11
Mach chischah iswiꞌ Komam Jahawil,malbꞌal mach tzꞌajanoj,
wal malbꞌal kaw tzꞌajan chitzala Komam yinh.
2 Haꞌ mak chiyikanh isbꞌa, chul txꞌixwilal yinh,
wal mak chiyiyo isbꞌa kaw ay isnabꞌal.
3 Haꞌ isyelal chiꞌijbꞌan anma tohol isbꞌeybꞌal,
wal anma leqꞌtiꞌ,
haꞌ isleqꞌtiꞌal tuꞌ chitanhtzeniloj.
4 Haꞌ qꞌalomal,
matzet chiꞌokniko yinh istzꞌayikal
yet chilni Komam Dios yinh tzet chiꞌeliko anma,
yajaꞌ wal istoholal chikowatxꞌe chonhiskolilo yul isqꞌabꞌ kamikal.
5 Haꞌ istoholal,
haꞌ chiwatxꞌeniko ebꞌnaj kꞌul yinh isbꞌeybꞌal,
yajaꞌ wal anma txꞌoj haꞌtikꞌa istxꞌojal tuꞌ chiꞌaqꞌni aykꞌayoj.
6 Haꞌ istoholal chiswatxꞌe anma kꞌul isbꞌeybꞌal,
haꞌ chikolni,
wal anma mulum chikankano yul isqꞌabꞌ ismul tuꞌ.
7 Hayet chikam anma txꞌoj,
chitanhpaxilo tzetaj ayko yipo yanma yebꞌ tzetaj choche iskꞌul.
8 Chiskolilo Komam Dios anma tohol isbꞌeybꞌal tet isyaꞌtajil,
kat yanayo Komam isyaꞌtajil tuꞌ yibꞌanh anma txꞌoj selelo anma tohol isbꞌeybꞌal tuꞌ.
9 Hayet chitzotel ebꞌnaj txꞌoj,
chitanhilo yet anmahil ebꞌnaj yu tzet chala,
yajaꞌ wal ebꞌnaj tohol isbꞌeybꞌal chikolchalo ebꞌnaj yu ishelanil.
10 Hayet chiqꞌalombꞌikanh anma kꞌul isbꞌeybꞌal kaw chitzala konhobꞌ,
haxa yet chikam ebꞌnaj txꞌoj isbꞌeybꞌal kaw chiqꞌinhtzelax yu tzalahilal.
11 Yu isyaxilal ayayo yibꞌanh anma tohol isbꞌeybꞌal yuxin chiwatxꞌikanh konhobꞌ,
yajaꞌ wal anma txꞌoj isbꞌeybꞌal chiyuchkꞌato konhobꞌ tuꞌ yinh tzet chala.
12 Haꞌ mak machi isnabꞌal,
txꞌoj istzotel yinh yet anmahil,
yajaꞌ wal mak ay isnabꞌal matzet chala.
13 Haꞌ anma hobꞌom tzotiꞌ,
sunil tzet chabꞌe chiyalikꞌoj wal anma kꞌul isbꞌeybꞌal mach chalikꞌo tzet chabꞌe.
14 Ta mach isnabꞌal ebꞌnaj yahawil konhobꞌ chitanhilo huneꞌ konhobꞌ tuꞌ;
wal ta txꞌiꞌal mak ay isnabꞌal chiꞌijbꞌan konhobꞌ tuꞌ,
wal tuꞌ kaw kꞌul chiꞌeliko konhobꞌ tuꞌ.
15 Haꞌ mak chiyaqꞌ isbꞌa yinh hunu mak chiqꞌanni melyu kꞌamil,
machi aqꞌankꞌulal yul yanma,
wal mak mach chaqꞌ isbꞌa yinh tuꞌ aqꞌankꞌulal yehi.
16 Haꞌ ix ix kaw kꞌulchꞌankano iskꞌul,
chꞌalaxiko ismay ix.
Haꞌ naj winaj ay yip chꞌok naj qꞌalomal.
17 Haꞌ mak kꞌul iskꞌul chischah iskꞌulal,
wal mak how iswiꞌ,
yinhtikꞌa chiswatxꞌe istxꞌojal.
18 Haꞌ anma txꞌoj, haꞌ isyaꞌtajil chischah ispajo tzet chiswatxꞌe,
wal anma chiwatxꞌen istoholal haꞌ iskꞌulal chischah ispajoj.
19 Hayet chikowatxꞌen istoholal chonhyito yinh qꞌinale,
yajaꞌ wal mak chiꞌoktzujno yinta istxꞌojal,
lanhan isto yinh kamikal.
20 Haꞌ mak txꞌoj isnabꞌal mach choche Komam,
yajaꞌ wal mak kaw kꞌul isbꞌeybꞌal kaw chitzala Komam yinh.
21 Yinh kaw yeli, haꞌ anma txꞌoj,
mach chiꞌekꞌto yet yay isyaꞌtajil yibꞌanh,
wal anma kꞌul isbꞌeybꞌal chikol-laxiloj.
22 Haꞌ ix ix kaw kꞌulchꞌan, yajaꞌ machi isnabꞌal,
lahan ix hakaꞌ noꞌ txitam ayikto hunu ome nabꞌa oro yul istxam.
23 Haꞌ mak tohol isbꞌeybꞌal kꞌul chiꞌeliko sunil tzet choche,
wal mak txꞌoj isbꞌeybꞌal,
haꞌ yok ishowal yinh iskꞌul haꞌ chiꞌilcha yu.
24 Ay mak tiꞌ kaw kꞌul iskꞌul,
chispohto tzet ay yinh yet anmahil,
yebꞌ xin ekꞌbꞌal ispaj selel chischah.
Ay mak tiꞌ xin kaw kꞌutz yinh tzet aya,
yajaꞌ xin chitanhkano yinh mebꞌaꞌil.
25 Haꞌ mak chikolwa yinh tzet aya chiꞌaqꞌlax yaqꞌbꞌil tet.
Haꞌ mak lehanto isqꞌabꞌ yaqꞌni, chischah selel.
26 Haꞌ mak chimajnikanh ixim trigo kat iskꞌubꞌanto ixim,
chitzꞌaktiꞌnhelax yu anma, wal mak chitxonhni ixim,
chiqꞌanlax iskꞌulal yibꞌanh yu anma.
27 Haꞌ mak chisaynikꞌo iskꞌulal,
haꞌ iskꞌulal chꞌaqꞌlax tet.
Haꞌ mak chisaynilo istxꞌojal, txꞌoj chu istanhkanoj.
28 Haꞌ mak yinh isqꞌalomal chikawxi iskꞌul chiꞌaykꞌay hakaꞌ teꞌ tajin xaj teꞌ,
yajaꞌ wal anma tohol isbꞌeybꞌal chiwolni hakaꞌ iswolni isqꞌabꞌ te teꞌ.
29 Haꞌ mak chiwatxꞌen istxꞌojal yinh anma ay bꞌey yatut,
chikankano yinh manhtzetal.
Haꞌ anma machi isnabꞌal chiꞌokkano ischejabꞌo ebꞌnaj ay isnabꞌal.
30 Haꞌ qꞌinale, haꞌ chaqꞌ tzet chiswatxꞌe anma tohol isbꞌeybꞌal.
Haꞌ mak chimoncha iskꞌul anma yu, kaw helan huneꞌ mak tuꞌ.
31 Ta chischah anma tohol isbꞌeybꞌal ispaj iskꞌulal chiswatxꞌe,
¡haktikꞌapax tuꞌ ischahni anma txꞌoj yebꞌ mulum ispaj istxꞌojal chiswatxꞌe!