14
Haꞌ ix ix ay isnabꞌal, chil ix yatut,wal ix machi isnabꞌal, haꞌtikꞌa kaw ix chiꞌetanto yatut.
2 Haꞌ mak tohol isbꞌeybꞌal kaw ay yelapno Komam Dios yul sat;
wal anma txꞌoj isbꞌeybꞌal chiyahwa yinh Komam.
3 Haꞌ mak machi isnabꞌal,
chismaynhen isbꞌa yinh tzet chiyala,
chiꞌay isyaꞌtajil yibꞌanh,
wal tzet chiyal anma ay isnabꞌal, haꞌ chikolni.
4 Ta machi noꞌ wakax, machi ixim trigo yul kꞌunha;
haꞌ ton yu yip noꞌ wakax tuꞌ,
yuxin niman ixim chijiqꞌa.
5 Haꞌ naj testigo yel chala,
machi leqꞌtiꞌal chako naj;
wal naj testigo leqꞌtiꞌ, leqꞌtiꞌal chal naj.
6 Haꞌ mak bꞌuchwawom, chissay helanile yalni,
yajaꞌ machi ilchalo yu;
yajaꞌ wal mak ay isnabꞌal subꞌuta yilchalo yu.
7 Hitzanhilo iskꞌatanh naj machi isnabꞌal yuto machi helanile chiꞌelti yul istiꞌ naj wal hakuyni.
8 Haꞌ mak ay isnabꞌal,
haꞌtikꞌa ishelanil tuꞌ chiꞌaqꞌni yohtanhelo tzet chiswatxꞌe;
wal mak mach isnabꞌal haꞌtikꞌa issukal tuꞌ chiꞌaqꞌni subꞌchahoj.
9 Ebꞌnaj machi isnabꞌal chitzebꞌi ebꞌnaj yinh ismul chakoj;
yajaꞌ wal xol anma tohol isbꞌeybꞌal
chistxum isbꞌa iskꞌul yinh tzet chiswatxꞌe.
10 Hunun mak yohta isbꞌiskꞌulal yebꞌ istzalahilal yul yanma;
wal hunuxa komon anma mach yohtajoj.
11 Haꞌ tzet ay anma txꞌoj chiswatxꞌe chitanhiloj;
wal tzet ay anma kꞌul isbꞌeybꞌal chꞌahi.
12 Ay bꞌeh tiꞌ kaw kꞌul chijute kotxumni,
yajaꞌ toꞌan yinh kamikal chonhyitoj.
13 Ay tzꞌayik ay tzet yaꞌ ju,
yajaꞌ chonhtzebꞌi yunhe mach chikoyeloj;
haꞌ xol tzalahilal tuꞌ aypaxo kobꞌiskꞌulal.
14 Haꞌ mak machi isnabꞌal,
kaw chitzala yinh issukal chiswatxꞌe;
haxa mak kꞌul isbꞌeybꞌal chitzala yinh istoholal chiswatxꞌe.
15 Haꞌ mak machi isnabꞌal,
sunil tzet chihal-lax tet sunil chiyako yinh iskꞌul;
wal mak ay isnabꞌal xin kaw chiyil bꞌay chiꞌekꞌi.
16 Haꞌ mak ay isnabꞌal chispohilo isbꞌa yinh istxꞌojal;
wal mak machi isnabꞌal machi yok yinh yebꞌ matzet chal iskꞌul.
17 Haꞌ mak kaw yinh anhe chitit ishowal,
kaw ay il chakoj;
wal mak kaw chistxum yinh tzet chiswatxꞌe kaw ay isnimanil iskꞌul.
18 Haꞌ mak machi isnabꞌal,
haꞌ issukal chiꞌaqꞌlax tet yuto machi isnabꞌal;
wal mak ay isnabꞌal chipalkꞌonkanh ishelanil tuꞌ.
19 Haꞌ anma txꞌoj isbꞌeybꞌal chiꞌay nohno sata anma tohol isbꞌeybꞌal;
haꞌ anma mak kꞌuloj chiꞌayo sat, sata ispultahil anma tohol isbꞌeybꞌal.
20 Haꞌ anma mebꞌaꞌ chiyahlax yu yet anmahil;
wal anma qꞌalom chipalkꞌon mak chiꞌocheni.
21 Haꞌ mak chiyahni yet anmahil chako ismul;
yajaꞌ wal mak chitzꞌay iskꞌul yinh anma mebꞌaꞌ kaw saqꞌal yet.
22 Haꞌ mak hanhe istxꞌojal chiꞌekꞌ yinh isnabꞌal chikꞌayto yul bꞌeh bꞌay aykoj;
wal mak chiwatxꞌen iskꞌulal chiꞌilchalo iskꞌulal yebꞌ isyelal yu.
23 Haꞌ mak kaw chiꞌekꞌyaꞌ ismunlahi,
kaw ay tzet chaqꞌ tet;
wal mak tzotenhelo chu xin,
chitit mebꞌaꞌil yinh.
24 Haꞌ mak ay isnabꞌal chiꞌilaxkanh yu ishelanil tuꞌ;
wal mak machi isnabꞌal chihal-lax sukal yu istxꞌojal iswiꞌ.
25 Haꞌ naj testigo yel chala chiskolilo naj yet anmahil;
wal naj leqꞌtiꞌ chito naj yet anmahil yinh leqꞌtiꞌal.
26 Kaw tꞌinhan yeko yinh bꞌay chikawxi kokꞌul
ta chijiyo kobꞌa tet Komam Dios;
yinhtikꞌa tzet ayko yipo kokꞌul tuꞌ chiskolpaxo isbꞌa juninal.
27 Hayet chijinayo kobꞌa sata Komam Dios chaqꞌ qꞌinale jet,
kat konhiskolnilo yul isqꞌabꞌ kamikal.
28 Ta ay hunu naj rey ayko yahawilal yibꞌanh txꞌiꞌal anma
kaw niman chalilo tuꞌ;
yajaꞌ ta hanikꞌnhe anma xin lanhan istanhilo naj chal tuꞌ.a
29 Haꞌ mak kaw ay isnimankꞌulal,
kaw ay isnabꞌal huneꞌ mak tuꞌ;
wal mak machi isnimankꞌulal chisyeloj ta kaw machi isnabꞌal.
30 Ta aqꞌankꞌulalnhe jehi,
chaqꞌ qꞌinale tet konimanil;
wal ta chichiwa kokꞌul xin, chiskꞌuxto kobꞌajil.
31 Haꞌ mak chiꞌetan anma mebꞌaꞌ,
chaqꞌ tako iskꞌul Komam Dios;
wal mak chitzꞌay iskꞌul yinh anma mebꞌaꞌ xin
chiyaqꞌ tzalaho iskꞌul Komam.
32 Haꞌ anma txꞌoj,
haꞌtikꞌa istxꞌojal chiswatxꞌe tuꞌ haꞌ chitanhtzeniloj;
wal yet chikam anma kꞌul isbꞌeybꞌal
ay tzet ayko yipo yanma.
33 Haꞌ mak chistxum tzet chiswatxꞌe ay ishelanil;
wal mak machi isnabꞌal mach yohtajo istxumni.
34 Ta haꞌ istoholal chiswatxꞌe nime konhobꞌ,
chiꞌalaxiko ismay;
wal ta haꞌ mule chiswatxꞌe chiꞌilaxilo ispixan.
35 Haꞌ naj chejabꞌ ay isnabꞌal,
kaw chitzala naj rey yinh naj;
wal naj chejabꞌ chiꞌinilo ispixan naj chitit ishowal naj yinh naj.