13
Haꞌ naj kꞌahole ay isnabꞌal,chabꞌeto naj yet chikachlax naj yu ismam,
wal naj machi isnabꞌal mach chabꞌeto naj yet chikachlaxi.
2 Hunun mak kꞌul isnabꞌal chischah ispaj selel tzet chala,
wal anma txꞌoj, haꞌ istxꞌojal choche iswatxꞌeꞌ,
haꞌ chiꞌilcha yu.
3 Haꞌ mak chisnah isbꞌa yinh tzet chala,
lanhan istanhen isbꞌa,
wal mak kaw tzetkꞌa istzoteli lanhan yetanto isbꞌa.
4 Haꞌ mak isah, kaw ay tzet choche iskꞌul,
yajaꞌ xin mach chitzujcha apno yu,
wal mak chimunlahi chiqꞌalombꞌikanh.
5 Anma tohol isbꞌeybꞌal,
mach choche leqꞌtiꞌal,
wal anma txꞌoj isbꞌeybꞌal chiyahlaxi,
kat yilaxilo ispixan.
6 Haꞌ istoholal chiꞌilni anma kꞌul isbꞌeybꞌal.
Haꞌ istxꞌojal chitanhtzenilo anma mulum.
7 Ay mak tiꞌ kaw matzet aya,
yajaꞌ hakaꞌ qꞌalom chiyute isbꞌa,
ay mak tiꞌ xin kaw qꞌalom,
yajaꞌ hakaꞌ mak matzet aya, hak tuꞌ chute isbꞌa.
8 Haꞌ ebꞌnaj qꞌalom chu isloqꞌnilo isbꞌa ebꞌnaj yul isqꞌabꞌ ebꞌnaj elqꞌom, yu ismelyu,
wal anma mebꞌaꞌ, ¿tom ay bꞌay chiꞌelqꞌalaxtoj?
9 Haꞌ anma tohol isbꞌeybꞌal,
lahan hakaꞌ hunu lámpara chitzejlahi,
wal anma txꞌoj isbꞌeybꞌal lahan hakaꞌ hunu lámpara chitanhilo isqꞌaqꞌal.a
10 Haꞌ mak chiyikanh isbꞌa, haꞌ howal chissaya,
yajaꞌ wal mak chiyiyo isbꞌa kaw ay isnabꞌal.
11 Haꞌ mak kaw yinh anhe chiqꞌalombꞌikanh nixhtejal istanhayoj,
wal mak nixhtejal iskutxbꞌani chiqꞌalombꞌikanh.
12 Ta machi jil yinh tzet ayko yipo kokꞌul,
kaw bꞌiskꞌulal chiꞌeliko janma,
wal ta chiyij isbꞌa tzet chijoche chiꞌakꞌbꞌilo konabꞌal chijabꞌe.
13 Haꞌ mak mach chisyije hunu chejbꞌanile,
ay tzet chitit yibꞌanh,
wal mak chiyijen hunu chejbꞌanile chischah iskꞌulal.
14 Haꞌ kuybꞌanile chal ebꞌnaj ay isnabꞌal,
chaqꞌ qꞌinale,
kat kam iskolnilo yul isqꞌabꞌ kamikal.
15 Kaw chitzala anma yinh tzet chiswatxꞌe ebꞌnaj tohol isnabꞌal,
wal ebꞌnaj etahom anma,
lanhan isto ebꞌnaj bꞌay chitanhtzelaxiloj.
16 Haꞌ mak ay isnabꞌal kaw ay iswiꞌ, ismunlahi,
wal ebꞌnaj machi isnabꞌal kaw chisyeloj ta machi iswiꞌ yinh tzet chiswatxꞌe.
17 Haꞌ naj chejabꞌ mach kꞌulo chu yalni ischejbꞌanil,
ay isyaꞌtajil chaqꞌ naj;
yajaꞌ wal naj chejabꞌ kꞌul chu yalni ischejbꞌanil,
chaqꞌ naj tzalahilal.
18 Haꞌ mak mach chabꞌeto kuybꞌanile,
chitit mebꞌaꞌil yinh kat yel ispixan;
wal mak chiyabꞌetoj yet chikachlaxi kaw chiꞌalaxiko ismay.
19 Hayet chiyijni isbꞌa tzet chijoche chonhtzalahi;
wal anma machi isnabꞌal kaw mach chispohilo isbꞌa xol istxꞌojal.
20 Haꞌ mak chiꞌekꞌ yinta ebꞌnaj ay isnabꞌal,
ay isnabꞌal chiꞌeliko huneꞌ mak tuꞌ;
wal mak chiꞌekꞌ yinta ebꞌnaj machi isnabꞌal chiꞌetalaxto huneꞌ mak tuꞌ.
21 Haꞌ mak mulum tzujantikꞌa istxꞌojal yintaj;
wal anma tohol isbꞌeybꞌal,
haꞌ iskꞌulal chiꞌaqꞌlax tet ispajoj.
22 Haꞌ ismajul mak kꞌul isnabꞌal,
chitaapnikano tet yuninal yuninal;
wal isqꞌalomal anma mulum,
yet anma tohol isbꞌeybꞌal yehi.
23 Haꞌ istxꞌotxꞌ ebꞌnaj mebꞌaꞌ kaw tzetkꞌami tzet chilolax chaqꞌ txꞌotxꞌ,
yajaꞌ mach kꞌulo chiyil naj yuto mach tohol isleyal konhobꞌ.
24 Haꞌ mak mach chiskuy yuninal,
mach xahano ay yuninal tuꞌ yu;
wal mak xahan ay yu chiskuyu.
25 Haꞌ anma kꞌul isbꞌeybꞌal,
hayet chiwaꞌi kaw chinoh iskꞌul;
wal anma txꞌoj isbꞌeybꞌa maxhtikꞌa chinoh iskꞌul.