24
Machojabꞌ chawocheko tzet ay anma txꞌoj isnabꞌal,nitam hawochento hawok xol anma tuꞌ.
2 Yuto hanhkꞌanhetikꞌa yinh istxꞌojal chiꞌekꞌ isnabꞌal
yebꞌ xin hanhkꞌanhetikꞌa ismachiswalilal chiswatxꞌe,
haꞌ choche yalaꞌ.
3 Haꞌ mak ay ishelanil chiswatxꞌekanh yatut,
chanayto isxeꞌal yatut tuꞌ yu ay isnabꞌal.
4 Yu isnabꞌal tuꞌ chinoh iscuartohal yatut yu tzet aya.
Haꞌ xol sunil tzet ay tuꞌ, ay tzet ye tuꞌ tiꞌ kaw kꞌulchꞌan jilni, yebꞌ tzetaj ye tuꞌ kaw ay istohol.
5 Ekꞌbꞌalto ay yelapno anma ay isnabꞌal sata mak chalni ta kaw ay yip.
Ekꞌbꞌalto kꞌul ay konabꞌal sata ta kaw ay jip.
6 Ta ay hunu howal chiꞌoki,
kaw yilal istxumlaxi yinh tzet chu yichiko huneꞌ howal tuꞌ.
Ta txꞌiꞌal mak chiꞌaqꞌni konabꞌal yinh hunu howal,
chonhqꞌoji yinh howal tuꞌ.
7 Haꞌ mak machi isnabꞌal,
machi txumcha yu yinh tzet chu istzotel sata naj alkal,
yuto nahat yehilo helanile yinh isnabꞌal.
8 Haꞌ mak yinhnhe iswatxꞌen istxꞌojal ayko isnabꞌal,
chihal-lax yinh ta txꞌoj nabꞌil yu.
9 Haꞌ isnabꞌal anma lutꞌ, haꞌ ton iswatxꞌen mule;
haxa mak bꞌuchwawom, sunil anma chiyahni.
10 Haꞌ mak chipax yintaj yet chihul isyaꞌtajil yibꞌanh;
machi yip yanma huneꞌ mak tuꞌ.
11 Kolilo mak lanhan yilaxto yu yaqꞌlax kamoj,
kolpaxilo mak aypaxiko yul isqꞌabꞌ kamikal.
12 Waxanhka chawala ta mach hawohtajoj,
yajaꞌ wal Komam Dios chonhilni,
yohta tzet chiꞌekꞌ yinh konabꞌal;
haꞌ Komam chiꞌaqꞌni ohtanhelaxiloj,
yuto yohta Komam tzet chikowatxꞌe
kat yilni yinh tzet chonhelikoj,
hatatikꞌa tzet chikowatxꞌe hununonh.
13 Hach inkꞌahol abꞌle ischiꞌal iskabꞌil noꞌ ajan,
kat hawohtanheniloj ta kaw chiꞌ noꞌ.
14 Hakaꞌ ischiꞌal noꞌ kabꞌ tuꞌ,
hak tuꞌ chu hawabꞌeno ischiꞌal helanile yebꞌ nabꞌale;
tato chiꞌilchalo tuꞌ hawu kaw kꞌul chachelikoj
yebꞌ xin machi bꞌaqꞌinhal chitanhilo tzet ayko yipo hawanma.
15 Hach txꞌoj hanabꞌal,
machojabꞌ chanako istxꞌojal yinh anma tohol isbꞌeybꞌal;
machojabꞌ chaxhok eleqꞌ yul yatut.
16 Waxanhka hujel el chiꞌaykꞌay mak tohol isbꞌeybꞌal,
haktikꞌapax tuꞌ chu yinikanh isbꞌa hunelxa;
yajaꞌ wal anma txꞌoj isnabꞌal chiꞌaykꞌaykano yinh isyaꞌtajil.
17 Mach chachtzalahi yebꞌ mach chaqꞌinhnhe yet chitxaqꞌmo
kat yaykꞌay mak ayko ishowal tawinh.
