Iskꞌulal chaqꞌ helanile jet
4
»Hex kꞌahole hex tiꞌ abꞌewe kuybꞌanile chaqꞌ hemam teyet.Kaw hajbꞌawe hetxikin heyabꞌeni,
haxinwal cheyohtanhelo istoholal.
2 Haꞌ kuybꞌanile chiwaqꞌan teyet kaw kꞌulkanoj,
yuxin mach chenahulnheto hunteqꞌan kuybꞌanile tuꞌ.
3-4 Hakaꞌ yet nichꞌan tzeh hinan,
kinkuylaxan yu inmaman,
kaw xin xahan kinil-laxan yu inmiꞌan. Kiniskuyan inmaman, chalni wetan:
“Haꞌ kuybꞌanile chiwalan tawet tiꞌ kꞌubꞌakano yul hawanma,
kꞌubꞌakano chejbꞌanile chiwaqꞌtiꞌan, haxinwal ay hakawil,” xhi inmaman.
5 Chasayilo helanile, chasaynipaxilo yitzꞌatil wiꞌe.
Mach chanahulnhetoj,
mach chapohpaxilo habꞌa yinh tzet chal intiꞌan.
6 Tzalahanh yinh helanile mach chabꞌejkanoj,
yuto haꞌ chachkolni.
7 Haꞌ helanile yebꞌ iskꞌulal chasayilo bꞌabꞌel sata hunuxa tzet ye tuꞌ.
Ekꞌbꞌalojabꞌ yelapno helanile tuꞌ yul hasat yibꞌanh tzet ayach.
8 Xahannhe helanile tuꞌ, haxinwal haꞌ chiꞌaniko hamay,
tzalahanh yinh, yuto kaw ay yelapno chaxheliko yu.
9 Yu helanile tuꞌ, yuxin kaw kꞌul chaxhelikoj,
lahan hakaꞌta corona ayahto yinh hawiꞌ.
10 Hach inkꞌaholan, kaw hajbꞌa hatxikin yinh tzet chiwaltiꞌan,
haxinwal chihitzto yoj hahabꞌilal yul sat yibꞌanhqꞌinal tiꞌ.
11 Hanintiꞌan chachwijbꞌatojan yul isbꞌehal helanile,
chachwijbꞌakꞌojan yul huneꞌ bꞌeh kaw kꞌul.
12 Yul huneꞌ bꞌeh tuꞌ matzet chaxhaqꞌni txaqꞌmohoj,
waxanhka yinh anhe chachtohi, mach chaxhtxaqꞌmohi.
13 Kaw ako hawanma yinh kuybꞌanile tiꞌ, mach chanahulnhetoj.
Kaw kꞌubꞌakano yinh hanabꞌal, yuto haꞌ chꞌaqꞌni haqꞌinal.
14 Mach chaxhto yul isbꞌeh ebꞌnaj txꞌoj isbꞌeybꞌal,
mach chaxhtopaxo yul isbꞌeh ebꞌnaj chiwatxꞌen ismachiswalilal.
15 Mach chaxhok yul isbꞌeh ebꞌnaj tuꞌ, chaxhel iskꞌatanh ebꞌnaj,
kat halahniko hato yul bꞌeh bꞌay ayachikoj.
16 Yuto hunteqꞌan ebꞌnaj txꞌoj tuꞌ,
mach chiꞌok ebꞌnaj wayoj tato machi istxꞌojal chiswatxꞌe ebꞌnaj yet tzꞌayikal.
Mach aqꞌankꞌulalo chꞌok ebꞌnaj wayoj tato machi hunu mak chiꞌaykꞌay yul isqꞌabꞌ ebꞌnaj.
17 Haꞌ istxꞌojal haꞌ ayko yocho ebꞌnaj,
haxa yaqꞌni ekꞌoyaꞌ ebꞌnaj anma lahan hakaꞌ tzet chukꞌ ebꞌnaj.
18 Wal iskꞌulal chiswatxꞌe ebꞌnaj tohol isbꞌeybꞌal chiyiqꞌkanh yip,
lahan hakaꞌ issajilqꞌinal yet lanhan issajbꞌiloj,
nixhtejal xin kat issajlehiloj masanto kaw chisajbꞌikaniloj.
19 Yajaꞌ wal isbꞌeybꞌal ebꞌnaj txꞌoj,
lahan hakaꞌ qꞌejholo,
yuxin mach chil ebꞌnaj bꞌaytet yinh chitxaqꞌmohi.
20 Hach inkꞌaholtiꞌan, kaw abꞌe tzet chiwalan,
kaw hajbꞌa hatxikin hawabꞌeni.
21 Machojabꞌ chawilo hasat yinh, kꞌubꞌakano yul hawanma.a
22 Yuto haꞌ chiꞌaqꞌni isqꞌinal yebꞌ iskawil makta chiꞌilchalo yu.
23 Ekꞌbꞌal kꞌul chawute hakꞌubꞌan hawanma sata sunil tzet ye tuꞌ kaw chayaꞌilnhe,
yuto yinh hawanma tuꞌ chitit haqꞌinal.
24 Machojabꞌ chawal tzotiꞌ txꞌoj yoki.
Machojabꞌ chawal leqꞌtiꞌal.
25 Yinhnhehojabꞌ istoholal bꞌay chawako hasat,
kat kaw hatꞌanhxito yinh tzet ayko tasataj.
26 Kam chawil bꞌay chachtohi yebꞌ bꞌay chawayo hawoj.
Istoholalnhehojabꞌ tzet chawatxꞌe.
27 Mach chahekꞌilo habꞌa yul bꞌeh bꞌay ayachikoj,
mach chaxhto xol istxꞌojal.