Kachbꞌanile yinh kowatxꞌen istxꞌojal
5
»Hach inkꞌahol kaw hajbꞌa hatxikin hawabꞌen inhelanilan,kat kaw hawabꞌen yitzꞌatil inwiꞌan.
2 Hak tuꞌ xin chakꞌubꞌakano kuybꞌanile tiꞌ,
yebꞌ hayet chachtzoteli, haꞌ ishelanil chawala.
3 Ebꞌix ix txꞌoj ye iswiꞌ, kaw chiꞌ istzotel ebꞌix,
kaw kꞌulchꞌan chute ebꞌix yul isnuqꞌ ismonteli.
4 Yajaꞌ haxa yinh islahobꞌal xin chimeltzoko tzet chal ebꞌix tuꞌ yinh kꞌahil,
hakaꞌ kꞌahla anh.
Yebꞌ xin haꞌ tzet chal ebꞌix tuꞌ, chonhlahwi yu,
lahan hakaꞌ chꞌen espada, kabꞌebꞌ yeh ayahtij.
5 Haꞌ ebꞌnaj chꞌok tzujno yinta ebꞌix lanhan isto ebꞌnaj yinh kamikal,
lahan hakaꞌto lanhan isbꞌelwito ebꞌnaj bꞌay chimuji.
6 Ebꞌix tuꞌ, machi yelapno isbꞌehal qꞌinale yul sat ebꞌix.
Machi yok ebꞌix yinh, waxanhka maxhtaj yeko ebꞌix.
7 Yuxin hach inkꞌahol kaw abꞌeto tzet chiwalan,
mach chahekꞌilo habꞌa yinh inkuybꞌaniltiꞌan.
8 Chachel tet ebꞌix txꞌoj ye iswiꞌ tuꞌ,
mach chachhitziko istiꞌ ispulta ebꞌix.
9 Haxinwal mach chakꞌayto iskꞌulchꞌanil hakawil,
yebꞌ xin mach chachaykꞌay yul isqꞌabꞌ anma kaw txꞌoj.
10 Machojabꞌ chꞌelwal makta mach hawohtajo yinh hamelyu yebꞌ yinh hamunil.
11 Ta mach xin chaxhoqꞌ tawinh yinh islahobꞌal yebꞌ nixhtejal hatanhkaniloj.
12 Kat hawalni hakaꞌ tiꞌ: “¡Majaltam mach inyahan kuybꞌanile,
majaltam wabꞌetojan yet kinkachlaxan!
13 ¡Majaltam wabꞌetojan tzet yal ebꞌnaj kinkuynihan!
¡Majaltam inhajbꞌa intxikinan,
intxumnilojan kuybꞌanile aqꞌlax wetan!
14 Kaw hanikꞌxanhe machi kinkankanojan xol isyaꞌtajil
sata sunil anma,” kachimi.
15 Hayet chitaj hatiꞌ chawukꞌ hawaꞌ yul hakꞌuh hawet hachukil,
ha haꞌ chiꞌahilo yul hakꞌuh.a
16 Mach tonhe chatixhto hawaꞌ chꞌahti yul hakꞌuh,
mach chawetato haꞌ chatixhnito haꞌ yulaj bꞌeh.
17 Huneꞌ kꞌuh yebꞌ huneꞌ haꞌ tuꞌ hawetnhe yehi,
mach yeto hunuxa maka.
Mach chawaqꞌ tet hunuxa komon anma.
18 ¡Kaw ayayo iskꞌulal yibꞌanh hakꞌuh!
Aqꞌ tzalaho hakꞌul yebꞌ hawixal bꞌay kach moyi yet tzeh hach.
19 Kaw kꞌulchꞌanojabꞌ ix yul hasat,
hakaꞌ iskꞌulchꞌanil noꞌ qꞌopo sajche.
Sunilojabꞌ tiempo chitzalako ix tawinh yunhe istzala hakꞌul.
20 Hach inkꞌahol, tajka chawaqꞌ somchahoto hanabꞌal yu hunu ix ix txꞌoj ye iswiꞌ,
yinh hakaꞌ tuꞌ,
lahan hach hakaꞌta mach chu hawilni.
¿Tzet yinh xin chabꞌejtzoko habꞌa yul isqꞌabꞌ ix?
21 Yuto sunil tzet chiswatxꞌe anma chiyil Komam.
Wal xin yohta Komam sunil isbꞌeybꞌal anma.
22 Haꞌ ismachiswalilal chiswatxꞌe anma txꞌoj,
haꞌ chꞌaqꞌni aykꞌayoj.
Haꞌtikꞌa ismul ebꞌnaj tuꞌ chikꞌalnayoj.
23 Mach chiyaqꞌ kuyuꞌ isbꞌa ebꞌnaj,
yuxin chito ebꞌnaj yinh kamikal.
Haꞌ islutꞌal ebꞌnaj tuꞌ chiꞌinito yinh kꞌayilal.