18 Yuto ta chachtzala yu huneꞌ tuꞌ,
mach chitzala Komam tawinh,
kat yinilo Komam ishowal yinh huneꞌ mak tuꞌ.
19 Mach chichiwa hakꞌul yinh anma txꞌoj isbꞌeybꞌal;
mach chawochepaxiko tzet ay anma mulum.
20 Yuto haꞌ anma txꞌoj isbꞌeybꞌal,
mach kꞌulo chiꞌelikoj.
Haꞌ anma txꞌoj tuꞌ chitanhiloj, hakaꞌ istanhilo qꞌaꞌ yinh hunu cantil.
21 Hach inkꞌahol, ayojabꞌ yelapno Komam Dios yul hasat;
xiwanhpaxo tet naj jahaw,
machojabꞌ chahunbꞌa habꞌa
yebꞌ ebꞌnaj ayko ishowal yinh naj jahaw tuꞌ.
22 Yuto haꞌ mak chiyako ishowal yinh naj,
hunepnhechꞌan chitanhiloj;
hanhe xin Komam Dios yebꞌ naj jahaw tuꞌ
yohta tzet isyaꞌtajil chiꞌay yibꞌanh ebꞌnaj.
ISKANH MAJAN KUYBꞌANILE: ISTZOTIꞌ EBꞌNAJ AY ISHELANIL ISNABꞌAL
(24:23-34)
23 Hakpax tuꞌ hunteqꞌan kuybꞌanile tiꞌ,
haꞌ ebꞌnaj ay isnabꞌal halnhekanoj, xhi hakaꞌ tiꞌ:
«Mach kꞌuloj ta ay hunu mak ekꞌbꞌal yelapno
sata hunuxa mak yul sat naj juez,» xhi.
24 Naj juez chikolnilo mak ay ismul,
chitzꞌaktiꞌnhelax naj yu nime konhobꞌ,
machi xin chiꞌochelax yu konhobꞌlaj.
25 Yajaꞌ wal naj chiꞌanayo isyaꞌtajil yibꞌanh mak ay ismul,
kꞌul chiꞌeliko naj, yebꞌ xin kaw kꞌul istzotel anma yinh naj.
26 Haꞌ mak kꞌul chu ispajtzen hunu qꞌambꞌebꞌal chitzꞌolax istiꞌ.
27 Maxhto chawatxꞌe hawatut
tato maxhto hamunil chawatxꞌe,
yebꞌ tato maxhto tzet ayach.
28 Mach komono chawal hunu tzotiꞌ yinh hawet anmahil,
machojabꞌ hunu leqꞌtiꞌal chabꞌaliko yinh.
29 Ta ay hunu istxꞌojal chiwatxꞌelax tawinh,
mach chapajtze;
machojabꞌ chawatxꞌe istxꞌojal yinh hakaꞌ kach yute.
30 Kinekꞌan sat istxꞌotxꞌ naj isah
yebꞌ xol yuva naj machi isnabꞌal.
31 Yajaꞌ xin txꞌixnhe teꞌ wilan sat istxꞌotxꞌ naj
yebꞌ xol teꞌ uva tuꞌ;
haxa iskꞌubꞌal istxꞌotxꞌ naj tuꞌ xaꞌay wuynahi.
32 Hayet wilnihan huneꞌ tuꞌ,
inkꞌubꞌankanojan yinh innabꞌalan
wiqꞌni inkuybꞌanilan yinh.
33 Hayet tonhetikꞌa wayanh chiju
kat iswakxi kowiꞌ yu naj wayanh
kat kam kolaqꞌni koqꞌabꞌ yunhe saqꞌal istit kowayanh.
34 Hak tuꞌ chu istit mebꞌaꞌil jinh,
tona nahul ayonh kat yapni jinh,
hakaꞌ chu yapni lemna hunu naj elqꞌom,
hak tuꞌ chu yapni naj mebꞌaꞌil tuꞌ.