20
Haꞌ mak chiꞌukꞌni teꞌ ukꞌekaw bꞌuchwawom yebꞌ xin kaw howal istzan,
haꞌ mak chiꞌukꞌni teꞌ tuꞌ machi isnabꞌal.
2 Haꞌ hunu naj rey kaw how,
lahan naj hakaꞌ hunu noꞌ bꞌalam chiꞌel yaw yu ishowal,
haꞌ mak chiꞌaqꞌnitij ishowal naj tuꞌ, ay ismay iskami.
3 Haꞌ mak chꞌaqꞌni tanho howal,
kaw ay yelapno huneꞌ mak tuꞌ,
wal mak machi isnabꞌal xin, chiꞌahkanh howal yu.
4 Haꞌ yinh istiempohal tꞌoko, mach istꞌok naj isah istxꞌotxꞌ,
yajaꞌ haxa yinh istiempohal hatxꞌo,
choche naj hunu sat istzꞌunubꞌ,
yajaꞌ matzet chiꞌilcha yu naj.
5 Haꞌ tzet kaw yaꞌta istxumlaxiloj,
lahan hakaꞌ ha haꞌ kaw nahat yehayto yich,
yajaꞌ wal mak ay isnabꞌal chitxumchalo yu.
6 Txꞌiꞌal anma tiꞌ chalni, ta kaw kꞌul iskꞌul,
yajaꞌ haywanhnhe mak bꞌay chu iskawxi kokꞌul.
7 Haꞌ mak tohol isbꞌeybꞌal,
yebꞌ iskꞌulalnhe chiswatxꞌe kaw yinh tzalahilal chikankano yuninal yet chikamtoj.
8 Yet chiꞌok tzꞌonhno naj rey yul ischem yu yilni yinh tzet chiꞌeliko tzetaj ye tuꞌ,
hayet chitꞌanhxito naj
chistxumnilo naj istxꞌojal tuꞌ.
9 Machi hunu mak tiꞌ chu yalni hakaꞌ tiꞌ:
«Hanintiꞌan saj wanmahan yebꞌ xin machi inmulan,»
mach xhihoj.
10 Haꞌ malbꞌal yebꞌ txꞌanh txꞌanh mach tzꞌajanoj,
lahan hakaꞌ latzꞌabꞌ chonhaqꞌni aykꞌayoj.
Haꞌ kabꞌebꞌ malbꞌal tuꞌ,
ta mach tzꞌajanoj mach chitzala Komam yinh.
11 Haꞌ tzet chiswatxꞌe hunu naj tzeh,
haꞌ chiꞌaqꞌni kotxumuꞌloj ta haꞌ istoholal chiswatxꞌe naj.
12 Haꞌ kotxikin, chiꞌokniko yu jabꞌeni,
haxa isbꞌaqꞌ kosat chiꞌokniko yu jilni,
haꞌ Komam Dios watxꞌenhenkanoj.
13 Mach wayanhojabꞌ chawu,
haxinwal mach chitit naj mebꞌaꞌil tawibꞌanh;
wal xin ilo hawayanh haxinwal kaw ay tzet chaloh.
14 Haꞌ naj chiloqꞌwi, chal naj hak tiꞌ:
«Haꞌ tzet chatxonh tiꞌ, mach kꞌuloj,» xhi naj.
Hayet chilahwi isloqꞌwikano naj xin chalni naj ta kaw helan naj isloqꞌwi.
15 Haꞌ mak ay isnabꞌal chistxum yinh tzet chala;
haꞌ huneꞌ mak tuꞌ ekꞌbꞌalto yelapno sata chꞌen oro
yebꞌ qꞌalomal ay yul sat yibꞌanhqꞌinal tiꞌ.
16 Haꞌ mak chiyaqꞌ isbꞌa yinh hunu mak mach yohtajoj,
chiꞌilaxilo xil isqꞌap,
yebꞌ xin chikan yinh manhtzetal.
17 Haꞌ tzet chislo chiqꞌ hunu mak yinh leqꞌtiꞌal,
chiyala ta kaw chiꞌ chabꞌe;
yajaꞌ haxa yet tzujanilxa xin lahan hakaꞌta txꞌotxꞌ chislo.
18 Haꞌ tzet chijoche kowatxꞌe chiyij isbꞌa ta kꞌul kuybꞌanile chiꞌaqꞌlax jet.
Chiyu koqꞌoji yinh hunu howal ta kꞌul chu kolahtiꞌnhen kobꞌa.
19 Haꞌ mak halom qꞌumal,
mach yohtajo yebꞌanayo tzet chabꞌe,
yuxin mach chahunbꞌa habꞌa yebꞌ anma halom qꞌumal tuꞌ.
20 Haꞌ mak chistzꞌaktiꞌnhe ismam yebꞌ ismiꞌ,
chitanhilo isqꞌinal hakaꞌ chu istanhilo hunu tzejtah xol qꞌejholoj.
21 Haꞌ mak yinh anhe chiꞌahi, matxa isyaxilal chischah yet islahobꞌal.
22 Haꞌ istxꞌojal chiwatxꞌelax tawinh,
machojabꞌ chapajtze;
wal xin yinhojabꞌ Komam Dios chikawxi hakꞌul,
yuto haꞌ chaxhkolni.
23 Haꞌ malbꞌal mach tzꞌajanoj,
mach chischah iswiꞌ Komam Dios.
24 Haꞌ Komam chonhijbꞌanikꞌo bꞌay chonhekꞌi,
yuxin yul jet kochukil mach johtajo tzet chonhtanhi.
25 Ay ismay ta chijalte hunu tzet tet Komam Dios yinh anhe,
tzujan tuꞌ kat konanonpaxo yibꞌanh tzet chijal tuꞌ.a
26 Haꞌ naj rey ay isnabꞌal,
chishitzilo naj anma txꞌoj yinh,
kat ischejni naj tanhtzelaxiloj.
27 Haꞌ jespíritu aqꞌbꞌil jet yu Komam Dios,
lahan hakaꞌ tzejtah,
haꞌ chiꞌaqꞌni johtanhelo tzet chiꞌekꞌ yul janma hununonh.
28 Niman tiempo chiꞌok hunu naj rey yahawilo konhobꞌ
ta chitzꞌay iskꞌul naj yinh yet anmahil,
yebꞌ ta isyelalnhe chal naj.
29 Haꞌ yip ebꞌnaj tzeh, haꞌ ayko ismayoj;
hakpax tuꞌ ebꞌnaj ichamtaxa
haꞌ sajil xil iswiꞌ ebꞌnaj ayko ismayoj.
30 Haꞌ lahwilal chako noꞌ tzꞌum chiyij anma txꞌoj,
haꞌ chikolwa yinh;
haꞌ isyaꞌtajil chiꞌay yibꞌanh tuꞌ
chiꞌinilo istxꞌojal chiꞌekꞌ yinh yanma.