Kachbꞌanile yinh jaqꞌni kobꞌa yinh mak chikꞌamnhen chꞌen melyu
6
»Hach inkꞌahol, ta chawaqꞌ habꞌa yinh hunu mak chiqꞌanni melyu kꞌamil,ta chawaqꞌ habꞌa yinh mak mach hawohtajoj,
2 hach kawach chawayo halatzꞌabꞌil,
haꞌtikꞌa hatiꞌ tuꞌ chachaqꞌni aykꞌayoj.a
3 Hach inkꞌahol, kaw makaxhaykꞌay yul isqꞌabꞌ hawet anmahil tuꞌ,
wal xin haꞌ wal hawuten habꞌa yunhe hakolchalo tuꞌ,
iyo habꞌa kat hato tzotelo tet naj qꞌannhe chꞌen melyu kꞌamil,
kat yanayo naj chꞌen.
4 Machojabꞌ chawaqꞌ wayanhil tet hasat,
machojabꞌ chaxhok xewo hunepoj.
5 Kolilo habꞌa yul isqꞌabꞌ hunteqꞌan hawet anmahil tuꞌ,
hakaꞌ chu yelkanh noꞌ sajche yul isqꞌabꞌ naj chitzumbꞌen noꞌ.
Hakaꞌojabꞌ chu yelkanh noꞌ chꞌik yul latzꞌabꞌ,
hakojabꞌ tuꞌ chu hakolnilo habꞌa.
Kachbꞌanile yinh isahil
6 »Hach isah, okanh tꞌanhno yinh noꞌ sanik,
kat hawilni yinh tzet chu ismunla noꞌ.
7 Waxanhka machi yahaw noꞌ,
yebꞌ xin machi mak chihalni tet noꞌ ta chimunla noꞌ,
8 yajaꞌ chiskutxbꞌako noꞌ tzet chislo yinh waresmahil,
chiskꞌubꞌankanh noꞌ tzet chislo yet chiꞌilaxkanh sat tzꞌunubꞌ.
9 Hach isah hach tiꞌ,
bꞌej hawayi,
bꞌej haxew chꞌekꞌ tzꞌayik.
10 Hakaꞌtikꞌa chu istit hawayanh,
kat halaqꞌni haqꞌabꞌ yu haxew yet tzꞌayikal,
11 hak tuꞌ chu yapni naj mebꞌaꞌil tawinh,
kat kach istanhtzeniloj,
hakaꞌ chu yapni hunu naj maqꞌom istanhtzenolo hunu maka.
Isbꞌeybꞌal ebꞌnaj txꞌoj
12 »Ebꞌnaj txꞌoj chiswatxꞌe yebꞌ ebꞌnaj soman ye yul iswiꞌ,
hanhkꞌanhetikꞌa leqꞌtiꞌal chala.
13 Chimutzꞌla sat ebꞌnaj,
chaqꞌni ebꞌnaj yechel yu yoj,
kat isyeni ebꞌnaj yet anmahil yu yiximal isqꞌabꞌ.
14 Hanhkꞌanhetikꞌa istxꞌojal ayko yinh isnabꞌal ebꞌnaj,
hanhkꞌanhetikꞌa ismachiswalilal choche ebꞌnaj iswatxꞌeꞌ.
Chaniko ebꞌnaj howal yinh yet anmahil.
15 Yuxin chinhe lemna yapni istzꞌayikal bꞌay chiꞌay isyaꞌtajil yibꞌanh ebꞌnaj,
yebꞌ istzꞌayikal bꞌay chitanhtzelaxilo ebꞌnaj.
Hunteqꞌan tzet chisyah Komam Dios
16 »Ay hujebꞌ tzet ye tuꞌ tiꞌ chisyah Komam Dios sikꞌlebꞌil:
17 loloꞌal, leqꞌtiꞌal,
potxꞌwal yinh anma mach ismul.
18 Isnahni istxꞌojal yinh jet anmahil,
yinito isbꞌa yu yoj isto iswatxꞌeno istxꞌojal.
