17
Ekꞌbꞌalto kꞌul waxanhka wonhkꞌoxnhe chikokꞌuxu,tanhe aqꞌankꞌulal jehi,
sata ta naunhe chijekꞌtze qꞌinh jatut
howalnhetikꞌa xin jehi.
2 Naj chejabꞌ ay isnabꞌal
chiꞌok naj yahawo yinh naj kꞌahole machi isnabꞌal,
kat xin ischahnipaxo naj chejabꞌ tuꞌ
ismajul yinta ebꞌnaj yuxhta naj kꞌahole tuꞌ.
3 Chꞌen oro yebꞌ chꞌen plata chinhuslax chꞌen yul qꞌaꞌ,
yunhe yilwelaxi ta kꞌul chꞌen;
hak tuꞌ chu yilwen Komam isnabꞌal anma.a
4 Haꞌ anma txꞌoj isnabꞌal chiyabꞌeto tzotiꞌ txꞌoj,
haxa anma leqꞌtiꞌ chiyabꞌeto leqꞌtiꞌal.
5 Haꞌ mak chibꞌuchni anma mebꞌaꞌ,
haꞌ yinh Komam Dios watxꞌen anma mebꞌaꞌ tuꞌ
chibꞌuchwahi.
Haꞌ mak chitzala yinh isyaꞌtajil
chihul yibꞌanh anma mebꞌaꞌ tuꞌ,
machi ekꞌto yet yay isyaꞌtajil yibꞌanh.
6 Ebꞌnaj icham winaj,
haꞌ yuninal yuninal ebꞌnaj ayko ismayoj.
Haꞌ ebꞌnaj uninale,
haꞌ ismam yebꞌ ismiꞌ ebꞌnaj ayko ismayoj.
7 Haꞌ mak machi isnabꞌal,
mach yeto ay yalni helanile;
hakpax tuꞌ anma kaw ay yelapnoj,
mach yeto ay yalni leqꞌtiꞌal.
8 Haꞌ mak chꞌaniko leqꞌtiꞌal,
kaw ay chalilo leqꞌtiꞌal tuꞌ yul sat;
bꞌayxanhetuꞌwal chiꞌekꞌi chiyiqꞌ tzet choche.
9 Haꞌ mak chisnahulnheto tzet chiꞌutelaxi,
chiyoche aqꞌankꞌulal;
wal mach chiyalikꞌo tzet chiꞌutelaxi tuꞌ,
chibꞌejlaxkano yu yet anmahil.
10 Hayet chikachlax mak ay isnabꞌal chitxumchalo yu;
wal anma machi isnabꞌal
waxanhka chiꞌalaxayto 100 (hokꞌal) el tzꞌum yinh, maxhtikꞌa chabꞌe.
11 Haꞌ mak txꞌoj yanma hanhkꞌanhetikꞌa howal istzan,
yajaꞌ chiꞌapno isqꞌumalil isyaꞌtajil tet.
12 Subꞌuta kochahni kobꞌa yebꞌ hunu noꞌ miꞌe oso
xaꞌelqꞌalaxto yunin,
sata kochahni kobꞌa yebꞌ hunu mak machi isnabꞌal,
kaw hinan iswatxꞌen istxꞌojal.
13 Machi bꞌaqꞌinhal chihitzilo isyaꞌtajil
yul yatut mak chiꞌaqꞌni istxꞌojal ispajo iskꞌulal.
14 Haꞌ howal chiꞌichelaxi,
lahan hakaꞌ haꞌ nime haꞌ chihajchalaxiltoj;
yuxin ekꞌbꞌalto kꞌul kohitzilo yinh sata janito kobꞌa xol.
15 Ta chiꞌaqꞌlax nimankꞌulal yinh mak ay ismul
kat yalaxayo isyaꞌtajil yibꞌanh mak machi ismul;
haꞌ kabꞌ majan tuꞌ,
mach chischah isbꞌa.
16 Waxanhka choche naj machi isnabꞌal
isloqꞌoꞌ helanile yu ismelyu;
yajaꞌ ¿tzet chiꞌokniko helanile tuꞌ yu naj
ta machi isnabꞌal naj?
17 Haꞌ naj amigo kꞌulnhetikꞌa iskꞌul naj;
haxa yinh istzꞌayikal isyaꞌtajil lahan naj hakaꞌ hunu juxhtaj.
18 Haꞌ mak mach isnabꞌal
chaqꞌ isbꞌa yinh yamigo,
chanikanikto isbꞌa yalanh kꞌas.
19 Haꞌ mak choche yaqꞌaꞌ tako iskꞌul anma,
chochepaxo yaqꞌaꞌ howal.
Haꞌ mak kaw loloꞌ chute isbꞌa
haꞌtikꞌa chetato isbꞌa.
20 Haꞌ mak txꞌoj isnabꞌal, maxhtikꞌa bꞌaqꞌinh chischah iskꞌulal.
Haꞌ mak kabꞌ sat yet chitzoteli chiꞌaykꞌay yul isqꞌabꞌ huchan.
21 Haꞌ naj mame ay iskꞌahol
machi isnabꞌal yebꞌ kaw lutꞌ,
hanhkꞌanhe isyaꞌtajil yebꞌ bꞌiskꞌulal chischah naj yu iskꞌahol tuꞌ.
22 Haꞌ tzalahilal yul janma,
lahan hakaꞌ hunu anh chikolwa jinh;
wal mak bꞌiskꞌulalnhetikꞌa ye yanma nixhtejal ispax yip.
23 Haꞌ mak chichahni chꞌen melyu elqꞌabꞌil yinh ewantajil,
lanhan yetanto isbꞌehal istoholal.
24 Haꞌ mak ay isnabꞌal
haꞌ helanile chistzumbꞌekꞌoj;
wal mak machi isnabꞌal
matzet chistzumbꞌekꞌoj.
25 Haꞌ naj kꞌahole mach isnabꞌal,
kaw ischibꞌal iskꞌul ismam naj yehi,
chaqꞌnipaxo naj bꞌiskꞌulal tet ismiꞌ.
26 Haꞌ mak machi ismul,
mach kꞌulo yilaxilo ismulta.
Hakpax tuꞌ mak kꞌul isbꞌeybꞌal, mach kꞌulo yijni tzꞌum.
27 Haꞌ mak ay isnabꞌal mach kaw chitzoteli;
haꞌ mak chistxum tzet chala ay isnabꞌal.
28 Ta tonhe tukan hunu naj machi isnabꞌal,
matzet xin chal naj,
chimhal-laxpaxoj ta ay ishelanil naj.