ISKABꞌ MAJAN KUYBꞌANILE: TZOTIꞌ KAW HELAN YALKANO YAꞌ SALOMÓN
(10:1–22:16)
Haꞌ tzet chiswatxꞌe anma kꞌul mach chischah isbꞌa yebꞌ tzet chiswatxꞌe anma txꞌoj
10
Tzotiꞌ yalkano yaꞌ Salomón.Ebꞌnaj kꞌahole helan,
chaqꞌ tzalaho ebꞌnaj iskꞌul ismam,
wal ebꞌnaj mach isnabꞌal chako ebꞌnaj bꞌiskꞌulal yinh iskꞌul ismiꞌ.
2 Haꞌ mak chiqꞌalombꞌikanh yu leqꞌtiꞌal chakoj,
haꞌ isqꞌalomal tuꞌ,
matzet chaliloj;
wal mak kꞌul chute isbꞌa chikolcha yul isqꞌabꞌ kamikal.
3 Haꞌ mak kꞌul isbꞌeybꞌal mach chaqꞌle wahil yu Komam Dios,
yajaꞌ wal anma txꞌoj mach chaqꞌ Komam noho iskꞌul yet chinhochahi.
4 Haꞌ mak hanikꞌnhe chimunlahi mebꞌaꞌil chitit yibꞌanh,
wal mak kaw chimunlahi, chiqꞌalombꞌikanh.a
5 Haꞌ ebꞌnaj chihatxꞌwi yinh waresmahil kaw ay iswiꞌ ebꞌnaj,
yajaꞌ wal ebꞌnaj kꞌahole wayanh chu yet ay hatxꞌo chiꞌel ispixan ismam ebꞌnaj yu.
6 Kaw ayojabꞌ iskꞌulal yibꞌanh anma kꞌul isbꞌeybꞌal,
yajaꞌ wal anma txꞌoj kaw chiyebꞌa ishowal yu tzet chiyala.
7 Haꞌ anma tohol isbꞌeybꞌal,
chisnati Komam Dios chiyanayo Komam isyaxilal yibꞌanh,
yajaꞌ wal anma txꞌoj kaw yinh anhe chinahulnhelaxtoj.
8 Haꞌ mak ay isnabꞌal chischah kuybꞌanile chꞌaqꞌlax tet.
Haxa mak issukalnhe chal xin, nixhtejal istanhiloj.
9 Haꞌ mak tohol isbꞌeybꞌal, machi xiwi.
Haꞌ mak kaw txꞌoj isbꞌeybꞌal, txꞌoj chu istanhiloj.
10 Haꞌ mak chimutzꞌla sat chisnani istxꞌojal,
txꞌiꞌal isyaꞌtajil chihul yibꞌanh.
Haxa mak issukal chala, nixhtejal istanhkaniloj.
11 Haꞌ tzotiꞌ chal ebꞌnaj tohol isnabꞌal,
lahan hakaꞌ isnuqꞌ haꞌ haꞌ chiꞌaqꞌni qꞌinale,
yajaꞌ istzotiꞌ anma txꞌoj, chitanhilo yu istxꞌojal.
12 Haꞌ mak chichiwa iskꞌul,
chissay yinh tzet chu yah howal.
Wal mak kꞌulchꞌan iskꞌul chaqꞌ nimankꞌulal yinh istxꞌojal chiwatxꞌelax yinh.
13 Hayet chitzotel ebꞌnaj ay isnabꞌal,
kaw ay ishelanil ebꞌnaj istzoteli,
yajaꞌ wal ebꞌnaj machi isnabꞌal chiꞌalaxayto teꞌ kꞌax yinh yichinh ebꞌnaj.
14 Hayet chitzotel ebꞌnaj ay isnabꞌal kaw ay yelapno tzotiꞌ chiꞌelti yul istiꞌ ebꞌnaj,
yajaꞌ hayet chitzotel ebꞌnaj mach isnabꞌal
chixiwkanh anma yabꞌen tzet chal ebꞌnaj.
