26
Mach kꞌulo yay chꞌen chew yinh istzꞌayikal waresma;mach kꞌulopaxo yay haꞌ nhabꞌ yinh istzꞌayikal hatxꞌo,
hakpax tuꞌ xin mach kꞌulo yalaxiko ismay mak mach isnabꞌal.
2 Hakaꞌ noꞌ tzꞌunun tonhe chiꞌekꞌi, maka hakaꞌ noꞌ yalomtioxh machi yatut,
hak tuꞌ tzꞌaktiꞌ, mach chiꞌapni ta machi komul.
3 Noꞌ cheh chꞌayto tzꞌum yinh noꞌ, yunhe iskuylax noꞌ,
haxa noꞌ burro chiꞌalaxikto chꞌen freno yul istiꞌ noꞌ;
hakpax tuꞌ mak machi isnabꞌal chiꞌayto tzꞌum yinh.
4 Mach chaxhtaqꞌwi tet anma txꞌoj isnabꞌal yet chiyalni istxꞌojal tawet,
haxinwal mach lahano chawute habꞌa yebꞌi.
5 Hayet chitzotel anma machi isnabꞌal tawet,
kachwahanh yinh istxꞌojal chal tawet,
yunhe istxumni isbꞌa iskꞌul ta maxhtaj haꞌ yekoj.
6 Hayet chikawxi kokꞌul yinh hunu mak machi isnabꞌal chijabꞌento hunu kochejbꞌanil yintaj,
lanhan jiniti isyaꞌtajil jibꞌanh, yebꞌ lahan hakaꞌta chikotzokꞌilto joj.
7 Haꞌ mak chikotxxi mach chu isbꞌelwito nahat;
hakpax tuꞌ tzet chal ebꞌnaj machi isnabꞌal,
mach chipujlaxikꞌo nahat.
8 Mach chu iskꞌal-laxiko chꞌen qꞌojbꞌal yinh iswiꞌ noꞌ ula,
hakpax tuꞌ mak machi isnabꞌal,
mach chu yalaxiko iswinajil.
9 Naj ukꞌum, waxanhka ay teꞌ txꞌix chito yul yoj naj, yajaꞌ machi yabꞌe naj;
hak tuꞌ mak machi isnabꞌal, waxanhka chihal-lax tzotiꞌ
yet helanile tet mach chabꞌe.
10 Haꞌ naj chiꞌaqꞌni ismunil naj machi isnabꞌal yebꞌ isah,
lahan naj hakaꞌ naj chiꞌanito teꞌ litꞌ yinh makxanhetikꞌa chiꞌekꞌto yul bꞌeh.
11 Metx txꞌiꞌ, chimeltzo metx isleqꞌaꞌkanh isxaw hunelxa,
hakpax tuꞌ mak machi isnabꞌal, chimeltzo iswatxꞌeꞌ issukal.
12 Ayto hanikꞌxa iskꞌulal iskawxi kokꞌul
yinh tzet chal mak machi isnabꞌal
sata yinh tzet chal mak chiyalikꞌoj ta kaw helan.
13 Haꞌ naj isah, yunhe mach chito naj munil
yuxin chal naj ta ayayo noꞌ bꞌalam yul bꞌeh ismajwahi.
14 Hakaꞌ chu isbꞌili teꞌ pulta yu chꞌen visagra,
hak tuꞌ chu ismeltzonikꞌo isbꞌa naj isah yibꞌanh istxꞌat.
15 Naj isah chayto isqꞌabꞌ naj yul issekꞌ,
yajaꞌ nitam yanikto naj tzet chislo tuꞌ
yul istiꞌ chisje iskꞌul.
16 Naj isah chistxum naj ta ekꞌbꞌalto isnabꞌal naj
yibꞌanh hujwanh mak kꞌul ispajtzen qꞌambꞌebꞌal.
17 Hayet chijanito kobꞌa xol howal machi jok jinh,
lahan hakaꞌ yet chonhok tzabꞌno yinh istxikin hunu metx txꞌiꞌ.
18 Hakaꞌ hunu naj mach kꞌulo ye yul iswiꞌ
tonhe chisqꞌojto litꞌ ayko qꞌaꞌ yinh,
19 hak tuꞌ mak chiyako leqꞌtiꞌal tet yamigo,
tzujan tuꞌ chalni tato tonhe chimaxli.
20 Ta machi teꞌ siꞌ chiꞌalaxikto yul qꞌaꞌ, chitanhilo qꞌaꞌ tuꞌ,
hakpax tuꞌ yet machi naj hobꞌom tzotiꞌ,
machi howal chiꞌahi.
21 Ta chijoche qꞌaꞌ, chijakto yaqꞌbꞌil teꞌ siꞌ,
hak tuꞌ mak chiyoche howal chiyako yip howal tuꞌ.
22 Haꞌ tzet chal mak halom qꞌumal,
lahan hakaꞌ hunu tzet ye tuꞌ labꞌan koloni,
kat yayapno yul kokꞌul.
23 Haꞌ tzotiꞌ saqꞌal yoki, yajaꞌ nabꞌil istxꞌojal yu,
lahan hakaꞌ yet chimaslaxiko chꞌen plata yinh hunu txꞌotxꞌ xhi.
24 Haꞌ mak ayko ishowal yinh iskꞌul, kꞌul yubꞌ mach chisyeloj yet chitzoteli,
yajaꞌ wal yul yanma xin, nabꞌil istxꞌojal yu.
25 Yuxin mach chawayto yul hawanma yinh tzet chala,
waxanhka kaw saqꞌal istzoteli, yajaꞌ wal isnabꞌal nohna yu istxꞌojal.
26 Haꞌ huneꞌ mak tuꞌ,
waxanhka mach chisyeloj ta chichiwa iskꞌul,
yajaꞌ chisyelo yinh tzet chiswatxꞌe.
27 Haꞌ mak chiholni hunu holan,
haꞌtikꞌa chiꞌaykꞌayto yul.
Haꞌ mak chikꞌolnito hunu chꞌen niman chꞌen
haꞌtikꞌa chikechꞌmoto yalanh chꞌen.
28 Haꞌ mak leqꞌtiꞌ, mach choche yalaꞌ isyelal.
Haꞌ mak kaw loloꞌ istzoteli kaw ay tzet chetatoj.