19 Yaqꞌni isbꞌa yinh leqꞌtiꞌal,
yebꞌ yaniko howal xol juxhtaj,
haꞌ hunteqꞌan tiꞌ chisyah Komam Dios.
Isyaꞌtajil chitit yibꞌanh mak chiꞌixli
20 »Hach kꞌahol,
kꞌubꞌakano chejbꞌanile chal hamam tawet,
yebꞌ mach chabꞌejkano kuybꞌanile chal hamiꞌ tawet.
21 Kꞌubꞌakano yul hawanma,
kꞌalbꞌako yinh hanuqꞌ hakaꞌ hunu uwe.
22 Haꞌ kuybꞌanile yebꞌ chejbꞌanile tuꞌ chachijbꞌanikꞌo yet chachekꞌ yinh habꞌel.
Haꞌ chaxhtanheni yet chachwayi,
kat istzotel tawet yet chꞌel hawayanh.
23 Yinh kaw yeli, haꞌ kuybꞌanile yebꞌ chejbꞌanile,
lahan hakaꞌ istzejla isqꞌaqꞌal hunu lámpara.
Haꞌ kuybꞌanile yebꞌ kachbꞌanile,
haꞌ chachijbꞌani yul isbꞌehal qꞌinale.
24 Haꞌ mach chaxhchanayo hawaykꞌay yul isqꞌabꞌ ix ix txꞌoj.
Haꞌ chachkolni yet chachismonten ix ix txꞌoj ye iswiꞌ.
25 Machojabꞌ chawocheko iskꞌulchꞌanil ix,
machojabꞌ chawaqꞌ somchaho hawiꞌ yet chitꞌanhxiko ix tawinh.
26 Ix ix txꞌoj ye iswiꞌ chako ix yanma yinh naj winaj yu nichꞌan istiꞌ pan,
wal ix ix ay yichamil,
kat issayni ix hunuxa naj, chako yanma ix yinh naj chiyinito isqꞌinal naj.
27 Haꞌ mak chꞌaniko tzaqꞌaꞌ yinh istxam iskꞌul,
masan chitzꞌato xil isqꞌap yu.
28 Haxa mak chibꞌelwikꞌo yibꞌanh tzaqꞌaqꞌ chitzꞌato yoj.
29 Haꞌ naj chishunbꞌa isbꞌa yebꞌ ix ix txꞌoj ye iswiꞌ,
mach chikolcha naj tet isyaꞌtajil.
30 Chiyahlax naj elqꞌom yet chiꞌelqꞌawi naj,
waxanhka xin chiꞌelqꞌawi naj yu yaqꞌni noho iskꞌul.
31 Yajaꞌ ta chiꞌilcha naj yinh yeleqꞌ tuꞌ,
hujel chaqꞌ meltzoho naj tzet chelqꞌa tuꞌ;
kat yaqꞌni naj sunil tzet ay isselelo yeleqꞌ tuꞌ.
32 Haꞌ ebꞌnaj chishunbꞌa isbꞌa yebꞌ ix ix ay yichamil machi isnabꞌal ebꞌnaj,
yinh hakaꞌ tuꞌ, haꞌtikꞌa ebꞌnaj chiyaqꞌkamo isbꞌa.
33 Chiyil ebꞌnaj isyaꞌtajil yebꞌ takkꞌulal yu tzet chiswatxꞌe tuꞌ.
Machi hunu tzet ye tuꞌ tiꞌ chibꞌutni txꞌixwilal chiswatxꞌe ebꞌnaj tuꞌ.
34 Haꞌ naj winaj chiꞌetalax yu yixal tuꞌ,
hayet chititlemna ishowal naj,
lahan hakaꞌ qꞌa qꞌaꞌ chonhtanhilo yu.
Mach xin chaqꞌ nimankꞌulal naj yet chitit ishowal.
35 Waxanhka kaw txꞌiꞌal sabꞌehal chꞌaqꞌlax tet naj, mach chischah naj.
Machi hunu tzet chꞌaqꞌni ayo iskꞌul naj
yunhe yaqꞌni nimankꞌulal naj yinh mak ay ismul.