18
Haꞌ mak ekꞌnaj, yinhnhe tzet choche bꞌay ayko isnabꞌal;tzijxanhe munil bꞌay chato isbꞌa.
2 Haꞌ mak machi isnabꞌal mach choche yiqꞌaꞌ ishelanil;
wal xin haꞌ tzet yohtaj haꞌ chala.
3 Haꞌ mak chiwatxꞌen istxꞌojal
chiꞌok yinh txꞌixwilal.
Haꞌ mak kaw chiyikanh isbꞌa chiꞌilaxilo ispixan.
4 Haꞌ tzet chiꞌelti yul istiꞌ ebꞌnaj winaj,
lahan hakaꞌ ha haꞌ nime yich;
haxa ishelanil ebꞌnaj,
lahan hakaꞌ ha haꞌ chibꞌelwikꞌoj yebꞌ chimaliloj.
5 Kaw mach kꞌuloj ta chitzꞌay iskꞌul naj juez yinh mak ay ismul,
yebꞌ ta mach chabꞌeto naj tzet chal mak machi ismul.
6 Yu istiꞌ mak machi isnabꞌal chiyato isbꞌa xol howal;
haꞌ tzet chala haꞌ chiꞌiniti tzꞌum yibꞌanh.
7 Haꞌtikꞌa tzet chal mak machi isnabꞌal chitanhtzeniloj;
haꞌ tzet chala chimeltzoko latzꞌabꞌil yinh.
8 Haꞌ naj hobꞌom tzotiꞌ, kaw saqꞌal istzoteli chiꞌay kokꞌul yu,
haꞌ tzet chiyal tuꞌ chijabꞌe yapni yinh janma.
9 Naj isah yebꞌ naj chiꞌetanto tzet ye tuꞌ chiyuxhtanhe isbꞌa ebꞌnaj.
10 Haꞌ isbꞌi Komam Jahawil, lahan hakaꞌ hunu nha kaw nahat yekanh kaw ay yip;
haꞌ tuꞌ chiskol isbꞌa makta tohol isbꞌeybꞌal.
11 Haꞌ ebꞌnaj qꞌalom, chal ebꞌnaj ta lahan isqꞌalomal tuꞌ,
hakaꞌ hunu konhobꞌ hoyaniko iskꞌubꞌal
kaw nahat yekanh istel iskꞌubꞌal tuꞌ.
12 Haꞌ mak chiyikanh isbꞌa,
haxa yinh istzujanilxa chikan yinh txꞌixwilal;
haxa mak chiyiyo isbꞌa,
haxa yinh istzujanilxa chiꞌalaxiko ismay.
13 Haꞌ mak maxhto kaw chabꞌe tzet chihal-lax tet,
kat ispajtzennahi,
haꞌ huneꞌ mak tuꞌ machi isnabꞌal yebꞌ xin chiꞌel ispixan.
14 Haꞌ mak yaꞌay chaqꞌ techaho yabꞌil yu yip yanma;
wal mak machi yip yanma xin mach chaqꞌ techahoj.
15 Haꞌ mak ay isnabꞌal chiyiqꞌ ishelanil,
haxa istxikin chiyoche yabꞌeꞌ kuybꞌanile.
16 Sabꞌehal chijaqꞌa chihajlax pulta kosataj,
kat japni sata ebꞌnaj kaw ay yelapnoj.
17 Haꞌ mak bꞌabꞌel chiskolna isbꞌa
chalni ta machi ismul yinh hunu howal yaqꞌ yebꞌ yet anmahil,
kochnhe haꞌ yeko chijabꞌe,
yajaꞌ haꞌ to yet chijabꞌen tzet chal mak bꞌay yaqꞌ howal tuꞌ
kat johtanheniloj ta tonhe chala.
18 Hayet chalni Komam Dios yinh suertehal yinh tzet chiꞌeliko hunu isyaꞌtajil,
chitanhayo howal, kat ispohni xol mak chiyaqꞌ howal tuꞌ.
19 Haꞌ mak chiꞌaqꞌni tako iskꞌul hunu yuxhtaj,
matxa chiꞌay iskꞌul yuxhta tuꞌ yu;
lahan hakaꞌ hunu konhobꞌ hoyaniko iskꞌubꞌal, mach chonhqꞌoji yinh.
Ta yuxhta isbꞌa, kat yaqꞌni howal, haꞌ howal tuꞌ chipohni xol,
lahan hakaꞌ istxayibꞌal ispultahil hunu palacio.
20 Haꞌtikꞌa tzet chijala, haꞌ chiꞌiniti isyaꞌtajil,
maka tzalahilal jinh.
21 Haꞌtikꞌa tzet chijala,
haꞌ chiꞌiniti qꞌinale maka kamikal jinh.
Haꞌ mak echo istzoteli,
haꞌtikꞌa chitohlan tzet chal tuꞌ.
22 Haꞌ mak chiyiqꞌ yixal, chiꞌilcha iskꞌulal yu;
lanhan ischahni iskꞌulchꞌanil iskꞌul Komam Dios yinh.
23 Hayet chitzotel anma mebꞌaꞌ kaw chiꞌay sat;
wal yet chitzotel anma qꞌalom kaw loloꞌ istzoteli.
24 Ay mak tiꞌ kaw yamigo isbꞌa, yajaꞌ kaw yinh anhe chiꞌok howal xol;
yajaꞌ ay amigo tiꞌ kaw ekꞌbꞌalto kꞌul iskꞌul sata hunu juxhtaj.