27
Machojabꞌ chikawxi hakꞌul yinh tzꞌayik yet hekal,yuto mach hawohtajo tzet chiyaqꞌ tzꞌayik tuꞌ.
2 Machojabꞌ tajach chawalikꞌoj ta kꞌulach,
wal xin nanojabꞌ mak chihalnikꞌoj ta kꞌulach.
3 Haꞌ chꞌen chꞌen yebꞌ arena, kaw al machi techa ju jijni;
hak tuꞌ yet chitit ishowal ebꞌnaj mach isnabꞌal, mach chitecha ju.
4 Hayet chitit kohowal, kaw ay tzet chijetatoj,
haxa ischiwa kokꞌul mach chaqꞌ kachaꞌ isbꞌa.
5 Ekꞌbꞌalto kꞌul kokachni hunu mak chijalniko ismul yinh sat;
sata ta xahan ay ju jalni,
yajaꞌ xin machi kokachah.
6 Haꞌ mak yeli, xahan ay yet anmahil yu, chikachwahi,
waxanhka xin yaꞌ chiꞌok istzotiꞌ tuꞌ;
yajaꞌ wal mak chitzala yinh istxꞌojal tzet chiswatxꞌe yet anmahil,
mach chiskacha yuto ayko ishowal yinh.
7 Haꞌ mak nohna iskꞌul, waxanhka kabꞌ noꞌ chiꞌaltelax tet,
mach chisje iskꞌul yinh noꞌ;
wal mak kaw chinhochahi,
waxanhka kꞌah tzet chiꞌaqꞌlax islobꞌ kaw chiꞌ chabꞌe.
8 Haꞌ mak nahat yehilo yinh iskonhobꞌ bꞌay pitzkꞌanahi,
lahan hakaꞌ hunu noꞌ chꞌik chisbꞌejkano yatut.
9 Haꞌ perfume yebꞌ yanhal xilqꞌape,
chitzala kokꞌul yu,
yu isxuqꞌal xam;
hak tuꞌ istzala kokꞌul yet chiꞌaqꞌlax kuybꞌanile jet.
10 Haꞌ mak hawamigo,
mach chabꞌejkanoj
yebꞌ xin mach chabꞌejkano mak yamigo isbꞌa yebꞌ hamam.
Tato ay isyaꞌtajil chawaqꞌle, mach chaxhto hawalaꞌ hayaꞌtajil tuꞌ tet hawuxhtaj,
yuto ekꞌbꞌalto kꞌul hawalni tet hawet anmahil ayayo takawilal,
sata ta hato hawalno tet hawuxhta kaw nahat aya.
11 Hach inkꞌahol, helanojabꞌ chawute hanabꞌal,
hak tuꞌ chu hawaqꞌni tzalaho wanmahan,
haxinwal chisje inpajtzenan tet mak chiꞌaqꞌni tako inkꞌulan.
12 Haꞌ mak ay isnabꞌal, ta ay hunu huchan chila, machi to bꞌey tuꞌ;
wal mak mach isnabꞌal, chiꞌekꞌto bꞌey tuꞌ
kat yay isyaꞌtajil huchan tuꞌ yibꞌanh.
13 Haꞌ mak chaqꞌ isbꞌa yinh hunu mak mach yohtajoj yinh kꞌam melyu,
chiꞌilaxilo xil isqꞌap, kat yilaxilo sunil tzet aya.
14 Hayet chonhtioxhli yinh kaw ip tet hunu jet anmahil yinh kaw sahabꞌ,
lahan huneꞌ tuꞌ hakaꞌ bꞌuchwal yul sat.
15 Haꞌ ix ix howalnhetikꞌa chu yinh yichamil,
lahan ix hakaꞌ hunu tzꞌu naunhe chiꞌay yul nha yinh istiempohal nhabꞌil,
16 ta chijoche kokachaꞌ ix, lahan hakaꞌta chijoche kokachaꞌ yekꞌ jaqꞌeqꞌ,
maka hakaꞌta chijoche jiqꞌaꞌkanh teꞌ aceite yul koqꞌabꞌ.
17 Haꞌ chꞌen hierro chinhijlax yeh chꞌen
yu hunuxa chꞌen hierro,
hakpax tuꞌ naj winaj, helan chiꞌeliko naj yu kuybꞌanile chaqꞌ hunuxa maka.
18 Haꞌ mak chitanhen teꞌ higuera chislo sat teꞌ.
Haꞌ naj chejabꞌ chitanhen yahaw,
chiꞌalaxiko ismay naj yu yahaw tuꞌ.
19 Hakaꞌ chu jilni yechel kosat xol haꞌ haꞌ,
hak tuꞌ chu yil-lax tzet chiꞌekꞌ yinh isnabꞌal naj winaj yinh tzet chiswatxꞌe.
20 Haꞌ naj kamikal yebꞌ kambꞌal,
maxhtikꞌa chinoh iskꞌul,
hak tuꞌ yochenko anma tzetaj ye tuꞌ, maxhtikꞌa bꞌaqꞌinhal chinoh iskꞌul.
21 Chꞌen oro yebꞌ chꞌen plata chiꞌilwelax chꞌen yul qꞌaꞌ yunhe yil-laxi ta kꞌul chꞌen maka machoj;
hak tuꞌ anma, haꞌtikꞌa yet anmahil chiꞌilni ta kꞌul maka txꞌoj.
22 Waxanhka kaw chixanhlax qꞌaho naj machi isnabꞌal hakaꞌ isxanhlaxilti sat ixim trigo,
yajaꞌ maxhtikꞌa chisbꞌejkano naj iswatxꞌen issukal tuꞌ.
23 Ayojabꞌ hachiko hawilni hameꞌ,
machojabꞌ chatinhchakano noꞌ,
24 yuto haꞌ chꞌen melyu yebꞌ tzet ay yul haqꞌabꞌ,
mach sunilbꞌal tiempo aya.
25 Hayet chiwolni cheqꞌanh kat iswolnipaxo teꞌ telaj,
kat hakꞌubꞌankanh tzet chislo hanoqꞌ tuꞌ.
26 Haꞌ noꞌ hameꞌ tuꞌ chiꞌanilo noꞌ lana
chiꞌokniko yinh xil haqꞌap;
haxa xin noꞌ chiw chiꞌanilo istohol hatxꞌotxꞌ chaloqꞌo.
27 Kat yaqꞌnipaxo noꞌ miꞌe chiw noꞌ lech chawukꞌu
yebꞌ hawuninal yebꞌ hachejabꞌ.