Haꞌ helanile mach chischah isbꞌa yebꞌ mak mach isnabꞌal
9
Haꞌ mak ay ishelanil iswatxꞌekanh yatut,kaw xin kꞌulchꞌan yutekanh hujebꞌ isyoyal yatut tuꞌ.
2 Lahwi tuꞌ ispotxꞌni isnoqꞌ,
iswatxꞌenpaxo vino, yanayo mexha.
3 Ischejnito ebꞌix ischejabꞌ yawteno anma yinh iswonhanil konhobꞌ.
4 Chalni ebꞌix hakaꞌ tiꞌ:
«Hex tzeh machi hehelanil titanhwe bꞌey tiꞌ,» xhi ebꞌix.
Yalnipaxo tet mak mach isnabꞌal hakaꞌ tiꞌ:
5 «Titanhwej, kat heloni witahan,
kat heyukꞌni vino watxꞌebꞌilxa wuhan.
6 Bꞌejwekano hesukal, haxinwal ay heqꞌinal,
hakaꞌojabꞌ anma helan,
hakojabꞌ tuꞌ cheyute hebꞌa.»
7 Haꞌ mak chikuyni ebꞌnaj bꞌuchwawom,
yebꞌ ebꞌnaj machi isnabꞌal,
chisbꞌa ebꞌnaj mak chikuyni tuꞌ kat yaqꞌni ebꞌnaj tako iskꞌul.
8 Mach chakach ebꞌnaj txꞌoj,
haxinwal mach chiꞌok ishowal ebꞌnaj tawinh;
yajaꞌ ta chakuy mak ay isnabꞌal chitzalaho huneꞌ mak tuꞌ tawinh.
9 Hayet chikuylax mak ay isnabꞌal tuꞌ chichꞌibꞌ isnabꞌal;
hayet chikuylax anma kꞌul isbꞌeybꞌal chichꞌibꞌ ishelanil.
10 Haꞌ yichebꞌanil helanile haꞌ ton koxiw tet Komam Dios.
Hayet chijohtanhenilo Komam Dios,
Komam kaw aykano yip kaw ay konabꞌal, chal tuꞌ.
11 Yu helanile tuꞌ, yuxin chachnahatli yul sat yibꞌanhqꞌinal tiꞌ,
kat ishitzto yoj hahabꞌilal.
12 Tato ay hahelanil,
ay iskꞌulal chaqꞌ tawet,
taka txꞌoj hach xin,
hach chatohla hamul tuꞌ hachukil.
13 Ebꞌix ix machi isnabꞌal hobꞌom tzotiꞌ ebꞌix,
kaw suk ebꞌix yebꞌ xin kaw matzet yohtaj.
14 Chiꞌay tzꞌonhno ebꞌix istiꞌ ispultahil yatut
yebꞌ yibꞌanh ej wonhan yul konhobꞌ,
15 kat yawten ebꞌix makta chꞌekꞌto yul bꞌeh.
16 Chalni ebꞌix: «Hex tzeh machi henabꞌal,
titanhwe bꞌey tiꞌ,» xhi ebꞌix. Chalnipaxo ebꞌix tet mak mach ishelanil hakaꞌ tiꞌ:
17 «Ha haꞌ elqꞌabꞌil, kaw chiꞌ jukꞌni haꞌ,
haxa itah ewanta chikolo kaw xuqꞌkanoj,» xhi ebꞌix.
18 Yajaꞌ ebꞌnaj tzeh bꞌay chal ebꞌix hakaꞌ tuꞌ,
mach yohtajo ebꞌnaj ta ebꞌnaj chiyabꞌeto tzet chal ebꞌix tuꞌ,
kamomxa ebꞌnaj tinanh.