLESIASTÉS
1. YINH TZET YOHTANHELO YAꞌ CHIHALNILTO TZOTIꞌ
(1:1–2:26)
Sunil tzet ye tuꞌ matzet chal yelapnoj
1
Haꞌ hunteqꞌan tzotiꞌ tiꞌ,haꞌ ton tzotiꞌ yal yaꞌ chihalnilto tzotiꞌ,
yaꞌ iskꞌahol yaꞌ David,
ekꞌlena reyal bꞌey Jerusalén.
2 «Nabꞌnhe, nabꞌnhe,» xhi yaꞌ chihalnilto tzotiꞌ.
Chalnipaxo yaꞌ: «Nabꞌnhe, nabꞌnhe.
Sunil tzet ye tuꞌ matzet chal yelapnoj,» xhi yaꞌ.
3 ¿Tzet chiyiqꞌ naj winaj yinh sunil ismunil
yet kaw chꞌekꞌyaꞌ naj yalanh yoj tzꞌayik?a
4 Chilakamto anma, aypaxiko ispitzkꞌa yaqꞌbꞌil anma,
wal txꞌo txꞌotxꞌ tiꞌ xin huneꞌnhetikꞌa haꞌ txꞌotxꞌ.
5 Chiꞌahilo tzꞌayik, kat istopaxo hunelxa,
lahwi tuꞌ kat yapnipaxo yinh anhe bꞌaytikꞌa chiꞌahilo
yinh sahabꞌ sakꞌayal hunelxa.
6 Haꞌ jaqꞌeqꞌ chito yinh sur, kat yekꞌ ishoynoyo norte,
lahwi tuꞌ kat ismeltzohi
kat yekꞌpaxo bꞌaytikꞌa chꞌekꞌ yet bꞌabꞌelal.
7 Sunil ha haꞌ ay yojomal, chiꞌapni haꞌ xol haꞌ mar,
yajaꞌ wal haꞌ mar tuꞌ mach chinohkanh haꞌ;
haꞌtikꞌa bꞌay chitit haꞌ haꞌ, haꞌ tuꞌ chimeltzopaxo haꞌ,
kat istopaxo haꞌ yul isbꞌeh hunelxa.
8 Sunil tzetaj ye tuꞌ, kaw chitibꞌayo yu naj winaj,
mach isbꞌi hayel chitibꞌaykanayo yu.
Haꞌ isbꞌaqꞌ kosat maxhtikꞌa chinoh iskꞌul ismatzꞌli;
hakpax tuꞌ kotxikin,
maxhtikꞌa chinoh iskꞌul yabꞌen tzettaj ye tuꞌ.
9 Haꞌtikꞌa tzet yu yet payat, haꞌtikꞌa chupaxo tinanh.
Haꞌ tzet iswatxꞌe anma yet payat,
haꞌ chiswatxꞌepaxo tinanh,
yuxin machi hunu tzet ye tuꞌ tiꞌ akꞌto yalanh yoj tzꞌayik yul sat yibꞌanhqꞌinal tiꞌ.
10 ¿Aymi hunu tzet ye tuꞌ tiꞌ bꞌay chihal-laxi: «Huneꞌ tiꞌ kaw akꞌto?» xhimi.
Wal xin haꞌ hunteqꞌan tuꞌ ayxatikꞌa yet payat
yet maxhto chonhpitzkꞌahi.
11 Haꞌ tzet xayuhi xanahulnhelaxtoj,
hakpax tuꞌ tzet chiyuhoj chinahulnhelaxpaxtoj
yu anma chiꞌilno yet tzujanilxa.
Hunteqꞌan tzet xayaqꞌle yaꞌ chihalnilto tzotiꞌ
12 Hanin halomilto tzotiꞌ hintiꞌan, kinokan isreyalo Israel bꞌey Jerusalén. 13 Waqꞌ wanmahan inkuynihan yebꞌ xin hinsaynilojan yu inhelanilan yinh sunil tzetaj chiwatxꞌelax yalanh satkanh sat yibꞌanhqꞌinal tiꞌ; yajaꞌ haꞌ huneꞌ munil kaw yaꞌtaj tiꞌ yaqꞌ Komam Dios tet ebꞌnaj iskꞌahol ebꞌnaj winaj yu yekꞌ yu ebꞌnaj.b 14 Wilan sunil munil chiwatxꞌelax yalanh yoj tzꞌayik sat yibꞌanhqꞌinal tiꞌ; yajaꞌ haꞌ sunil tuꞌ matzet chal yelapnoj, tonhe chiꞌekꞌyaꞌ yanma ebꞌnaj winaj yu.
15 Haꞌ tzet kotxan yehi, matxa chu istoholbꞌanhelaxi;
yebꞌ mach chu isbꞌislax tzet ye tuꞌ matzet.
16 Hanintiꞌan tzotel wanmahan hakaꞌ tiꞌ: «Hanintiꞌan kaw nime anma hinan, kaw xin chꞌibꞌkanokanh inhelanilan sata sunil ebꞌnaj ekꞌlena reyal insatajan bꞌey Jerusalén tiꞌ; tzujchapno helanile wuhan yebꞌ xin kaw txꞌiꞌal tzet ye tuꞌ txumchalo wuhan,» kinchihan. 17 Waqꞌni wanmahan wohtanhenilojan helanile yebꞌ wohtanhenilojan issukal yebꞌ tzetaj maxhtaj haꞌ yehi, intxumnihan tato haꞌ hunteqꞌan tuꞌ isyaꞌtajilnhe yaqꞌ tet wanmahan.
18 Yuto haꞌ mak kaw aykano ishelanil,
chiꞌahpaxokanh isbꞌiskꞌulal;
haꞌ mak chiꞌahpaxokanh isnabꞌal,
chiꞌahpaxokanh isyaꞌtajil yibꞌanh.