15
Haꞌ ispaj tzotiꞌ labꞌan yoki,chisbꞌuttanho howal;
wal ispaj tzotiꞌ how yoki chiꞌahkanh howal yu.
2 Haꞌ yul istiꞌ anma ay isnabꞌal chiꞌelti helanile;
wal anma machi isnabꞌal
haꞌ sukal chiꞌelti yul istiꞌ.
3 Sunil yul sat yibꞌanhqꞌinal tiꞌ bꞌay tꞌanhan Komam Dios,
chilni Komam anma kꞌul yebꞌ anma txꞌoj.
4 Haꞌ mak kꞌul istzoteli
lahan hakaꞌ qꞌebꞌtaj chiyaqꞌ qꞌinale;
wal mak txꞌoj chiꞌelti yul istiꞌ, chetato janma.
5 Haꞌ mak machi isnabꞌal,
mach choche chikuylax yu ismam;
wal mak chiyabꞌe tzet chal ismam ay isnabꞌal.
6 Kaw txꞌiꞌal tzet ay yul yatut anma kꞌul isbꞌeybꞌal;
wal anma txꞌoj, bꞌiskꞌulal chaqꞌ tet yinh tzet chiqꞌa.
7 Haꞌ ebꞌnaj ay isnabꞌal
chispujbꞌakꞌo ebꞌnaj helanile;
wal ebꞌnaj machi isnabꞌal haꞌ istxꞌojal chiꞌekꞌ yinh yanma ebꞌnaj.
8 Mach chischah Komam Dios isxahanbꞌal anma txꞌoj;
wal anma kꞌul isbꞌeybꞌal chabꞌe Komam istxah.
9 Mach choche Komam yilaꞌ isbꞌeybꞌal anma txꞌoj;
yajaꞌ wal mak tohol isbꞌeybꞌal kaw chitzala Komam yinh.
10 Haꞌ mak chibꞌejnikano bꞌeybꞌale kꞌul,
kaw how chu iskuylaxi.
Haꞌ mak mach chabꞌe yet chikachlaxi, chikami.
11 Hakaꞌ yohtanhen Komam Dios naj kamikal yebꞌ bꞌay ay kambꞌal,
hak tuꞌ yohtanhen Komam tzet chiꞌekꞌ yinh isnabꞌal anma.
12 Haꞌ mak bꞌuchwawom,
mach choche yilaꞌ mak chikachni;
yebꞌ xin mach choche ishunbꞌa isbꞌa yebꞌ anma ay isnabꞌal.
13 Haꞌ mak chitzala iskꞌul, chitzala issat;
haxa mak bꞌiskꞌulal yehi bꞌiskꞌulal yilni.
14 Haꞌ mak ay isnabꞌal,
haꞌ helanile chissayikꞌoj;
wal mak machi isnabꞌal hanhkꞌanhe sukal chala.
15 Haꞌ mak bꞌiskꞌulal yehi,
kaw yaꞌtanhetikꞌa sunil tzꞌayik yul sat;
wal mak chitzalahi,
tzalahilalnhetikꞌa ye sunilbꞌal tiempo.
16 Kaw kꞌul jet makonh chijiyo kobꞌa tet Komam Dios,
waxanhka mebꞌaꞌonh;
sata ta qꞌalomonh
yajaꞌ machi aqꞌankꞌulal yul janma.
17 Ekꞌbꞌalto kꞌul waxanhka itahnhe chikolo,
yajaꞌ xahan chijil kobꞌa;
sata ta chibꞌenhe chikokꞌuxu yajaꞌ howal jepaxoj.
18 Haꞌ mak kaw yinh anhe chitit ishowal chiꞌah howal yu;
wal mak niman iskꞌul chisbꞌuttanho howal.
19 Kaw aynhetikꞌa teꞌ txꞌix yul bꞌeh yalni naj isah;
wal yul sat naj tohol isbꞌeybꞌa kaw nimajal sat bꞌeh
yebꞌ xin machi isyaꞌtajil.
20 Haꞌ naj kꞌahole ay isnabꞌal chaqꞌ tzalaho naj iskꞌul ismam;
wal naj machi isnabꞌal xin chisyah naj ismiꞌ.
21 Naj machi isnabꞌal
chitzala naj yinh issukal chiswatxꞌe;
wal naj ay isnabꞌal
chiswatxꞌeko isbꞌa naj yinh istoholal.
22 Haꞌ mak mach chiqꞌambꞌen yinh hunu tzet choche iswatxꞌe,
mach kꞌulo chiꞌeliko tzet choche tuꞌ;
waltaka txꞌiꞌal mak chihalni tet,
yinh tzet wal yuten isbꞌa, wal tuꞌ kꞌul chiꞌeliko tzet choche tuꞌ.
23 Kaw saqꞌal yet chijaqꞌni ispaj hunu qꞌambꞌebꞌal;
kaw xin ekꞌbꞌalto kꞌul
yet chiꞌokniko ispaj qꞌambꞌebꞌal tuꞌ.
24 Haꞌ isbꞌehal qꞌinale yul sat anma ay isnabꞌal, to yahi;
yuxin mach chiꞌaykanto huneꞌ mak tuꞌ yul kambꞌal.
25 Haꞌ Komam Dios
chitanhtzenilo tzet ay anma kaw loloꞌ chute isbꞌa;
wal tzet ay ebꞌix hunix aynhetikꞌa yu Komam.
26 Mach choche Komam tzetaj chisnah anma txꞌoj;
yajaꞌ wal tzotiꞌ chal ebꞌnaj mach istxꞌojal yinh,
kaw chitzala Komam.
27 Haꞌ mak chocheko tzet ay yet anmahil,
chitanhilo tzet aya;
wal mak mach chiꞌocheniko eleqꞌ,
chinahatli yul sat yibꞌanhqꞌinal tiꞌ.
28 Haꞌ mak ay isnabꞌal chistxum yinh tzet chala;
wal anma txꞌoj,
haꞌ istxꞌojal chiꞌahti yul istiꞌ.
29 Chihitzilo Komam yinh anma txꞌoj;
wal anma tohol isbꞌeybꞌal chabꞌe Komam istxah.
30 Haꞌ mak chitzala issat, chitzala kokꞌul yu;
haꞌ kꞌul-la tzotiꞌ chihal-lax jabꞌeꞌ chako yip janma.
31 Haꞌ mak chꞌabꞌento kachbꞌanile yunhe ay iskawil,
chiꞌeh xol anma ay isnabꞌal.
32 Haꞌ mak mach chischah yabꞌeꞌ kachbꞌanile,
mach chaqꞌ ilnhe isbꞌa;
wal mak chischah yabꞌeꞌ kachbꞌanile tuꞌ
chischah helanile.
33 Hayet chonhxiw tet Komam Dios chijiqꞌ kohelanil;
ta chijoche chiꞌalaxiko komay,
yilal jinayo kobꞌa bꞌabꞌel.