Istxꞌojal isnabꞌal ix ix txꞌoj ye iswiꞌ
7
»Hach inkꞌahol abꞌe tzet chiwalan,kꞌubꞌakano inchejbꞌanilan yinh hanabꞌal.
2 Kꞌubꞌa kuybꞌanile chiwalkanojan,
kaw chayaꞌilnhe hakaꞌ chu hayaꞌilnhen isbꞌaqꞌ hasat,
hak tuꞌ xin chu hawehikꞌo yul sat yibꞌanhqꞌinal tiꞌ.
3 Hakaꞌto kaw kam chaximkaniko kuybꞌanile tuꞌ yinh yiximal haqꞌabꞌ
kat hatzꞌibꞌnhenkaniko yinh hawanma.
4 Tzalahanh yinh helanile hakaꞌ hatzala yinh hawanabꞌ,
kat yok nabꞌale hakaꞌ hawamigohal.
5 Haꞌ kuybꞌanile yebꞌ chejbꞌanile tuꞌ,
chachkolnilo yul isqꞌabꞌ ix ix txꞌoj ye iswiꞌ,
haꞌ chachkolnipaxoj yet chachismonten ix.
6 Yet hunel kintꞌanhxiltojan yul isventanahil watutan,
7 wilnitojan hunteqꞌan ebꞌnaj tzeh kaw mach isnabꞌal.
Xol ebꞌnaj tuꞌ, ay huneꞌ naj tiꞌ kaw suk.
8 Hayet yapni naj yinh iskumil bꞌeh isqꞌaxponikꞌto naj huneꞌ bꞌeh tuꞌ,
palan xin isto naj yatut ix ix txꞌoj ye iswiꞌ,
9 haxa yet qꞌejbꞌiyal yet lanhanxa yah aqꞌbꞌal.
10 Yelti huneꞌ ix ix ischahno naj,
hakaꞌ ebꞌix ix txꞌoj ye iswiꞌ,
kaw ay ismontebꞌal yebꞌ kaw txꞌoj isnabꞌal.
11 Hakaꞌ ebꞌix halom qꞌumal yebꞌ aqꞌom howal,
ebꞌix mach chꞌehikꞌo yul yatut.
12 Ebꞌix yulnhetikꞌa calla istzan yekꞌi,
yebꞌ yulaj txonhbꞌal yebꞌ iskumil bꞌeh.
13 Hayet yelti ix ischahno naj tzeh tuꞌ,
yok laqꞌno ix yinh naj,
istzꞌohni ix istiꞌ naj,
yalni ix tet naj:
14 “Wal tinanh,
xawaqꞌan inxahanbꞌalan yet aqꞌankꞌulal halbꞌilxa wuhan.a
15 Yuxin makinelilojan kach inchabꞌaꞌan,
kaw chiwochehan kaxhwilaꞌan.
16 Watxꞌebꞌilxa intxꞌatan wuhan,
huneꞌ sábana kaw ay istohol chiwatxꞌi bꞌey Egipto lehanto yibꞌanh intxꞌat tuꞌan.
17 Maxinwakojan anh kaw xuqꞌ sam,
haꞌ ton mirra,
áloes yebꞌ canela yibꞌanh intxꞌat tuꞌan.
18 Yuxin okanh yul nha,
ako hawanma winhan,
kat jaqꞌni tzalaho kokꞌul masanta yet chisajbꞌiloj.
19 Machi wichamilan aykꞌoj,
ayto naj yinh huneꞌ isbꞌel kaw nahat.
20 Kaw xin niman ismelyu naj mayito yinh isbꞌel tuꞌ,
yuxin hato yet chiyihbꞌi ixahaw chihul naj,” xhi ix.
21 Hak tuꞌ xin yu yay iskꞌul naj tzeh tuꞌ yu ix,
yuto kaw kꞌulchꞌan yu ismonten ix naj.
22 Hak tuꞌ yu isto naj yinta ix,
hakaꞌ chu isto noꞌ wakax yinta naj chiꞌinito noꞌ kamoj.
Hakaꞌ chu yaykꞌay noꞌ sajche yul latzꞌabꞌ,
23 kat isqꞌaxpon teꞌ litꞌ yul yanma noꞌ.
Yebꞌ xin chiꞌaykꞌay naj,
hakaꞌ chu iskankano noꞌ chꞌik yul latzꞌabꞌ,
mach xin yohtajo noꞌ ta haꞌ kamikal chitit yibꞌanh noꞌ.
24 Yuxin chiwalan tawet hach inkꞌahol,
abꞌewe tzet chiwaltiꞌan.
25 Mach chawako hanabꞌal yinh hunteqꞌan ebꞌix ix tuꞌ.
Mach chaxhok tzujno yinta ebꞌix haxinwal mach chaxhkꞌaytoj.
26 Yuto kaw txꞌiꞌal ebꞌnaj winaj tiꞌ xayaqꞌ kamo ix.
Kaw txꞌiꞌalxa ebꞌnaj winaj kaw ay yelapno xakam yu ix.
27 Tato chaxhto yul isbꞌehal yatut ix tuꞌ,
lahan hakaꞌta yul isbꞌehal kamikal chachtohi,» xhi.