Iskꞌulal helanile
8
Abꞌewe xin, chexawtelax yu heyiqꞌni helanilekat yal-lax yitzꞌatil wiꞌe teyet.
2 Bꞌajxanhetuꞌwal ay hex,
chihal-lax helanile yebꞌ yitzꞌatil wiꞌe tuꞌ teyet;
chihal-laxikꞌo yinhla iswiꞌ wonhan
yebꞌ bꞌay chiskulusnhe isbꞌa bꞌeh.
3 Chihal-laxpaxikꞌo yul ispultahil bꞌay chiꞌokto anma yul konhobꞌ.
4 Haꞌ tet anma ay yul sat yibꞌanhqꞌinal chiwalan hunteqꞌan tiꞌ.
5 «Hex tzeh machi henabꞌal yebꞌ kaw lutꞌ hex,
kuywanhwe yinh helanile yebꞌ yitzꞌatil wiꞌe.
6 Abꞌewej,
yuto ay hunteqꞌan kaw ay yelapno chiwalan teyet,
chinhaj intiꞌan chiwalnihan tzet ye tuꞌ kaw tohol.
7 Haꞌ tzet chiwalan teyet tiꞌ, kaw yeli,
yuto hanintiꞌan kaw machi walan leqꞌtiꞌal.
8 Sunil tzet chiwalan kaw tohol,
machi hunu leqꞌtiꞌal ayko yinh.
9 Haꞌ tzet chiwaltiꞌan habꞌan yinh sat anma ay ishelanil
yebꞌ tohol yul sat anma ay yitzꞌatil iswiꞌ.
10 Ekꞌbꞌalojabꞌ chaxhtzala yinh kuybꞌanile
yebꞌ helanile sata yinh chꞌen plata yebꞌ chꞌen oro.
11 Haꞌ helanile tuꞌ,
ekꞌbꞌal ay istohol sata hunteqꞌan chꞌen chꞌen kaw kꞌulchꞌan jilni,
kaw ay istohol.
Mach chu kolahbꞌan yebꞌ tzet ye tuꞌ kaw ochebꞌil.
12 Haꞌ helanile,a kaw lahan yebꞌ yitzꞌatil wiꞌe.
Haꞌ yinh chiꞌilchalo iskꞌulal kuybꞌanile.
13 Ta kaw ay yelapno Komam Dios yul kosat,
chikoyah sunil istxꞌojal.
Ta ay kohelanil mach chijikanh kobꞌa,
yebꞌ janiko komay.
Mach chijochepaxo kotoh yinh istxꞌojal yebꞌ leqꞌtiꞌal.
14 Haꞌ yinh helanile tuꞌ chiꞌilchalo kuybꞌanile yebꞌ iskꞌulal wal kowatxꞌeni,
yinh chꞌilchapaxilo istoholal yebꞌ jip.
15 Yu helanile tuꞌ,
yuxin chiyaqꞌ ebꞌnaj rey yahawilal,
kat iswatxꞌenpaxo ebꞌnaj yahaw konhobꞌ istoholal yu helanile tuꞌ.b
16 Yu helanile tuꞌ,
yuxin ay yip ebꞌnaj yahaw konhobꞌ yibꞌanh anma,
kat yalnilto ebꞌnaj ley tet anma.
17 Haꞌ helanile tuꞌ chitzala yinh ebꞌnaj chiꞌocheni,
kat yilchalo yu ebꞌnaj chisaynikꞌoj.
18 Haꞌ mak ay ishelanil kaw ay isqꞌalomal yebꞌ kaw ay ismay yebꞌ yelapnoj.
19 Haꞌ chaqꞌ helanile tuꞌ,
ekꞌbꞌal yelapno sata chꞌen oro kaw ay istohol,
yebꞌ xin ekꞌbꞌal yelapno sata chꞌen nabꞌa plata.
20 Yu helanile tuꞌ,
yuxin ayonhiko yul isbꞌehal istoholal yebꞌ iskꞌulal.
21 Haꞌ mak chitzala yinh helanile tuꞌ ay ismajul chischah,
kat isnohilo yatut yu sunil iskꞌulal.
22 Haꞌ Komam Dios anhekano helanile yettax kaw yichebꞌanil,
yet maxhto chiswatxꞌe hunu tzet ye tuꞌ.
23 Haꞌ Komam Dios watxꞌenkanoj yettax kaw payat yet yichebꞌanil ej tiempo,
yet maxhto chiswatxꞌe txꞌo txꞌotxꞌ.
24 Haꞌ Komam anhekano helanile yet maxhto chiswatxꞌe haꞌ nime mar,
yebꞌ xin yet maxhto haꞌ haꞌ, yebꞌ haꞌ nixhte isnuqꞌ haꞌ.
25 Yebꞌ yet maxhto chiswatxꞌe Komam witz yebꞌ ej wonhan ayxatikꞌa helanile tuꞌ.
26 Yebꞌ yet maxhto chiswatxꞌe Komam txꞌo txꞌotxꞌ,
yebꞌ sunil tzet ayayo sat txꞌotxꞌ.
Yebꞌ yet maxhto chiswatxꞌe Komam pojoj bꞌay watxꞌebꞌil txꞌo txꞌotxꞌ,
ayxatikꞌa helanile tuꞌ.
27 Hayet islehbꞌanto Komam satkanh yibꞌanh haꞌ nime mar
ayko helanile tuꞌ yetbꞌihoj.
28 Yebꞌ yet iswatxꞌen Komam moyan yul satkanh
yebꞌ yet yanikano Komam ej isnuqꞌ haꞌ mar,
29 yebꞌ yet yalnikano Komam tet haꞌ haꞌ ay xol haꞌ mar ta mach chꞌel haꞌ yul yehobꞌal,
yebꞌ yet yanikanayo Komam isxeꞌal txꞌo txꞌotxꞌ tiꞌ.
30 Haꞌ helanile tuꞌ ayko yetbꞌiho Komam Dios
yet iswatxꞌen sunil tzetaj ye tuꞌ,
kaw xin hunun tzꞌayik istzala Komam yinh helanile tuꞌ,
chitzalapaxo helanile tuꞌ sata Komam.
31 Kaw tzala Komam yu ishelanil yinh sunil tzet ay sat txꞌo txꞌotxꞌ tiꞌ,
istzalapaxo yu ishelanil yinh anma.
32 Tinanh xin hex kꞌahol,
hex tiꞌ kaw abꞌewe tzet chiwalan.
¡Haꞌojabꞌ inbꞌeybꞌalan cheyikꞌoj,
haxinwal kaw aynhetikꞌa tzalahilal yul heyanma!
33 Kaw hajbꞌawe hetxikin yinh kuybꞌanile chꞌaqꞌlax teyet.
Mach cheyah helanile chihaltelax teyet.
34 Kaw saqꞌal yet mak chꞌabꞌen tzet chiwaltiꞌan,
yebꞌ mak hunun tzꞌayik ayko istanhen ispultahil watutan.
35 Yuto haꞌ mak chꞌilcha helanile yu,
haꞌ qꞌinale lanhan yilchalo yu.
Kaw xin chitzala iskꞌul Komam yinh hunun mak tuꞌ.
36 Yajaꞌ mak chispohilo isbꞌa yinh helanile tuꞌ,
lanhan isto yinh isyaꞌtajil.
Haꞌ mak chinyahnihan xin, lanhan yochento iskami,» xhi.