21
Haꞌ yul isqꞌabꞌ Komam Dios ayko isnabꞌal ebꞌnaj rey,haꞌ Komam chiꞌijbꞌan isnabꞌal ebꞌnaj
hakaꞌ yekꞌ isqꞌabꞌ ha haꞌ xol tzꞌunubꞌ yu ishayelaxi.
2 Haꞌ yul yet naj winaj, to kaw kꞌul tzet chiswatxꞌe naj,
yajaꞌ wal Komam yohta tzet chiꞌekꞌ yul yanma hunun anma.
3 Bꞌeybꞌalnhewe istoholal yebꞌ iskꞌulal,
yuto hunteqꞌan tuꞌ,
ekꞌbꞌalto kꞌul sata xahanbꞌal yul sat Komam.
4 Haꞌ mak yinhnhe loloꞌal ayko issat,
haꞌ yinikanh isbꞌa haꞌ aypaxiko yinh isnabꞌal,
yuxin haꞌ istxꞌojal ayko yinh isnabꞌal,
sunil tuꞌ kaw mule.
5 Hayet kam chikotxum yibꞌanhilo hunu tzet ye tuꞌ chikowatxꞌe,
kꞌul chiꞌelikoj;
waltaka kaw yinh anhe
chikowatxꞌe hunu tzet ye tuꞌ ay mebꞌaꞌil chitij.
6 Haꞌ qꞌalomal chiꞌiqꞌlax yu leqꞌtiꞌal,
mach chinahatli,
yuto haꞌ mak chiꞌaniko leqꞌtiꞌal,
lanhan issayni kamikal yinh.
7 Haꞌ anma chiwatxꞌen istxꞌojal,
haꞌtikꞌa istxꞌojal chiswatxꞌe tuꞌ chiꞌaqꞌni tanhoj;
yuto mach choche iswatxꞌeꞌ istoholal.
8 Haꞌ tzet chiswatxꞌe anma txꞌoj,
mach toholoj yebꞌ mach kꞌuloj;
yajaꞌ wal tzet chiswatxꞌe anma kꞌul isbꞌeybꞌal kaw toholkanoj.
9 Ekꞌbꞌalto kꞌul waxanhka yul hunu nichꞌan pat ayonh;
sata ta yul hunu niman nha ayonh yebꞌ hunu ix ix howalnhetikꞌa chu.
10 Haꞌ anma txꞌoj, hanhkꞌanhetikꞌa istxꞌojal choche iswatxꞌeꞌ;
matxatikꞌa nino chitzꞌay iskꞌul
iswatxꞌen istxꞌojal yinh yet anmahil.
11 Hayet chiꞌay isyaꞌtajil yibꞌanh hunu mak bꞌuchwawom,
chikuywapaxo ebꞌnaj machi isnabꞌal yintaj.
Wal naj ay isnabꞌal hunelnhe
chihal-lax tet naj kat istxumni naj.
12 Komam tohol tzet chiswatxꞌe
tꞌanhan yinh yatut anma txꞌoj isnabꞌal,
chiyanikanto Komam yinh isyaꞌtajil.
13 Haꞌ mak mach chikam iskꞌul iskolwa yinh anma mebꞌaꞌ,
machi mak chikolwapaxo yinh yet chisqꞌanni kolwal.
14 Haꞌ sabꞌehal chiꞌaqꞌlax yinh ewantajil
chiyaqꞌ tanho ishowal kowiꞌ.
15 Hayet chiwatxꞌelax istoholal,
kaw chitzala anma tohol isbꞌeybꞌal;
wal anma chiwatxꞌen istxꞌojal chixiwkanh.
16 Haꞌ mak chishekꞌilo isbꞌa yul isbꞌehal helanile,
lanhan isto bꞌay ay ej kamom.
17 Haꞌ mak chaqꞌ yubꞌ yanma sunil istxꞌojal choche iskꞌul yebꞌ mak ukꞌunhe chu,
yebꞌ mak loqꞌo perfumenhe chu, haꞌ mak tuꞌ,
chiꞌok mebꞌaꞌil yinh.
18 Haꞌ anma txꞌoj yebꞌ leqꞌtiꞌ
chiꞌaqꞌlax ekꞌoyaꞌ selelo anma tohol
yebꞌ kꞌul isbꞌeybꞌal.
19 Ekꞌbꞌalto kꞌul waxanhka sat txꞌotxꞌ desierto ayonh kochukil,
sata ta chonheh yebꞌ hunu ix ix maywal yebꞌ howalnhetikꞌa chu.
20 Haꞌ yul yatut anma ay isnabꞌal,
kaw ay qꞌalomal yebꞌ perfume;
wal mak machi isnabꞌal chaqꞌ tanho sunil tzet aya.
21 Haꞌ mak tohol isbꞌeybꞌal,
yebꞌ xin chitzꞌay iskꞌul yinh yet anmahil,
chiꞌilcha isqꞌinal yebꞌ istoholal
yebꞌ xin kaw ay yelapno chiꞌelikoj.
22 Haꞌ mak ay isnabꞌal chiqꞌoji naj yinh hunu konhobꞌ kaw tanhebꞌil sikꞌlebꞌil,
kat istanhtzenilo naj yip konhobꞌ bꞌay chikawxi iskꞌul anma tuꞌ.
23 Haꞌ mak kaw chil isbꞌa yinh tzet chala,
machi isyaꞌtajil chitit yibꞌanh.
24 Haꞌ mak kaw chiyikanh isbꞌa,
kaw bꞌuchwawom,
yuxin kaw chinalaxiko istxꞌojal yinh.
25 Haꞌ mak isah, chikam yu yochento tzetaj ye tuꞌ,
yuto mach choche iskꞌul chimunlahi.
26 Kaw txꞌiꞌal tzet choche iskꞌul naj isah chiꞌekꞌ tzꞌayik;
walpaxo mak tohol isbꞌeybꞌal machi oqꞌ yaqꞌni tzet aya.
27 Mach chischah Komam Dios isyebꞌalqꞌabꞌe anma txꞌoj,
yuto mach yinh sunil iskꞌul chaqꞌa.
28 Haꞌ naj testigo leqꞌtiꞌ, chitanhilo naj yu tzet chala;
wal mak kam chabꞌe yinh tzet chihal-lax tet yohta tzet chispajtze.
29 Haꞌ anma txꞌoj, kꞌul yubꞌ chisyeniloj ta kꞌul isbꞌeybꞌal;
wal anma kꞌul isbꞌeybꞌal kꞌulnhetikꞌa chute isbꞌa.
30 Machi hunu helanile,
maka nabꞌale, maka hunu kuybꞌanile chimanhkꞌon tzet choche Komam Dios.
31 Naj aqꞌom howal,
chiswatxꞌekanh naj istzꞌum ischeh
yuto chito naj yinh howal;
yajaꞌ yu Komam Dios yuxin chiqꞌoji naj
yinh mak bꞌay chaqꞌ howal.