22
Ekꞌbꞌalto kꞌul chonhbꞌina yu kꞌul kokꞌul,sata ta ay chꞌen plata yebꞌ chꞌen oro yul koqꞌabꞌ.
2 Haꞌ anma qꞌalom yebꞌ anma mebꞌaꞌ lahannhe anmahil,
yuto haꞌ Komam Dios watxꞌenhe iskabꞌ majanil.
3 Haꞌ mak ay isnabꞌal ta ay hunu huchan chila,
mach chito bꞌey tuꞌ;
wal mak machi isnabꞌal,
chiꞌekꞌto bꞌey tuꞌ
kat yay isyaꞌtajil huchan tuꞌ yibꞌanh.
4 Haꞌ mak chewchotanhe chute isbꞌa yebꞌ kaw ay yelapno Komam Dios yul sat,
chiyaqꞌ Komam qꞌinale yebꞌ qꞌalomal ispajo tet,
kaw xin ay yelapno chiꞌelikoj.
5 Haꞌ yul bꞌeh bꞌay chiꞌekꞌ anma txꞌoj isnabꞌal
kaw aynhetikꞌa latzꞌabꞌ;
wal mak kaw chil isbꞌa xin chishekꞌilo isbꞌa.
6 Kuywe heyuninal yet nixhteto,
haxinwal mach chispohilo isbꞌa yinh kuybꞌanile tuꞌ
yet chiꞌichambꞌi.
7 Haꞌ naj qꞌalom, chiꞌok naj yahawo yinh anma mebꞌaꞌ;
haxa mak chiqꞌanni chꞌen melyu kꞌamil,
chiꞌok ischejabꞌ naj chꞌaqꞌni chꞌen kꞌamil tuꞌ.
8 Haꞌ mak chiwatxꞌen istxꞌojal, haꞌtikꞌa istxꞌojal tuꞌ chischah;
kat istanhtzenilo Komam yu isvara ayko yul isqꞌabꞌ yu ishowal.
9 Haꞌ mak chitzꞌay iskꞌul yinh yet anmahil chiꞌalaxayo iskꞌulal yibꞌanh,
yuto chiyaqꞌ tzet chislo anma mebꞌaꞌ.
10 Hayet chiꞌilaxilo naj bꞌuchwawom,
chiꞌok aqꞌankꞌulal,
kat istanhto howal yebꞌ takkꞌulal.
11 Haꞌ mak chal isyelal kaw chitzala naj rey yinh,
yebꞌ xin kaw kꞌul chute naj iskꞌul
yinh mak kꞌul istzoteli.
12 Haꞌ Komam Dios chitanhen mak ay ishelanil,
wal mak leqꞌtiꞌ chetato Komam isnabꞌal.
13 Naj isah yunhe mach chito naj munil,
yuxin chal naj ta ayayo noꞌ bꞌalam yul bꞌeh,
iskꞌuxtato noꞌ naj.
14 Haꞌ istzotiꞌ ix ix txꞌoj ye iswiꞌ,
lahan hakaꞌ hunu haꞌ haꞌ nahat yehayto yich
bꞌay chitokano ebꞌnaj tzꞌaktiꞌnhebꞌil yu Komam Dios.
15 Haꞌ lutꞌal aytikꞌako yinh ebꞌnaj tzeh,
yajaꞌ chisbꞌejkano ebꞌnaj islutꞌal tuꞌ yet chikachlax ebꞌnaj yu teꞌ kꞌax.
16 Haꞌ mak chiyeta anma mebꞌaꞌ yu yok qꞌalomal,
yebꞌ mak hanhe tet qꞌalom chaqꞌ tzet aya,
chiꞌok mebꞌaꞌil.
ISYOX MAJAN KUYBꞌANILE: ISTZOTIꞌ EBꞌNAJ AY ISHELANIL ISNABꞌAL
(22:17–24:22)
Kuybꞌanile yebꞌ kachbꞌanile
17 Kaw hajbꞌa hatxikin
kat hawabꞌen tzet chiyal ebꞌnaj ay isnabꞌal,
kam txumu tzet chiyaqꞌ ebꞌnaj hakuyuꞌ.
18 Yuto kaw kꞌul ta chakꞌubꞌakano sunil yinh hanabꞌal kat hawohtanheni.
19 Hunteqꞌan kuybꞌanile tuꞌ,
chiwalkanojan tawet tinanh,
yunhe iskawxi hakꞌul yinh Komam Dios.
20 ¿Tom mach tzꞌibꞌnhebꞌilo oxel wuhan tawet xin, yebꞌ kuybꞌanile yebꞌ nabꞌale,
21 yunhe hawohtanhenilo isyelal,
kat hawinito isyelal ispajo qꞌambꞌebꞌal tet mak kach chejnitij?
22 Mach chaxhelqꞌawi yinh anma mebꞌaꞌ, yuto mebꞌaꞌ;
mach chawetapaxo anma mach chu iskolni isbꞌa sata naj juez,
23 yuto haꞌ hunteqꞌan anma tuꞌ, haꞌ Komam chikolwa yinh,
kat yetan Komam mak chiꞌetan yet anmahil tuꞌ.
24 Mach chahunbꞌa habꞌa yebꞌ
mak tonhetikꞌa chichichon iskꞌul yebꞌ howalnhetikꞌa istzan;
25 kꞌuxantaxka hakuynikanh tzet chiswatxꞌe tuꞌ,
hak tuꞌ xin chawako txꞌanh txꞌanh yinh hanuqꞌ.
26 Mach chawakto habꞌa
yalanh iskꞌas hunu komon anma,
27 yuto ta mach chu hatohlan huneꞌ kꞌas tuꞌ,
chiꞌilaxilo hatxꞌat tawalanh.
28 Mach chahekꞌ mohon aykanayo yu hawichmam.
29 Haꞌ mak kaw kꞌul chute ismunil,
mach yintaho komon anma chiꞌok munil,
wal xin yinta ebꞌnaj rey chimunlahi.