12
Haꞌ mak chitzalahi yet chikachlax yinh hunu istxꞌojal,haꞌ huneꞌ mak tuꞌ kaw ay isnabꞌal,
wal mak mach choche chikachlaxi,
haꞌ huneꞌ mak tuꞌ kaw machi isnabꞌal.
2 Haꞌ anma kꞌul isbꞌeybꞌal kaw chitzala Komam Dios yinh,
wal mak txꞌoj isnabꞌal chato Komam Dios yinh isyaꞌtajil.
3 Haꞌ istxꞌojal, mach chaqꞌ yip iskꞌul makta chiwatxꞌen istxꞌojal tuꞌ,
wal anma kꞌul isbꞌeybꞌal linhannhetikꞌa hakaꞌta kaw kꞌul yehayto xeꞌ.
4 Haꞌ ix ix kꞌul chiswatxꞌe,
hakaꞌ huneꞌ rey chute ix yichamil,
wal ix ixale txꞌoj isnabꞌal nixhtejal istanhtzenkanilo ix yichamil tuꞌ.
5 Haꞌ ebꞌnaj tohol isnabꞌal haꞌ yinh istoholal chꞌekꞌ isnabꞌal ebꞌnaj,
wal ebꞌnaj txꞌoj isnabꞌal hanhkꞌanhe leqꞌtiꞌal ayko yinh isnabꞌal ebꞌnaj.
6 Haꞌ tzotiꞌ chꞌelti yul istiꞌ ebꞌnaj txꞌoj,
lahan hakaꞌ latzꞌabꞌ chonhaqꞌni kamoj,
yajaꞌ wal tzotiꞌ chiꞌelti yul istiꞌ anma tohol isbꞌeybꞌal chonhkolcha yu.
7 Hayet chiyetanto Komam Dios anma txꞌoj chitanhkanilo yinh hunelnhe,
wal yuninal anma tohol isbꞌeybꞌal linhannhetikꞌa.
8 Chiꞌalaxiko ismay naj winaj yu ishelanil,
wal anma machi isnabꞌal chiyahlaxi.
9 Haꞌ mak machi yelapno yul sat anma,
yajaꞌ ay iskꞌamteꞌ,
kaw kꞌul yet sata mak kaw ay yelapno chiyute yalni,
yajaꞌ xin matzet chislo.
10 Haꞌ ebꞌnaj kꞌul chisyaꞌilnhe ebꞌnaj isnoqꞌ,
wal ebꞌnaj txꞌoj yanma,
machi tzꞌay iskꞌul ebꞌnaj yinh isnoqꞌ.
11 Haꞌ mak chimunla sat istxꞌotxꞌ ay tzet chislo,
yajaꞌ wal ebꞌnaj machi isnabꞌal haꞌ yinta ebꞌnaj manhmunil chiꞌok tzujnoj.
12 Haꞌ anma machi Dios yul sat chocheko isqꞌalomal anma txꞌoj chiswatxꞌe,
yajaꞌ wal tzet chiswatxꞌe anma tohol isbꞌeybꞌal,
haꞌ chꞌaqꞌni tzet chiꞌokniko yu.
13 Haꞌ anma txꞌoj,
yinhtikꞌa isleqꞌtiꞌal chiꞌaykꞌayi,
yajaꞌ wal anma kꞌul isbꞌeybꞌal chu iskolnilo isbꞌa xol isyaꞌtajil.
14 Haꞌ tzet chiyal hunun mak haꞌ chiꞌaqꞌlaxo ispajo tet,
haꞌtikꞌa xin tzet chiswatxꞌe haꞌ chꞌaqꞌlax ispajo tet.
15 Haꞌ mak machi isnabꞌal kꞌulnhetikꞌa sunil tzet chiswatxꞌe chiyute yalni,
wal mak ay isnabꞌal chabꞌeto tzet chihal-lax tet.
16 Haꞌ mak machi isnabꞌal kaw yinh anhe chisyeloj yet chitit ishowal,
wal mak ay isnabꞌal chisnahulnheto tzet chiꞌutelaxi.
17 Haꞌ hunu testigo kꞌul isnabꞌal, isyelal chala,
wal naj testigo mach kꞌuloj, leqꞌtiꞌal chala.
18 Ay mak tiꞌ, hayet chitzoteli chaqꞌ tako iskꞌul yet anmahil,
yajaꞌ wal yet chitzotel anma ay isnabꞌal chaqꞌ yaqꞌlobꞌal iskꞌul yet anmahil.
19 Haꞌ mak chal isyelal chinahatli yul sat yibꞌanhqꞌinal,
wal mak leqꞌtiꞌ, mach chinahatli.
20 Haꞌ yinh tzet chiswatxꞌe anma txꞌoj ay leqꞌtiꞌal,
yaj wal anma iskꞌulal chꞌekꞌ yinh isnabꞌal,
tzalahilal chaqꞌa.
21 Haꞌ anma kꞌul isbꞌeybꞌal machi isyaꞌtajil chihul yibꞌanh,
yajaꞌ wal anma txꞌoj txꞌiꞌal isyaꞌtajil hun chu yapni yibꞌanh.
22 Haꞌ mak leqꞌtiꞌ mach choche Komam Dios,
yajaꞌ wal mak haꞌ isyelal chala chitzala Komam yinh.
23 Haꞌ mak ay isnabꞌal mach chiyikanh isbꞌa yu tzet yohtaj,
wal mak machi isnabꞌal kaw chiyikanh isbꞌa yinh issukal chiswatxꞌe.
24 Haꞌ mak chimunlahi chichejwahi wal mak isah chichejlaxi.
25 Haꞌ isyaꞌtajil chiyako bꞌiskꞌulal yinh janma,
wal hunu tzotiꞌ kꞌul yoki chaqꞌ tzalaho kokꞌul.
26 Haꞌ mak kꞌul isbꞌeybꞌal chiꞌok ijbꞌalomal yinh yet anmahil,
wal anma txꞌoj chiyijbꞌato yet anmahil yinh istxꞌojal.
27 Haꞌ naj ustem noqꞌ isah,
mach chiswatxꞌe naj no noqꞌ chitzabꞌcha yu,
wal naj sakꞌan,
kaw txꞌiꞌal qꞌalomal chitzujchapno yu naj.
28 Haꞌ isbꞌehal istoholal chonhyito yinh qꞌinale,
yajaꞌ wal isbꞌehal mak txꞌoj, chito yinh kamikal.