15 Haꞌ isqꞌalomal naj qꞌalom yip iskꞌul naj yehi,
wal naj mebꞌaꞌ, haꞌ ismebꞌaꞌil tuꞌ chitanhtzenkaniloj.
16 Haꞌ anma chiwatxꞌen istoholal haꞌ qꞌinale chiꞌaqꞌlax ispaj selelo tet,
wal anma txꞌoj haꞌ isyaꞌtajil chischah ispajo ismul.
17 Haꞌ mak chiyabꞌetoj yet chikachlaxi,
lanhan isto yul isbꞌehal qꞌinale,
yajaꞌ wal mak mach chabꞌe yet chikachlaxi lanhan isto yinh isyaꞌtajil.
18 Haꞌ mak chalni leqꞌtiꞌal yu istiꞌ,
lanhan yebꞌanayoj tato ayko ishowal yinh iskꞌul.
Huneꞌ mak halo qꞌumalnhetikꞌa chu machi isnabꞌal.
19 Haꞌ mak kaw echo istzoteli,
ay tzotiꞌ tiꞌ bꞌay chꞌok ismul,
yajaꞌ wal mak mach chibꞌin chitzoteli,
kaw ay isnabꞌal huneꞌ mak tuꞌ.
20 Haꞌ istzotiꞌ anma kꞌul isbꞌeybꞌal,
lahan hakaꞌ chꞌen plata kaw ay istohol,
wal isnabꞌal anma txꞌoj matzet chal yelapnoj.
21 Hayet chitzotel ebꞌnaj tohol isbꞌeybꞌal
txꞌiꞌal mak chikuywa yinh tzet chal ebꞌnaj,
yajaꞌ mak machi iswiꞌ chikam yu manh nabꞌaleh.
22 Haꞌ isyaxilal Komam, haꞌ chonhaniko qꞌalomal,
Komam xin mach chiyaqꞌ bꞌiskꞌulal yibꞌanh.
23 Haꞌ mak machi isnabꞌal,
kaw chitzala iswatxꞌen istxꞌojal,
wal mak ay isnabꞌal kaw chitzala yinh ishelanil tuꞌ.
24 Haꞌ tet bꞌay kaw chixiw anma txꞌoj,
haꞌ chihul yibꞌanh;
yajaꞌ wal anma tohol isbꞌeybꞌal chiyij isbꞌa tzet choche.
25 Hakaꞌ yekꞌto jaqꞌeqꞌ nhabꞌ,
hak tuꞌ anma txꞌoj,
mach chinahatli,
wal anma tohol isbꞌeybꞌal aynhetikꞌa yinh sunilbꞌal tiempo.
26 Hayet chikochejni ebꞌnaj isah,
lahan ebꞌnaj hakaꞌ pahla vinagre yich jeh,
yebꞌ hakaꞌ nhubꞌ chito yul kosat.
27 Hayet chijinayo kobꞌa tet Komam Dios chihitzto yoj kokawil,
yajaꞌ wal anma txꞌoj isbꞌeybꞌal chikꞌotzbꞌalax yoj iskawil tuꞌ.
28 Haꞌ tzet chitit sata anma tohol isbꞌeybꞌal,
haꞌ ton tzalahilal,
yajaꞌ wal tzet chitit sata anma txꞌoj haꞌ ton istanhtzelaxiloj.
29 Haꞌ Komam Dios chitanhen makta kꞌul chiyute isbꞌa,
yajaꞌ wal mak chiwatxꞌen istxꞌojal chistanhtzelo Komam.
30 Haꞌ anma tohol isbꞌeybꞌal mach chihekꞌlaxilo sat istxꞌotxꞌ,
wal anma txꞌoj mach chinahatli sat txꞌo txꞌotxꞌ.
31 Hayet chitzotel anma tohol isbꞌeybꞌal,
haꞌ helanile chiꞌelti yul istiꞌ,
wal anma txꞌoj chikꞌuplaxilto yaqꞌ.
32 Hayet chitzotel anma tohol isbꞌeybꞌal,
haꞌ tzotiꞌ kꞌul chiyala,
wal anma txꞌoj hanhkꞌanhe istxꞌojal chala.