ISWAJ MAJAN KUYBꞌANILE: TZOTIꞌ YAL NAJ AGUR
(30:1-33)
Kuybꞌanile yal naj Agur
30
Tzotiꞌ yal naj Agur iskꞌahol naj Jaqué. Naj Agur tuꞌ yal naj hunteqꞌan kuybꞌanile tet naj Itiel yebꞌ tet naj Ucal hakaꞌ tiꞌ:2 «Hanintiꞌan, kaw machi innabꞌalan xol wet anmahilan,
mach chu intxumnihan hakaꞌ istxumni anma.
3 Maxhto chiwiqꞌan inhelanilan,
kaw maxhtotikꞌa nichꞌano tzet wohtajan yibꞌanhilo Komam Dios,
Komam kaw machi istxꞌojal yinh.
4 ¿Mak hunu tiꞌ chito satkanh kat yaypaxiloj?
¿Mak chu istzabꞌnayo jaqꞌeqꞌ yul isqꞌabꞌ?
¿Mak chu ischulnayo haꞌ mar yu xil isqꞌap?
¿Mak hanhekano ismohonal txꞌo txꞌotxꞌ?
¿Hal wetan ta hawohta isbꞌi yebꞌ isbꞌi iskꞌahol?
5 Haꞌ mak chikawxi iskꞌul yinh Komam Dios,
chistanhe Komam.
Sunil tzet chalte Komam, iskawxobꞌal kokꞌul yehi.
6 Mach chawako istzꞌaj tzet chiyal Komam tawet,
ta mach xin,
chaxhiskachaꞌ, kat hakankano leqꞌtiꞌal yul sat.
7 Mamin, ay kabꞌebꞌ tzet ye tuꞌ tiꞌ chinqꞌanan tawet,
mach chamanhkꞌo wetan yet maxhto chinkaman.
8 Machojabꞌ chinhachayojan yinh leqꞌtiꞌal,
yebꞌ wetlihan yinh hunu wet anmahilan.
Machojabꞌ chawaqꞌ qꞌalomal yebꞌ mebꞌaꞌil wetan;
kꞌuxanojabꞌ hawaqꞌni tzet chinlohan
yebꞌ tzet chiꞌokniko wuhan hunu tzꞌayik.
9 Yuto ta chinokan qꞌalomal, kꞌuxantaxka ay tzotiꞌ txꞌoj chiwalan tawinh,
kat walnipaxojan ta mach kach wohtajojan.a
Mach chawaqꞌpaxo mebꞌaꞌil wetan,
yuto kꞌuxantaxka chinokan eleqꞌ,
kat yel hapixan wuhan.
10 Machojabꞌ txꞌojo hatzotel yinh naj chejabꞌ sata yahawil,
yuto kꞌuxantaxka kaxhistzꞌaktiꞌnhen naj,
kat hawaqꞌlen isyaꞌtajil.
11 Ay mak tiꞌ chistzꞌaktiꞌnhe ismam
yebꞌ xin mach chisqꞌan iskꞌulal yibꞌanh ismiꞌ.
12 Ay mak tiꞌ chalni ta kaw sajxa ye yanma,
yajaꞌ xin aytoko ismul yibꞌanh.
13 Ay mak tiꞌ kaw ay yelapno ye yalni,
kaw xin chiyikanh isbꞌa yibꞌanh yet anmahil.
14 Ay mak tiꞌ lahan yeh hakaꞌ chꞌen espada,
haxa istxꞌabꞌal xin,
lahan hakaꞌ chꞌen cuchillo yunhe istanhtzenilo anma mebꞌaꞌ ay yul konhobꞌ.
15 Ay kakꞌonh yunin noꞌ sanguijuela ukꞌum chikꞌ,
tonhetikꞌa xin chiqꞌanqꞌoniko noꞌ yinh ismiꞌ tuꞌ.
Ay kanhebꞌ tzet ye tuꞌ tiꞌ, maxhtikꞌa chinoh iskꞌul;
16 haꞌ ton kambꞌal, ix ix machi yunin,
txꞌo txꞌotxꞌ mach chiqꞌ iskꞌul txꞌotxꞌ ha haꞌ chiꞌay yibꞌanh,
yebꞌ qꞌa qꞌaꞌ, mach chiqꞌ iskꞌul qꞌaꞌ isnhusnito teꞌ siꞌ.
