ISHOꞌ MAJAN KUYBꞌANILE: TZOTIꞌ KAW HELAN YAL YAꞌ SALOMÓN
(25:1–29:27)
Iskabꞌ majan tzotiꞌ yal yaꞌ Salomón
25
Hakpax tuꞌ hunteqꞌan kuybꞌanile tiꞌ, haꞌ yaꞌ Salomón halnhekanoj, haxa xin ebꞌnaj istzꞌibꞌlom yaꞌ Ezequías, isreyal txꞌotxꞌ Judá tzꞌibꞌnhenkanoj.2 Chiꞌalaxiko ismay Komam Dios yu tzetaj ewan ye yu Komam;
haꞌ xin ebꞌnaj rey chitxumnilo tzet ewan ye tuꞌ,
kaw ay yelapno ebꞌnaj.
3 Hakaꞌ isnahatil yekanh satkanh
yebꞌ hakaꞌ isnahatil yehayto yich txꞌo txꞌotxꞌ,
hak tuꞌ isnabꞌal ebꞌnaj rey.
Haꞌ tzet chiꞌekꞌ yinh isnabꞌal ebꞌnaj rey tuꞌ,
machi hunu mak chitxumniloj.
4 Ta chiꞌilaxilo istzꞌilal chꞌen plata
chisje iswatxꞌelax hunu tzet ye tuꞌ
kaw ay istohol yinh chꞌen.
5 Ta chiꞌilaxilo ebꞌnaj txꞌoj isnabꞌal
yinh ismunil sata naj rey,
hak tuꞌ chu yiqꞌni yip naj
yaqꞌni yahawilal yinh istoholal.
6 Mach chawala ta kaw ay hawelapno sat naj rey.
Mach chachay tzꞌonhno bꞌay chiꞌay tzꞌonhno ebꞌnaj ay yelapnoj.
7 Ekꞌbꞌal kꞌul chachawtelax tzꞌonho
yul chem kaw ay yelapno tuꞌ,
sata ta chiꞌilaxilo hapixan sata ebꞌnaj kaw ay yelapno tuꞌ.
8 Mach tonhe chaqꞌanna yinh hunu maka,
yuto kꞌuxantaxka ay hunu mak testigo
chihalni ta machi ismul naj,
ta hak tuꞌ, matxataxka chitxumcha hawu tzet chawute habꞌa.
9 Ta ay hunu hahowal
yebꞌ mak ayayo hakawilal,
watxꞌeyo habꞌa yebꞌi,
yajaꞌ xin mach chawalati tzet ye tuꞌ xayal hunuxa hawet anmahil.a
10 Kꞌuxantaxka ay mak chiꞌabꞌen tzet chawala,
kat yel hapixan yu, kat habꞌina txꞌojal.
11 Haꞌ tzotiꞌ chihal-lax chiꞌaqꞌni yaqꞌlobꞌal kokꞌul,
lahan hakaꞌ hunu yechel manzan oro, ayko chꞌen plata yelawiloj.
12 Hakaꞌ hunu chꞌen jolqꞌabꞌ yebꞌ hunu chꞌen uwe
nabꞌa oro kaw ay istohol,
hak tuꞌ yelapno kachbꞌanile yul sat mak chiyabꞌe kachbꞌanile tuꞌ.
13 Haꞌ naj chejabꞌ kaw yijem,
lahan naj hakaꞌ chꞌen chew yinh istiempohal qꞌaꞌ yul sat naj chichejni.
Naj chejabꞌ yijem tuꞌ, chaqꞌ naj yip yanma yahaw tuꞌ.
14 Haꞌ mak chalni ta chaqꞌa, yajaꞌ matzet chaqꞌpaxoj,
lahan hakaꞌ moyan yebꞌ jaqꞌeqꞌ machi nhabꞌ iqꞌbꞌil yu.
15 Haꞌ mak niman iskꞌul,
chiyaqꞌ tanho ishowal naj juez,
haxa mak kꞌulchꞌan istzoteli chaqꞌ ayo iskꞌul naj.
16 Ta ay noꞌ kabꞌ chiꞌilcha hawu,
mach chachpalkꞌon haloni noꞌ,
yuto ta ekꞌna chaloh noꞌ ay ismay haxabꞌi yu noꞌ.
17 Mach naunhe chatuklen hawamigo,
ta mach xin chachtibꞌayo yu kat kach isyahnikanh.
18 Haꞌ mak chisbꞌalkanh leqꞌtiꞌal yinh yet anmahil,
lahan hakaꞌ hunu te teꞌ,
maka hunu chꞌen espada, maka hakaꞌ teꞌ litꞌ qꞌaqꞌiꞌ iswiꞌ.
19 Ta chikawxi kokꞌul yinh mak txꞌoj isnabꞌal
yinh istzꞌayikal isyaꞌtajil,
lahan hakaꞌ qꞌahnato joj,
yebꞌ xin hakaꞌ istit isyaꞌil jeh qꞌanaj yet chonhwaꞌi.
20 Haꞌ mak chibꞌitni yinh sat mak bꞌiskꞌulal yehi,
lahan hakaꞌ yet chiꞌalaxiko vinagre yinh hunu lahwilal,
maka hakaꞌ yet chiꞌilaxilo xil koqꞌap yet kaw ay chew.
21 Ta chinhocha hunu mak ayko ishowal tawinh,
aqꞌ tzet chislo; ta chitaj istiꞌ aqꞌ hunu vaso haꞌ yukꞌuꞌ.
22 Haxinwal chitakilo iskꞌul kat istxꞌixwikanh,
haꞌ xin Komam Dios chiꞌaqꞌni ispaj selel tawet.
23 Haꞌ jaqꞌeqꞌ chitit yinh norte ay haꞌ nhabꞌ chitij,
hak tuꞌ tzotiꞌ txꞌoj chiyaqꞌ howbꞌo kosat.
24 Ekꞌbꞌalto kꞌul waxanhka yul nichꞌan pat ayonh,
sata ta ayonh yul hunu niman nha yebꞌ hunu ix ix howalnhetikꞌa chu.
25 Hakaꞌ haꞌ chewla haꞌ yul kotiꞌ yet kaw chitaj kotiꞌ,
hak tuꞌ tzotiꞌ kꞌul chitit nahata kat yal-lax jet.
26 Hakaꞌ hunu ha haꞌ kaw tzꞌil yebꞌ kaw ay sam,
hak tuꞌ naj machi ismul, chiluylunkanh sata hunu mak ay ismul.
27 Mach kꞌuloj ta chonhpalkꞌon koloni noꞌ kabꞌ,
hakpax tuꞌ xin mach kꞌuloj chikosaynikꞌo yalaxiko komay yu anma.
28 Hakaꞌ hunu konhobꞌ machi iskꞌubꞌal hoyaniko yinh,
hak tuꞌ mak mach chu yaqꞌni kachaꞌ isbꞌa yinh istxꞌojal choche.