28
Haꞌ anma txꞌoj, chiꞌelkanh,tonhka xin machi mak chitzumbꞌenikꞌoj;
wal mak tohol isbꞌeybꞌal, aqꞌankꞌulal yehi,
lahan hakaꞌ noꞌ bꞌalam machi xiw tet hunuxa no noqꞌ.
2 Yu istxꞌojal anma, yuxin kaw txꞌiꞌal ebꞌnaj ijbꞌalom,
wal naj ijbꞌalom kaw kꞌul isnabꞌal yohta naj yaniko sunil yinh istxolal.
3 Haꞌ mak mebꞌaꞌ chiꞌelqꞌawi yinh yet mebꞌaꞌil,
lahan hakaꞌ nime nhabꞌ chiꞌetanto tzꞌunubꞌ.
4 Haꞌ mak chispohilo isbꞌa yinh ischejbꞌanil Komam Dios,
chitzala yinh anma chiwatxꞌen istxꞌojal;
wal mak chiyijen ischejbꞌanil Komam,
mach chitzala yinh anma txꞌoj chiswatxꞌe tuꞌ.
5 Haꞌ anma txꞌoj, mach chitxumchalo istoholal yu,
wal anma chiꞌawten Komam Dios yinh sunil chitxumchalo yu.
6 Ekꞌbꞌalto kꞌul, waxanhka mebꞌaꞌonh, yajaꞌ tanhe kꞌul kobꞌeybꞌal;
sata ta qꞌalomonh yajaꞌ istxꞌojal chiꞌekꞌ yinh konabꞌal.
7 Haꞌ ebꞌnaj uninale chiyijen ischejbꞌanil Komam Dios ay isnabꞌal ebꞌnaj;
yajaꞌ wal ebꞌnaj yinhnhe peqꞌal chiꞌekꞌi,
chako ebꞌnaj ismam yinh txꞌixwilal.
8 Haꞌ qꞌalomal chistenbꞌa hunu mak yu kaw niman yal chꞌen melyu
chisqꞌan yinh ismelyu chaqꞌ kamikal,
haꞌ tet mak chitzꞌay iskꞌul yinh anma mebꞌaꞌ
chistenbꞌa isqꞌalomal tuꞌ.
9 Tato ay hunu mak mach choche yabꞌeꞌ ischejbꞌanil Komam Dios,
mach chochepaxo Komam yabꞌeꞌ istxah huneꞌ mak tuꞌ.
10 Haꞌ mak chiꞌaqꞌni aykꞌayo anma kꞌul isbꞌeybꞌal yinh istxꞌojal,
haꞌtikꞌa chiꞌaykꞌay yul isqꞌabꞌ istxꞌojal tuꞌ;
wal anma machi ismul chissaya, chischah iskꞌulal.
11 Haꞌ naj qꞌalom, kaw ay iswiꞌ naj yalni,
yajaꞌ chiꞌaykꞌay naj yu naj mebꞌaꞌ ay isnabꞌal.
12 Hayet chiqꞌoji ebꞌnaj tohol isbꞌeybꞌal
kaw chitzala anma,
yajaꞌ ta haꞌ ebꞌnaj txꞌoj isnabꞌal
chiqꞌoji chiyebꞌato isbꞌa anma.
13 Haꞌ mak chebꞌato ismul, mach kꞌulo chiꞌelikoj;
wal mak chalati ismul chisbꞌejnikano ismul tuꞌ,
ay nimankꞌulal yinh.
14 Saqꞌal yet anma sunilbꞌal tiempo chiyiyo isbꞌa tet Komam Dios,
wal mak chaqꞌ kawbꞌo yanma chiꞌaykꞌay yinh istxꞌojal.
15 Hakaꞌ hunu noꞌ bꞌalam kaw how,
maka hakaꞌ noꞌ oso chonhkꞌuxnikamoj;
hak tuꞌ ebꞌnaj txꞌoj isnabꞌal ayko yahawo yinh konhobꞌ kaw mebꞌaꞌ.
16 Haꞌ naj yahaw konhobꞌ mach kꞌulo iswiꞌ,
chislahiko naj isyaꞌtajil yibꞌanh konhobꞌ,
yajaꞌ wal naj mach chocheko chꞌen melyu,
ay iskawil naj yinh niman tiempo.
17 Haꞌ mak chipotxꞌnikamo hunu yet anmahil,
mach chiꞌekꞌto yet istit kamikal yinh;
machi xin hunu mak chikolni yul isqꞌabꞌ kamikal tuꞌ.
18 Haꞌ anma tohol isbꞌeybꞌal chikol-laxiloj,
wal anma txꞌoj isbꞌeybꞌal chiꞌaykꞌay yul isqꞌabꞌ isyaꞌtajil.
19 Haꞌ mak chimunla sat istxꞌotxꞌ,
chipalkꞌon tzet chislo;
wal mak chiꞌekꞌ yinta ebꞌnaj isah, chislahkaniko mebꞌaꞌil yinh.
20 Haꞌ anma chiyal isyelal kaw txꞌiꞌal iskꞌulal chischah;
wal mak choche yok qꞌalomal
kaw txꞌiꞌal isyaꞌtajil chiyila.
21 Mach kꞌuloj ta ay hunu mak ekꞌbꞌal yelapno sata hunuxa yet anmahil yul sat.
Ta chal iskꞌul, waxanhka yu nichꞌan istiꞌ wah chikosay komul.
22 Haꞌ mak kaw chiyoche chꞌen melyu, kaw chiyaqꞌkamo isbꞌa yok qꞌalomal,
yajaꞌ xin mach yohtajo ta lanhan istit mebꞌaꞌil yibꞌanh.
23 Haꞌ yinh istzujanilxa ekꞌbꞌalto chitzala anma
yinh mak chikachwahi,
sata yinh anma tonhe chitzoteli.
24 Haꞌ mak chiꞌelqꞌawi yinh ismam ismiꞌ,
tzujan tuꞌ chalni ta machi ismul,
yet lahan isbꞌa yebꞌ anma elqꞌom.
25 Haꞌ mak kaw txꞌiꞌalxakano tzet chiyoche,
ay howal chisyuchtij;
wal mak chikawxi iskꞌul yinh Komam chiꞌahi.
26 Haꞌ mak kaw chikawxi iskꞌul yinh, machi isnabꞌal,
wal mak ay isnabꞌal chiskolilo isbꞌa.
27 Haꞌ mak chikolwa yinh anma mebꞌaꞌ,
machi mebꞌaꞌil chila;
yajaꞌ mak mach chikolwa yinh mebꞌaꞌ tuꞌ kaw txꞌiꞌal tzꞌaktiꞌ chiqꞌanlax yibꞌanh.
28 Hayet chiqꞌoji ebꞌnaj txꞌoj isnabꞌal chiyebꞌa isbꞌa anma,
yajaꞌ wal yet chitanhilo ebꞌnaj tuꞌ, chipohchakanh anma tohol isbꞌeybꞌal.