17 Haꞌ mak chisyah ismam kat istzebꞌi yinh ismiꞌ,
yet ay islohnilti noꞌ hoh isbꞌaqꞌ sat,
kat islohnito noꞌ tꞌiw isnimanil.
18 Ay kanhebꞌ tzet ye tuꞌ,
kaw chikꞌay inkꞌulan yinh
yebꞌ xin mach chitxumcha wuhan.
19 Tzet chiyu yekꞌ noꞌ tꞌiw satkanh,
tzet chiyu ishatxnikꞌo isbꞌa noꞌ labꞌa yinhla iskꞌul chꞌen chꞌen,
tzet chiyu isbꞌelwikꞌo teꞌ barco yibꞌanh haꞌ haꞌ,
yebꞌ tzet chiyu ismonten naj winaj ix ix.
20 Ix ix txꞌoj iswiꞌ, kaw chiwaꞌ ix yinh kaw kꞌul,
lahwi tuꞌ kat issunilo ix istiꞌ,
kat yalni ix ta machi istxꞌojal chiswatxꞌe ix.
21 Ay kanh majan anma tiꞌ mach chitecha yu anma yabꞌen isbꞌeybꞌal,
yebꞌ xin chikꞌay iskꞌul anma ay yul konhobꞌ yinh.
22 Haꞌ ton naj chejabꞌ chiꞌok reyal,
naj machi isnabꞌal yajaꞌ chipalkꞌon tzet chislo yul isqꞌabꞌ.
23 Ix ix yahbꞌil, chiyiqꞌ yichamil,
yebꞌ ix chejabꞌ chiꞌok selelo yahaw.
24 Ay kanh majan no noqꞌ ay sat txꞌo txꞌotxꞌ kaw ekꞌbꞌal isnabꞌal
yibꞌanh ebꞌnaj winaj ay ishelanil.
25 Haꞌ ton noꞌ sanik, kaw hunbꞌulan chu yekꞌ noꞌ,
waxanhka xin machi yip noꞌ,
yajaꞌ xin chistenbꞌa noꞌ tzet chislo yinh waresma.
26 Noꞌ xhik, waxanhka machi yip noꞌ,
yajaꞌ chiswatxꞌe noꞌ yatut yinhla iskꞌul chꞌen nime chꞌen.
27 Noꞌ qꞌul, waxanhka machi yahawil noꞌ chiꞌijbꞌani,
yajaꞌ kaw yinh istxolal chibꞌelwikꞌo noꞌ.
28 Yebꞌ xin noꞌ xim, chikotzabꞌ noꞌ yul koqꞌabꞌ,
yajaꞌ chiswatxꞌe noꞌ yatut yul yatut naj rey.
29 Ay ox majan no noqꞌ tiꞌ kaw chismaynhe isbꞌa yet chiꞌekꞌi,
aypaxo xin huneꞌxa mak yinh iskanh.
30 Noꞌ bꞌalam, haꞌ noꞌ kaw ekꞌbꞌalkano yip xol yet noqꞌal,
machi hunu mak tet bꞌay chixiw noꞌ.
31 Noꞌ icham chiyo kaw chismaynhe isbꞌa noꞌ,
yebꞌpaxo xin noꞌ winaj chiw,
yebꞌ xin naj rey machi hunu mak chiqꞌoji yinh.
32 Ta chawala ta kaw ay hawelapno yinh hasukal
kat hatxumni hawatxꞌen istxꞌojal,
kaw nah habꞌa yinh tzet chiꞌekꞌ yinh hanabꞌal tuꞌ.
33 Hayet chimaqꞌlax noꞌ lech,
chiꞌel noꞌ mantequilla yinh noꞌ.
Ta kaw ip chikosijayti yal kotxam, chitit chikꞌ yul kotxam tuꞌ.
Haꞌ mak chiꞌiniti ishowal hunu mak,
howal chu istanhkanoj,» xhi naj Agur.