Tzotiꞌ yibꞌanhilo kokawil yebꞌ kobꞌeybꞌal
16
Hanhonh tiꞌ, chijal tzet chijoche kowatxꞌeꞌ,yajaꞌ kachannhe Komam Dios ohtanhe tzet chonhelikoj.
2 Haꞌ yul jet, sunil tzet chikowatxꞌe kaw kꞌul,
yajaꞌ wal Komam yohta tzet chiꞌekꞌ yinh konabꞌal.
3 Sunil tzet chijoche kowatxꞌeꞌ yilal jabꞌenhento yul isqꞌabꞌ Komam,
haxinwal chiyij isbꞌa tzet chijoche tuꞌ.
4 Sunil tzet aya, haꞌ Komam Dios watxꞌenheni,
yohta xin Komam tzet yinh iswatxꞌe hunun tuꞌ.
Hakpax tuꞌ anma txꞌoj isbꞌeybꞌal,
watxꞌebꞌil yu istokano yinh isyaꞌtajil.
5 Haꞌ mak kaw chiyikanh isbꞌa,
mach chitzala Komam yinh,
yuxin machi ekꞌto yet yalaxayo isyaꞌtajil yibꞌanh yu Komam.
6 Hayet chikokachni hunu naj mulum,
yilal istzꞌay kokꞌul yinh,
kat jalni isyelal tet.
Hayet chonhxiw tet Komam Dios,
chikopohilo kobꞌa yinh istxꞌojal.
7 Hayet chitzala Komam yinh isbꞌeybꞌal hunu maka,
chako Komam yinh aqꞌankꞌulal yebꞌ makta ayko ishowal yinh.
8 Ekꞌbꞌalto kꞌul hanikꞌnhe tzet ayonh,
yajaꞌ tanhe yinh istoholal chijiqꞌa;
yajaꞌ sata ta qꞌalomonh yajaꞌ yu janiko leqꞌtiꞌal.
9 Hanhonh tiꞌ chikonah tzet chijoche kowatxꞌeꞌ,
yajaꞌ haꞌ Komam Dios chihalni ta chij isbꞌa.
10 Haꞌ naj rey, ischejabꞌ Komam Dios ye naj,
yuxin mach chu iswatxꞌen naj tzetaj ye tuꞌ mach toholoj.
11 Haꞌ malbꞌal kaw tzꞌajan,
yet Komam Dios yehi,
yuto haꞌ Komam hanhekano malbꞌal tuꞌ.
12 Ebꞌnaj rey, mach tonhe chil ebꞌnaj tzet mach kꞌuloj;
yuto haꞌ ischejbꞌanil ebꞌnaj,
haꞌ ton iswatxꞌen ebꞌnaj istoholal.
13 Ebꞌnaj rey kaw xahan chil ebꞌnaj anma kaw kꞌul isbꞌeybꞌal
yebꞌ xin isyelalnhe chala;
kat istzalapaxo ebꞌnaj yinh.
14 Hayet chitit ishowal naj rey,
ay ismay istit kamikal yinh mak bꞌay chitit ishowal tuꞌ;
yajaꞌ haꞌ mak chꞌaqꞌni tanho ishowal tuꞌ, kaw ay isnabꞌal.
15 Hayet chitzala naj rey lahan hakaꞌ chihal-lax qꞌinale;
haxa iskꞌulal iskꞌul naj, lahan hakaꞌ haꞌ nhabꞌ.
16 Ekꞌbꞌalto kꞌul jiqꞌni kohelanil sata jiqꞌni chꞌen oro;
yebꞌ ekꞌbꞌalto kꞌul ta ay konabꞌal sat jiqꞌni chꞌen plata.
17 Haꞌ anma tohol isbꞌeybꞌal,
chispohilo isbꞌa yinh anma txꞌoj.
Hayet kaw chijil yinh tzet chikowatxꞌe
hanhhunonh xin lanhan kotanhen kobꞌa.
18 Haꞌ mak kaw loloꞌ chiyute isbꞌa chitanhiloj,
haꞌ mak kaw chiyikanh isbꞌa chiꞌaykꞌayi.
19 Ekꞌbꞌalto kꞌul chewchotanhe chijute kobꞌa, iskꞌatanh anma chewchotanhe;
sata kopohnikanh qꞌalomal yinta ebꞌnaj chiyikanh isbꞌa.
20 Haꞌ mak chiyabꞌeto kuybꞌanile kꞌul, kꞌul chila.
Saqꞌal yet mak yinh Komam Dios chikawxi iskꞌul.
21 Haꞌ mak kꞌul istxumni chihal-laxi ta ay isnabꞌal.
Haꞌ tzotiꞌ kꞌul, yoki chiꞌay iskꞌul anma yu.
22 Hakaꞌ haꞌ haꞌ chiꞌaqꞌni qꞌinale, hak tuꞌ isnabꞌal mak ay ishelanil.
Haꞌ mak chikachni anma machi isnabꞌal, haꞌ hun suk chute isbꞌa.
23 Haꞌ mak kꞌul istxumni, kꞌul istzoteli, haꞌ tzet chal tuꞌ chiꞌay kokꞌul yu.
24 Haꞌ tzotiꞌ kꞌul yoki lahan ischiꞌal hakaꞌ ischiꞌal iskabꞌil noꞌ ajan;
hunteqꞌan tzotiꞌ tuꞌ, chiꞌaqꞌlo iskꞌul anma yabꞌeni, chaqꞌnipaxo yip yanma.
25 Ay bꞌeh tiꞌ kochnhe kaw kꞌul jalni,
yajaꞌ haxa yinh islahobꞌal chonhyito yinh kamikal.
26 Haꞌ mak ay tzet choche, haꞌ tzet choche tuꞌ chiꞌiptzen ismunlahi.
27 Haꞌ anma txꞌoj, chisayikꞌo istxꞌojal;
haꞌ tzet chala, lahan hakaꞌ xaj qꞌa qꞌaꞌ.
28 Haꞌ mak txꞌoj isnabꞌal chiyicheko howal;
haxa mak halom qꞌumal chako howal xol yet anmahil.
29 Haꞌ anma txꞌoj isnabꞌal chaqꞌ subꞌchaho yet anmahil,
kat yinikanto yinh isbꞌehal istxꞌojal,
30 yet chisnani iswatxꞌen istxꞌojal chimutzꞌla issat;
wal mak xayanako ismul yinh istxꞌojal xaꞌiswatxꞌe, chiskach istiꞌ.
31 Haꞌ mak sajxa xil iswiꞌ,
lahan hakaꞌta corona ayahto yinh iswiꞌ;
haꞌ tuꞌ chiqꞌa yuto kꞌul isbꞌeybꞌal.a
32 Ekꞌbꞌalto kꞌul mach anhe chitit kohowal,
sata ta kaw winajonh jalni.
Ekꞌbꞌalto kꞌul koqꞌoji jinh
kochachni kobꞌa yinh istxꞌojal,
sata ta koqꞌoji yinh konhobꞌ.
33 Hanhonh chijilwe jinhbꞌal,
yajaꞌ haꞌ Komam chihalni tzet chonhelikoj.