23
Ta ay hunu mak kaw ay yelapno chachawten waꞌo yatut,kaw istxumabꞌ isbꞌa hakꞌul mak yinh sat ayachikoj.
2 Waxanhka kaw chachnhochahi,
yajaꞌ kach hanhochahilal tuꞌ.
3 Machojabꞌ chawocheko isxuqꞌal tzet ayayo sat ismexha naj tuꞌ,
yuto kꞌuxantaxka tonhe choche naj kach yetaꞌ.
4 Machojabꞌ chawako yinh hakꞌul hawok qꞌalomal,
wal xin ayojabꞌ hanabꞌal, aqꞌ techahoj.
5 Mach chawako hawanma yinh qꞌalomal,
yuto mach chinahatli, wal xin hakaꞌta chiꞌelilo xikꞌ,
kat iskꞌaykanh yinh anhe hakaꞌ chu isto noꞌ tꞌiw satkanh, hak tuꞌ yehi.
6 Mach chaxhok tzꞌonhno yinh ismexha hunu mak echom,
mach chawocheko iskꞌulal tzet chislo naj;
7 yuto hakaꞌtikꞌa istxꞌojal yanma naj,
hakpax tuꞌ istxꞌojal isnabꞌal naj.
Waxanhka chal naj tawet: «waꞌanh yinh kaw kꞌul,» waxanhka, xhi naj,
yajaꞌ mach yinh sunilo iskꞌul naj chal hakaꞌ tuꞌ.
8 Tzujan hawaꞌilo iskꞌatanh naj kat haxawnhenati tzet maxalo tuꞌ,
yinh hakaꞌ tuꞌ matzet chiꞌokniko tzotiꞌ kaw saqꞌal yok hawal tet naj.
9 Mach lutꞌo chawute habꞌa hakachni mak machi isnabꞌal,
yuto tonhe chitzebꞌo yinh ishelanil hanabꞌal.a
10 Mach chahekꞌ mohon aykanayo yu hawichmam;
mach chawilo istxꞌotxꞌ mak machi ismam, machi ismiꞌ;
11 yuto haꞌ Komam kaw aykano yip,
haꞌ chikolwa yinh mak machi ismam ismiꞌ,
kat iskolnilo yul haqꞌabꞌ.
12 Kꞌubꞌa kuybꞌanile tiꞌ yinh hawanma,
kaw hajbꞌa hatxikin hawabꞌen helanile.
13 Mach chabꞌej hakachni hakꞌahol tzeh,
yuto haꞌ tzꞌum chawaqꞌ yijaꞌ naj tuꞌ mach chikam naj yu.
14 Wal xin to hayet chakachni naj,
lanhan hakolnilo naj yul isqꞌabꞌ kamikal.
15 Hach inkꞌaholtiꞌan,
hayet chitzujchapno helanile hawu,
kaw chiwabꞌehan tzalahilal yul wanmahan.
16 Kaw chitzala inkꞌulan wabꞌenan istoholal chawala.
17 Makojabꞌ chawocheto tzet ay anma mulum;
wal xin xiwanh tet Komam Dios yinh sunilbꞌal ej tiempo.
18 Ta hak tuꞌ, kaw kꞌul chaxhelikoj,
machi bꞌaqꞌinhal chitanhilo huneꞌ tzet ayko yipo hawanma.
19 Hach inkꞌahol, kaw abꞌe tzet chiwalan, ayojabꞌ hanabꞌal;
toholbꞌako hawanma yinh iskꞌulal.
20 Mach chahunbꞌa habꞌa yebꞌ ebꞌnaj ukꞌum teꞌ
yebꞌ anma kaw peqꞌ chute isbꞌa;
21 yuto haꞌ mak ukꞌum teꞌ yebꞌ mak kaw echo iswaꞌi chiꞌok mebꞌaꞌil yinh.
Hakpax tuꞌ ebꞌnaj isah, holkixhtaxanhe xil isqꞌap ebꞌnaj chako yu isahil.b
22 Abꞌe tzet chal hamam, kaxhaqꞌni pitzkꞌahoj;
mach chachyahwa yinh hamiꞌ yet ixnamxa yaꞌ.
23 Kaw aqꞌ hawanma hasaynilo isyelal,
helanile, kuybꞌanile yebꞌ nabꞌale,
mach chabꞌejtzotoj.
24 Haꞌ ismam naj kꞌahole kꞌul isbꞌeybꞌal yebꞌ ay isnabꞌal,
haꞌ ye yu naj yet chitzala naj yinh iskꞌahol tuꞌ,
yuto chiꞌok ismay naj yu iskꞌahol tuꞌ.
25 ¡Hex uninale, aqꞌwe tzalaho iskꞌul hemam hemiꞌ!
¡Yu iskꞌulal chewatxꞌe kat heyaniko ismay!
26 Hach inkꞌaholtiꞌan, ako hawanma yinh tzet chiwaltiꞌan,
kat habꞌeybꞌalnhen inbꞌeybꞌalan.
27 Yuto ebꞌix ix txꞌoj ye iswiꞌ,
lahan ebꞌix hakaꞌ kꞌuh txannhe sat, yajaꞌ nahat yehayto yich.
28 Chimajwa ebꞌix yul bꞌeh hakaꞌ hunu elqꞌom,
kaw xin txꞌiꞌal ebꞌnaj chikꞌayto yu ebꞌix.
29 ¿Mak chiꞌabꞌen isyaꞌil? ¿Mak chiqꞌajwi?
¿Mak chaqꞌ howal, tzujanxa tuꞌ chiꞌah iskꞌul?
¿Mak chiꞌalaxiko islahwilal? ¿Mak chisukbꞌilo isnabꞌal?
30 Haꞌ ton mak mach chisbꞌejkano teꞌ ukꞌe
yebꞌ makta chiꞌekꞌ saynokꞌo sunil majan ej teꞌ ukꞌe.
31 Mach chaxhoktꞌanhno yinh teꞌ vino,
yuto kaw kaj jilnayto teꞌ yebꞌ kaw chitzejla teꞌ yul chꞌen copa,
kaw xin labꞌan yayto teꞌ yul hanuqꞌ.
32 Yajaꞌ haxa yet chiꞌayapno teꞌ yul hakꞌul
hakaꞌ isyaꞌil ischiwa noꞌ labꞌa hak tuꞌ teꞌ.
33 Tzilam ta tzet chisyeko isbꞌa yinh hasat yu teꞌ
kat hatxumni yebꞌ chawalni sukal.
34 Hakaꞌta yibꞌanh haꞌ mar ayach chawabꞌe,
chihoymokanh hasat
yebꞌ hakaꞌta ayachato yibꞌanh isteꞌal teꞌ barco.
35 Kat hawalni hakaꞌ tiꞌ: «Kinmaqꞌlaxan, yajaꞌ mach yaꞌo wabꞌehan;
alaxayto tzꞌum winhan, yajaꞌ mach wabꞌehan,
yajaꞌ hayet chiwatxꞌilo inkꞌulan kat intopaxojan ukꞌuj,» kachi.