Kuybꞌanile yinh tzet chu istzujchapno helanile ju
3
»Hach inkꞌahol,mach chanahulnheto kuybꞌanile chiwaqꞌan tawet,
kꞌubꞌakano yul hawanma chejbꞌanile chiwaqꞌan;
2 haxinwal nimajal yoj hakawil yul sat yibꞌanhqꞌinal tiꞌ.
Kaw aynhetikꞌako xin aqꞌankꞌulal yul hawanma.
3 Mach chabꞌej hawalni isyelal,
yebꞌ haxahannhen hawet anmahil.
Kanojabꞌkano hunteqꞌan tiꞌ yinh hanabꞌal,
tzujanojabꞌnhetikꞌa tawintaj hakaꞌ yeko yuwe hunu ix ix.
4 Ta hak tuꞌ, kaw chitzala Komam Dios tawinh,
yebꞌ xin kꞌul istzotelpaxo anma tawinh.
5 Kawxojabꞌ hakꞌul yinh Komam Dios yinh sunil hawanma.
Machojabꞌ chikawxi hakꞌul yinh yitzꞌatil hawiꞌ.
6 Nati Komam Dios yinh sunil tzet chawatxꞌe,
haxinwal Komam chachinito yul isbꞌehal istoholal.
7 Machojabꞌ chawala ta kaw ay tzet hawohtaj,
wal xin iyo habꞌa tet Komam Dios,
kat hapohnilo habꞌa yinh istxꞌojal.
8 Yuto hunteqꞌan tuꞌ, lahan hakaꞌ anh chꞌaqꞌni yip konimanil.
9 Ayojabꞌ yelapno Komam yul hasat,
aqꞌ hayebꞌalqꞌabꞌ tet Komam Dios yinh tzet ayach,
kat hawaqꞌni bꞌabꞌel sat hatzꞌunubꞌ tet Komam.
10 Haxinwal kaw chinohilo hakꞌunha
yebꞌ chinohilo bꞌay chawayto havino.
11 Hach inkꞌahol mach chayah kuybꞌanile chaqꞌ Komam.
Mach chititpaxo hahowal yet chachiskuyni.
12 Yuto haꞌ mak kaw xahan ay yu Komam chaqꞌ Komam iskuybꞌanil,
hakaꞌ chu iskuyni naj mame iskꞌahol kaw xahan ay yu.
13 Saqꞌal yet mak chiꞌilchalo helanile
yu yebꞌ kaw ay isnabꞌal.
14 Yuto kaw ekꞌbꞌal yelapno tuꞌ sata chꞌen plata,
yebꞌ xin ekꞌbꞌal iskꞌulal chaqꞌ sata chꞌen oro.
15 Haꞌ helanile tuꞌ ekꞌbꞌal yelapno istohol sata ej chꞌen chꞌen kꞌulchꞌan jilni.
Helanile tuꞌ mach chu islahbꞌalax yebꞌ tzet ye tuꞌ kaw ochebꞌil.
16 Haꞌ helanile tuꞌ chꞌaqꞌni kawile kaw nimajal yoj,
chaqꞌnipaxo qꞌalomal yebꞌ chako hamay.
17 Hayet chonhok tzujno yinta helanile tuꞌ kaw saqꞌalkanoj.
Hayet chonhok yul isbꞌehal helanile tuꞌ chaqꞌ aqꞌankꞌulal.
18 Haꞌ mak chiꞌilchalo helanile tuꞌ yu,
haꞌ qꞌinale chiꞌilchalo yu.
Saqꞌal yet mak chiyaꞌilnhen huneꞌ helanile tuꞌ.
19 Yu ishelanil Komam Dios yebꞌ yu yitzꞌatil iswiꞌ iswatxꞌe satkanh yebꞌ txꞌo txꞌotxꞌ.
20 Yu ishelanil Komam ispoh isbꞌa haꞌ mar,
kat xin yay txꞌihna nhabꞌ yu moyan.
21 Hach inkꞌahol, kꞌubꞌa hachejbꞌanil yebꞌ hakuybꞌanil chiwaqꞌan,
machojabꞌ chawilo hamujlubꞌal yinh hunteqꞌan tuꞌ.
22 Yuto haꞌ chꞌaqꞌni haqꞌinal,
yebꞌ xin kꞌul chaxheliko sata anma yu.
23 Bꞌajxanhetuꞌwal chaxhtohi yinh sunil hawanma chachekꞌi.
Machi bꞌaqꞌinhal xin chaxhtxaqꞌmohi.
24 Hayet chaxhxewi, machi bꞌaytet chaxhxiwi,
haxa yet chaxhok wayoj chaxhway yinh aqꞌankꞌulal.
25 Mach chaxhxiw tet huchanil chuli,
yet tona nahul ay hach,
mach chaxhxiwpaxokanh yet chawabꞌen istanhtzelaxilo anma txꞌoj.
26 Yuto haꞌ Komam chiꞌaqꞌni iskawxobꞌal hakꞌul,
kat chaxhiskolnilo Komam yunhe mach chaxhaykꞌay yul latzꞌabꞌ.
27 Tato chu hakolwa yinh hunu maka,
mach chamanhkꞌo hakolwa yinh yet chisqꞌanni tawet.
28 Tato chu hakolwa yinh tinanh,
mach chawala tato hekalto chaxhkolwa yinh.
29 Ta ay hunu hawet anmahil,
chikawxi iskꞌul tawinh,
mach chatxumiko istxꞌojal yinh.
30 Machi mak yebꞌ chawaqꞌle howal yinh isnabꞌnhehal,
tato machi mak chꞌaqꞌni howal tawinh.
31 Mach chichiwako hakꞌul yinh anma mach toholo isbꞌeybꞌal,
mach chaxhok tzujno yinh isbꞌeybꞌal.
32 Yuto Komam Dios chisyah Komam makta chiwatxꞌen istxꞌojal,
wal anma kꞌul isbꞌeybꞌal xin ayko Komam iskꞌatanh.
33 Haꞌ yul yatut anma txꞌoj isbꞌeybꞌal aynhetikꞌayo istzꞌaktiꞌ Komam Dios yibꞌanh,
wal yul yatut anma kꞌul isbꞌeybꞌal ayayo iskꞌulal Komam yibꞌanh.
34 Chibꞌuchwa Komam yinh anma bꞌuchwawom,
wal anma chewchotanhe chiyute isbꞌa,
kaw kꞌul chil Komam.
35 Haꞌ mak ay ishelanil chꞌalaxiko ismay,
yaj wal mak kaw lutꞌ chute isbꞌa,
kaw ochebꞌil yu istxꞌojal chiswatxꞌe.