19
Ekꞌbꞌalto kꞌul waxanhka mebꞌaꞌonh,yajaꞌ tanhe kꞌul kobꞌeybꞌal;
sata ta machi konabꞌal,
yebꞌ xin howalnhetikꞌa chiju.
2 Mach kꞌuloj ta machi konabꞌal yinh hunu tzet ye tuꞌ chikowatxꞌe.
Hayet kaw yinh anhe chikowatxꞌe hunu tzet ye tuꞌ,
mach kꞌulo chiꞌelikoj.
3 Haꞌ issukal anma chiꞌaqꞌni kꞌayoto yinh isbꞌeh,
tzujanxa tuꞌ, kat yaniko ismulo Komam Dios.
4 Haꞌ naj qꞌalom kaw tzetkꞌa anma chiꞌok yamigoho naj;
wal naj mebꞌaꞌ chibꞌejlaxkano naj yu yamigo.
5 Haꞌ naj testigo leqꞌtiꞌ machi ekꞌto yet yay isyaꞌtajil yibꞌanh naj;
hakpax tuꞌ naj leqꞌtiꞌ machi kol-laxilo naj.
6 Haꞌ mak kꞌul iskꞌul chaqꞌni tzet ay tet yet anmahil,
sunil mak chisayni; huneꞌ mak kꞌul iskꞌul tuꞌ chiꞌok yamigoho anma.
7 Chibꞌejlaxkano naj mebꞌaꞌ yu yuxhtaj;
hatokꞌanabꞌ yamigo naj tuꞌ mach chibꞌejnipaxkanoj.
8 Haꞌ mak chiswatxꞌe tzet chiꞌaqꞌlax iskuyuꞌ,
haꞌ huneꞌ mak tuꞌ chiꞌahi,
yebꞌ xin chiyaqꞌ ilnhe isbꞌa.
9 Naj testigo mach yelo chala, machi ekꞌto yay isyaꞌtajil yibꞌanh naj.
Hakpax tuꞌ mak leqꞌtiꞌ chitit kamikal yibꞌanh.
10 Haꞌ mak mach isnabꞌal mach chu yaqꞌni tzalaho iskꞌul yinh iskꞌulal;
hakpax tuꞌ naj chejabꞌ, mach chu yok naj yahawo yinh ebꞌnaj yahaw kaw ay yelapnoj.
11 Haꞌ mak ay isnabꞌal chaqꞌ tanho ishowal iswiꞌ.
Haꞌ mak chisnahulnheto istxꞌojal chiwatxꞌelax jinh,
kaw ay yelapno huneꞌ mak tuꞌ.
12 Hayet chitit ishowal hunu naj rey,
lahan hakaꞌ yet chiꞌel yaw noꞌ bꞌalam;
walpaxo iskꞌulal iskꞌul naj rey xin,
lahan hakaꞌ yal chew chiꞌay yibꞌanh telaj.
13 Naj kꞌahole mach isnabꞌal, chaqꞌ ekꞌoyaꞌ naj ismam.
Hakaꞌ hunu tzꞌu chiꞌok yul nha, hak tuꞌ ix ixale
howalnhetikꞌa chu yinh yichamil.
14 Haꞌ tet naj mame chischah naj kꞌahole yatut yebꞌ qꞌalomal.
Haꞌ ebꞌix ixale ay isnabꞌal,
haꞌ Komam Dios chisahni ebꞌix tet yichamil.
15 Naj isah, kaw wayanhnhetikꞌa chu naj yu isahil,
yuxin chiyaqꞌle naj isyaꞌtajil wahil.
16 Haꞌ mak chisyije chejbꞌanile chiskꞌubꞌa iskawil;
haꞌ mak mach chabꞌeto iskuybꞌanil Komam Dios chitit kamikal yinh.
17 Hayet chijaqꞌni kꞌamil tet anma mebꞌaꞌ,
lahan hakaꞌ tet Komam Dios chijaqꞌ kꞌamil tuꞌ;
haꞌ xin Komam chiꞌaqꞌni ispaj selel jet.
18 Kuywe heyuninal, yaqꞌ isbꞌa chito yaqꞌ kuyuꞌ isbꞌa;
yajaꞌ mach cheyaqꞌkamo yu hehateni.
19 Haꞌ mak kaw echo istit ishowal,
ay isyaꞌtajil chitit yibꞌanh;
yajaꞌ ta chikokolilo yul isqꞌabꞌ isyaꞌtajil tuꞌ,
ekꞌbꞌalto txꞌoj chiꞌelikoj.
20 Haꞌ mak chishajbꞌa istxikin yabꞌen kuybꞌanile yebꞌ mak chiꞌabꞌen yet chikachlaxi,
haꞌ huneꞌ mak tuꞌ kaw chiyiqꞌ ishelanil.
21 Tzetkꞌa tzet choche naj winaj iswatxꞌeꞌ,
yajaꞌ kachannhe haꞌ tzet chiyal Komam haꞌ chiyij isbꞌa.
22 Haꞌ tzet chijoche yinh hunu mak, haꞌ ton istzꞌaj iskꞌul yinh yet anmahil.
Ekꞌbꞌalto kꞌul waxanhka mebꞌaꞌ hunu maka sata ta leqꞌtiꞌ.
23 Hayet chonhxiw tet Komam Dios, chonhyito yinh qꞌinale, chaqꞌni aqꞌankꞌulal yul janma;
machi xin isyaꞌtajil chihul jibꞌanh.
24 Naj isah, hayet chiwaꞌ naj
chayto naj yiximal isqꞌabꞌ yul issekꞌ,
yajaꞌ isah naj yanikto yul istiꞌ.
25 Hayet chiyilni naj machi isnabꞌal yijni yet sukal,
chistxum isbꞌa iskꞌul naj;
yajaꞌ wal naj ay isnabꞌal hunelnhe chihal-lax tet naj, kat iskuycha naj.
26 Haꞌ mak chiꞌelqꞌan tzet ay ismam,
kat istzumbꞌenilo ismiꞌ yul yatut;
hunteqꞌan tuꞌ kaw txꞌixobꞌal,
yebꞌ xin mach yeto ebꞌnaj uninale iswatxꞌeni.
27 Hach inkꞌahol ta chabꞌej hawabꞌento kachbꞌanile,
chal yelapnoj ta lanhan habꞌejnikano kuybꞌanile kaw kꞌul.
28 Haꞌ naj testigo leqꞌtiꞌ,
chibꞌuchwa naj yinh istoholal.
Haꞌ anma txꞌoj isnabꞌal
istxꞌojalnhetikꞌa chiꞌelti yul istiꞌ.
29 Kꞌulxa ye isyaꞌtajil chiꞌay yibꞌanh mak machi isnabꞌal,
watxꞌebꞌilpaxo tzꞌum chiꞌayto yinh yichinh mak wiꞌe chute isbꞌa.