29
Haꞌ mak chislutꞌnhe isbꞌa yet chikachlaxi,chitanhnalo lembꞌil, matxa tzet tzꞌaj yutelaxi.
2 Hayet chiꞌok ebꞌnaj tohol isbꞌeybꞌal ijbꞌalomal
kaw chitzala anma,
waltaka ebꞌnaj txꞌoj isnabꞌal chiꞌok jahawiloj kaw chiꞌekꞌyaꞌ anma yu ebꞌnaj.
3 Haꞌ naj kꞌahole chiꞌochen helanile, chitzala iskꞌul ismam naj yinh;
wal naj chiꞌekꞌ yinta ebꞌix ix txꞌoj ye iswiꞌ,
tonhe chiskꞌaytzelo naj ismelyu.
4 Haꞌ naj rey chiwatxꞌen istoholal,
kaw chiyiqꞌ yip iskonhobꞌ naj;
walpaxo naj rey melyunhetikꞌa chiyilo yinh anma chistanhtzelo naj iskonhobꞌ tuꞌ.
5 Haꞌ mak tonhetikꞌa chiyalikꞌo ismay yamigo,
lanhan yanayo latzꞌabꞌ yul isbꞌeh yamigo tuꞌ.
6 Haꞌtikꞌa istxꞌojal chiswatxꞌe anma txꞌoj isnabꞌal,
haꞌ chiꞌok latzꞌabꞌo yul isbꞌeh;
yajaꞌ wal anma tohol isbꞌeybꞌal tzalahilal yebꞌ aqꞌankꞌulalnhetikꞌa yehi.
7 Haꞌ ebꞌnaj tohol isbꞌeybꞌal
chabꞌeto ebꞌnaj yet chiskolni isbꞌa anma mebꞌaꞌ,
wal ebꞌnaj txꞌoj isnabꞌal machi yok ebꞌnaj yinh.
8 Haꞌ anma bꞌuchwawom
chiꞌah wejnahi yu yaniko howal,
walpaxo anma ay isnabꞌal,
chaqꞌ tanhohoyo ishowal anma.
9 Ta ay hunu naj ay isnabꞌal choche iswatxꞌehayo hunu howal
yebꞌ hunu mak mach isnabꞌal,
tonhe chiꞌok ishowal naj yinh iskꞌul kat isbꞌuchlaxpaxo naj,
matzet xin tzꞌaj iswatxꞌeyo naj.
10 Ebꞌnaj potxꞌom anma kaw chisyah ebꞌnaj anma tohol isbꞌeybꞌal;
yebꞌ xin choche ebꞌnaj yaqꞌaꞌ kamoj.
11 Haꞌ anma machi isnabꞌal hayet chitit ishowal,
chiswatxꞌe sunil tzet chal iskꞌul yu ishowal tuꞌ,
wal mak ay isnabꞌal chiyaqꞌ ekꞌoyo ishowal.
12 Haꞌ naj jahaw chiꞌabꞌento leqꞌtiꞌal
haꞌ hun ebꞌnaj chimunla yinta naj chetatoj.
13 Haꞌ anma mebꞌaꞌ yebꞌ anma chiꞌelqꞌawi yinh anma mebꞌaꞌ,
lahan chimujli iskawanhil yu Komam Jahawil.
14 Haꞌ naj rey kꞌul chiyute iskꞌul yinh anma mebꞌaꞌ,
nahatil chiꞌok naj reyal.
15 Hayet chijijni yebꞌ yet chonhkachlaxi,
chijiqꞌ kohelanil;
wal ebꞌnaj kꞌahole kaw tzꞌeꞌ ismam ismiꞌ yinh chiyako ebꞌnaj ismiꞌ yinh txꞌixwilal.
16 Hayet chipohchakanh anma txꞌoj,
chipohchapaxokanh mule;
yajaꞌ haxa anma kꞌul isbꞌeybꞌal chiyilaꞌ istanhtzelaxilo anma mulum tuꞌ.
17 Hach mame hach tiꞌ, kuy hawuninal,
haxinwal chaqꞌ aqꞌankꞌulal yul hawanma yebꞌ xin tzalahilal.
18 Haꞌ bꞌay maxhtaj Komam Dios chiꞌijbꞌan hunu tzet ye tuꞌ, machi istxolal tzetaj ye tuꞌ.
¡Saqꞌal yet anma chiyijen ischejbꞌanil Komam Dios!
19 Naj chejabꞌ, maxhnhetaj yu tzotiꞌ chikuycha naj,
yuto chistxum naj, yajaꞌ mach chisyije naj.
20 Ekꞌbꞌalto kꞌul iskawxi kokꞌul yinh hunu mak machi isnabꞌal,
sata yinh mak mach chistxum yinh tzet chala.
21 Haꞌ mak kaw tzꞌeꞌ chute isbꞌa yinh ischejabꞌ yet nichꞌanto,
kaw txꞌiꞌal isyaꞌtajil chilaꞌ yinh islahobꞌal.
22 Haꞌ mak kaw how iswiꞌ yebꞌ howalnhetikꞌa istzan,
chiyichekanh howal yebꞌ xin kaw txꞌiꞌal isyaꞌtajil chitij.
23 Haꞌ mak kaw chiyikanh isbꞌa, chiꞌilaxayoj;
wal mak chiyiyo isbꞌa xin chiꞌilaxkanh.
24 Haꞌ mak kaw yet lahan isbꞌa yebꞌ anma elqꞌom,
lahan hakaꞌta ayko ishowal yinh yet elqꞌomal tuꞌ,
waxanhka ay tzꞌaktiꞌ chiyabꞌe, yajaꞌ mach chal naj tet naj.
25 Haꞌ mak chixiw tet yet anmahil,
haꞌtikꞌa chiyaqꞌ aykꞌayo isbꞌa;
wal mak chikawxi iskꞌul yinh Komam Dios kaw tanhebꞌil.
26 Kaw txꞌiꞌal mak chisayni iskꞌulal iskꞌul ebꞌnaj yahaw konhobꞌ,
yajaꞌ xin hanhe Komam Dios chiwatxꞌen istoholal.
27 Haꞌ anma tohol isbꞌeybꞌal,
mach choche istxꞌojal chiswatxꞌe anma txꞌoj isnabꞌal;
haxa anma txꞌoj isnabꞌal,
mach chitzala yinh anma tohol isbꞌeybꞌal.