ISHUJ MAJAN KUYBꞌANILE: TZOTIꞌ YAL NAJ REY LEMUEL
(31:1-9)
Tzotiꞌ yal naj rey Lemuel
31
Tzotiꞌ yal naj rey Lemuel, naj Lemuel tuꞌ kaw kuylax naj yu ismiꞌ hakaꞌ tiꞌ:2 «Hach wunin, haꞌ Komam Dios kaxhaqꞌni wetan ispajo intxahan;
kaw winhan kaxhtita. ¿Tzet hunuxa tzꞌaj walaꞌan tawet?
3 Mach chaweta habꞌa yinh ebꞌix ix txꞌoj ye iswiꞌ,
yuto yu ebꞌix, yuxin chikꞌayto ebꞌnaj rey.a
4 Lemuel, mach kꞌuloj ta chukꞌ ebꞌnaj rey
yebꞌ ebꞌnaj yahaw konhobꞌ teꞌ vino maka tzan tzet ukꞌehal kaw how.
5 Yuto chisnahulnheto ebꞌnaj ley, kat yetan ebꞌnaj anma mebꞌaꞌ.b
6 Haꞌ teꞌ vino tuꞌ, yebꞌ hunuxa howla ukꞌe,
haꞌ anma ayko yinh isyaꞌtajil
yebꞌ yinh bꞌiskꞌulal chiꞌukꞌni.
7 Ukꞌujabꞌi yu isnahulnhento isyaꞌtajil yebꞌ isbꞌiskꞌulal tuꞌ.
8 Wal xin tzotelanh yinh mak mach chu istzoteli,
kat hakolni mak mach chu iskolni isbꞌa.
9 Awanh yinh kaw ip, kat hawatxꞌen istoholal,
kolilo mak kaw chiꞌoqꞌ yanma yu mebꞌaꞌil yebꞌ yu isyaꞌtajil.
ISLAHOBꞌAL KUYBꞌANILE: TZOTIꞌ KꞌUL CHAL-LAX YINH IX IX KꞌUL ISBꞌEYBꞌAL
(31:10-31)
10 »Haꞌ ix ix kaw kꞌul isbꞌeybꞌal, mach subꞌuta yilcha ix,
kaw ekꞌbꞌal yelapno ix sata istohol chꞌen chꞌen kaw kꞌulchꞌan jilni.
11 Haꞌ yichamil ix kaw chikawxi iskꞌul naj yinh ix.
Aynhetikꞌa ismelyu ix chiqꞌa.
12 Mach istxꞌojal chaqꞌ ix,
wal xin hanhkꞌanhe iskꞌulal chaqꞌ ix
tet yichamil yinh sunilbꞌal ej tiempo.
13 Chisloqꞌ ix noꞌ lana yebꞌ qꞌap lino,
kat ismunla ix yinh sunil iskꞌul yu isqꞌabꞌ.
14 Lahan ix hakaꞌ teꞌ barco ijomikꞌo txonh. Kaw nahat chiyiti ix tzet chislo.
15 Kaw sahabꞌ chiꞌah ix kat yaqꞌni ix tzet chislo nixhte yunin yebꞌ ischejabꞌ.
16 Chil ix hunu txꞌotxꞌ kat isloqꞌni ix,
kat istzꞌunni ix teꞌ uva yu ismelyu chiyiqꞌ yinh ismunil.
17 Kaw chiswatxꞌe isbꞌa ix, kat yok ix yinh ismunil.
18 Kaw chil ix ta kꞌul chu isbꞌelwi istxonh ix;
mach chitanh qꞌaꞌ yinh iscantil ix yet aqꞌbꞌalil yu ismunlahi.
19 Chichemli ix, chiswatxꞌen ix qꞌap qꞌap.
20 Chikolwa ix yinh anma mebꞌaꞌ yebꞌ yinh mak chiꞌekꞌyaꞌ manhtzetal.
21 Matzet chal iskꞌul ix tet chew, yuto kaw kꞌul yehiko isqꞌuxil yunin ix.
22 Haꞌtikꞌa ix chiwatxꞌen istxow;
haꞌ qꞌap qꞌap kaw ay istohol chako ix xilo isqꞌap.
23 Kaw ohtabꞌil yichamil ix yu anma yul konhobꞌ.
Ayko yichamil ix tuꞌ xol ebꞌnaj winaj kaw ay yelapnoj yul konhobꞌ.
24 Chischem ix qꞌap pixe, yebꞌ txꞌambꞌal, kat istxonhni ix tet ebꞌnaj txonhom qꞌap.
25 Kaw yinh sunil yanma ix chimunlahi,
yebꞌ xin kaw ay yelapno ix yul sat anma.
Mach chiꞌok yinh iskꞌul ix yinh hekal kabꞌe.
26 Hayet chitzotel ix, kaw ay isnabꞌal ix istzoteli,
kat iskuywapaxo ix yinh sunil yanma.
27 Kaw chil ix yatut, machi hunu tzet tiꞌ chislo ix ta maxhtaj ix chiꞌiqꞌni.
28 Haꞌ yunin ix yebꞌ yichamil chiyal kꞌul-la tzotiꞌ yinh ix,
chalni tet ix hakaꞌ tiꞌ:
29 “¡Kaw txꞌiꞌal ebꞌix ix xawatxꞌen iskꞌulal,
yajaꞌ wal hach tiꞌ,
kaw ekꞌbꞌalach yibꞌanh sunil ebꞌix tuꞌ!” xhi.
30 Haꞌ issaqꞌalil ix ix, chonhyaqꞌ subꞌchahoj,
haxa iskꞌulchꞌanil jilni ix chitanhiloj;
yajaꞌ wal ix ix chixiw tet Komam Dios, istzan ix yal-lax kꞌul-la tzotiꞌ yinh.
31 ¡Halwe kꞌul-la tzotiꞌ yinh ix, yinh sat sunil anma ay yul
konhobꞌ;
hal-laxojabꞌ kꞌul-la tzotiꞌ yinh ix yu iskꞌulchꞌanil chiswatxꞌe!»
xhi ismiꞌ naj Lemuel.