Iskꞌulal chiyaqꞌ helanile jet
2
»Hach inkꞌaholtiꞌan abꞌeto tzet chiwalan,kꞌubꞌa hachejbꞌanil chiwaqꞌtiꞌan yinh hawanma.
2 Hajbꞌa hatxikin hawabꞌen helanile,
kat hawaniko hawanma yinh.
3 Qꞌan hahelanil yebꞌ yitzꞌatil hawiꞌ yinh sunil hawanma.
4 Kaw aqꞌ hawanma hasayniloj.
Kaw sayiloj hakaꞌta chꞌen plata yebꞌ hakaꞌta hunu qꞌalomal ewanyehi.
5 Ta hak tuꞌ chawute, chawohtanhelo yinh tzet chu jinayo kobꞌa tet Komam Dios,
kat yilchalo hawu yinh tzet chu johtanhenilo Komam.
6 Haꞌ Komam Dios chꞌaqꞌni nabꞌale,
yu tzet chal Komam yu istiꞌ yuxin ay yitzꞌatil wiꞌe yebꞌ helanile.
7 Haꞌ Komam chꞌaqꞌni helanile kaw kꞌul tet mak tohol isbꞌeybꞌal.
Haꞌ Komam chikolwa yinh makta chibꞌeybꞌalnhen istoholal.
8 Haꞌ Komam chiꞌilni makta chꞌekꞌ yinh istoholal,
kat istanhen makta yijem.
9 Tato chahajbꞌa hatxikin yinh inkuybꞌanilan chawohtanhelo istoholal,
yebꞌ isyelal, yebꞌ islahanil yelapno anma yul hasat, yebꞌ bꞌeybꞌale kaw kꞌul.
10 Hak tuꞌ chu yapni helanile yinh hanabꞌal,
kat hawohtanhenilo ischiꞌal tzet chawabꞌe tuꞌ.
11 Haꞌ nabꞌale yebꞌ helanile, naunhe chachiskolni,
12 haꞌ chachkolni tet bꞌeybꞌale machiswalil yebꞌ tet anma txꞌoj tzet chala;
13 tet anma chibꞌejnikano huneꞌ bꞌeh kaw tohol,
kat isbꞌelwi xol qꞌejholo.
14 Hunteqꞌan anma tuꞌ, chiyaqꞌ tzalaho iskꞌul yet chiswatxꞌen istxꞌojal,
kat tzala iskꞌul yu istxꞌojal chiswatxꞌe tuꞌ.
15 Hunteqꞌan tuꞌ, lanhan isbꞌelwi yul bꞌeh kotxkiltanhe yekꞌi,
isbꞌejkano ebꞌnaj bꞌeybꞌale kꞌul.
16 Haꞌ helanile tuꞌ chachiskolpaxo yul isqꞌabꞌ ix ix txꞌoj ye iswiꞌ,
ix kꞌulchꞌan istzoteli yunhe kach ismonteni;
17 ix moyina yet qꞌopo, bꞌejbꞌilkano xin yichamil tuꞌ yu, isnahulnhento ix chejbꞌanile.
18 Haꞌ mak chibꞌelwito yul isbꞌehal yatut ix tuꞌ,
lanhan isbꞌelwito yul isbꞌehal kamikal.
19 Haꞌ ebꞌnaj chiꞌokto yul yatut ix tuꞌ matxa chimeltzo ebꞌnaj,
matxa bꞌaqꞌinhal chibꞌelwikꞌo ebꞌnaj yul isbꞌehal qꞌinale.
20 Ekꞌanh yinh bꞌeybꞌale kꞌul,
kat habꞌeybꞌalnhen isbꞌeybꞌal ebꞌnaj chiwatxꞌen istoholal.
21 Yuto haꞌ mak chꞌekꞌ yinh istoholal yebꞌ kꞌul isbꞌeybꞌal,
haꞌ chiꞌekꞌ nahatil tiempo sat txꞌo txꞌotxꞌ tiꞌ.a
22 Walpaxo anma txꞌoj isbꞌeybꞌal yebꞌ etam anma,
chiꞌilaxilo sat txꞌo txꞌotxꞌ tiꞌ.