3 Inhin hinbꞌahan yebꞌ wanmahan waqꞌni tzalaho inkꞌulan yu vino, wute hinbꞌahan hakaꞌ mak machi isnabꞌal, yajaꞌ kaw nan wuhan yuto ijbꞌabꞌil hinan yu inhelanilan. Wochehan wohtanhelojan tzet ye tuꞌ kaw niman yelapnoj, chiswatxꞌen anma yalanh satkanh, yulbꞌal istiempohal chiꞌekꞌ yul sat yibꞌanhqꞌinal tiꞌ. 4 Kaw txꞌiꞌal nime tzet ye tuꞌ kinokan inwatxꞌepaxojan. Inwatxꞌenkanhan watutan, intzꞌunnihan teꞌ uva. 5 Inwatxꞌenkanhan hunteqꞌan bꞌay hintzꞌunan teꞌ kaj, intzꞌunnihan teꞌ kaj yebꞌ sunil teꞌ lobꞌehal. 6 Inwatxꞌehan nimeta tanque bꞌay chiꞌetxi ha haꞌ yu hinhayenan teꞌ hinhat chꞌok qꞌebꞌtajil. 7 Yebꞌ xin inloqꞌan ebꞌnaj inchejabꞌan yebꞌ ebꞌix inchejabꞌan, yebꞌ xin aypaxo inchejabꞌan pitzkꞌana watutan; kaw xin nimankano isbꞌisil inwakaxan yebꞌ inmeꞌan sata sunil ebꞌnaj ekꞌlena insatajan bꞌey Jerusalén. 8 Intenbꞌanan chꞌen plata yebꞌ chꞌen oro watutan, yebꞌ tzet ochebꞌil xol isqꞌalomal ebꞌnaj rey, yebꞌ elna xol iskꞌuwanbꞌal ej konhobꞌlaj. Aypaxo ebꞌnaj winaj yebꞌ ebꞌix ix chibꞌitni inkꞌatanhan yebꞌ sunil munlabꞌal yet bꞌit; waqꞌnihan tzet yoche wanmahan.

9 Kaw nime winaj kinelkanikojan, yebꞌ kaw ahkanokanh inqꞌalomalan sata sunil ebꞌnaj ekꞌlena insatajan bꞌey Jerusalén tiꞌ, kaw xin aypaxo inhelanilan. 10 Waqꞌan sunil tzet yoche insatan, waqꞌnipaxojan sunil tzet yoche wanmahan, waqꞌ tzalaho wanmahan yinh sunil inmunilan; haꞌ ton tzalahilal tuꞌ aqꞌlax ispajoj.

11 Lahwi tuꞌ wilnihan sunil munil inwatxꞌe tuꞌan, haꞌ ton hunteqꞌan munil waqꞌ wanmahan inwatxꞌenan; hak tuꞌ yu innanilojan tato haꞌ sunil tuꞌ matzet chal yelapnoj, nabꞌnhe ekꞌyaꞌ wanmahan inwatxꞌenan, matzet yaqꞌ wetan yalanh yoj tzꞌayik.

12 Lahwi tuꞌ wokpaxojan wilnojan helanile yebꞌ tzetaj maxhtaj yehi yebꞌ sukal; ¿tzetto wal chitoiswatxꞌe hunuxa naj chiꞌok reyal yinhto tzujanilxa? Machi hunu tzet; wal xin haꞌtikꞌa tzet watxꞌebꞌilxa haꞌtikꞌa chiꞌok naj iswatxꞌepaxoj. 13 Ilbꞌilxa wuhan tato helanile ekꞌbꞌal kꞌul sata manhnabꞌalehal, hakaꞌ iskꞌulal sajilqꞌinal xol qꞌejholo.

15 Walnihan yebꞌ wanmahan: «Haꞌ tzet chihul yinh naj machi isnabꞌal haꞌ chihulpaxo winhan: ¿Tzet xin yinh waqꞌ wipan wiqꞌni inhelaniltiꞌan?» kinchihan. Walnipaxojan yebꞌ wanmahan hakaꞌ tiꞌ: «Haꞌ sunil hunteqꞌan tiꞌ nabꞌnhe,» kinchihan. 16 Yuto haꞌ mak ay ishelanil yebꞌ mak machi ishelanil matxa bꞌaqꞌinh chinahlaxtij, wal xin chinahulnhelaxkantoj. Haꞌ mak ay ishelanil chikam hakaꞌ chu iskam mak machi isnabꞌal.

17 Inyahnihan inkawilan sat yibꞌanhqꞌinal tiꞌ, yuto haꞌ sunil munil inwatxꞌehan kaw tibꞌayilo wuhan, intxumnipaxilojan tato kaw matzet chal yelapnoj, nabꞌanhe kinekꞌyaꞌan yinh munil tuꞌ.

18 Inyahnipaxojan sunil munil inwatxꞌehan yalanh yoj tzꞌayik, yuto haꞌ tzet inwatxꞌe tuꞌan haxa tet mak chihul wintajan tzujaniloxa, haꞌ bꞌay chikani. 19 ¿Yaj mak ohtanhe ta ay isnabꞌal maka mach isnabꞌal huneꞌ mak bꞌay chikankano sunil inmunilan bꞌay kinekꞌyaꞌan inwatxꞌenan xol yoj tzꞌayik? Haꞌ hunteqꞌan tiꞌ nabꞌnhepaxoj, matzet chaliloj.

20 Yokpaxo bꞌiskꞌulal yinh wanmahan yinh sunil inmunilan inwatxꞌehan yu sunil inhelanilan bꞌay kinekꞌyaꞌan yalanh yoj tzꞌayik. 21 ¡Nabꞌanhe chimunla naj winaj yinh ismunil yinh sunil ishelanil, yebꞌ yitzꞌatil iswiꞌ, yebꞌ yinh istoholal, yuto haꞌ tet mak mach ekꞌyaꞌ ismunlahi, haꞌ tet chikankano isqꞌalomal naj! Haꞌ huneꞌ munil tuꞌ kaw nabꞌnhe, yebꞌ xin mach kꞌulo hakaꞌ tuꞌ, kaw txꞌoj.

22 Yuto ¿tzet chiyiqꞌ naj winaj yinh sunil ismunil bꞌay kaw chitinhxi yanma xol qꞌaꞌ sat yibꞌanhqꞌinal tiꞌ? 23 Sunilbꞌal istiempohal ay naj sat yibꞌanhqꞌinal tiꞌ yaꞌnhetikꞌa ay isnimanil naj, yebꞌ tonhetikꞌa chiꞌekꞌyaꞌ naj yinh ismunil, machi xewpaxo yanma naj yet aqꞌbꞌalil. Haꞌ hunteqꞌan tiꞌ kaw nabꞌnhe.

24 Haꞌ huneꞌ kꞌul iswatxꞌen naj winaj, haꞌ ton iswaꞌ naj, yebꞌ yukꞌni tzet chukꞌ yibꞌanh yoch, chaqꞌni tzalaho iskꞌul naj yinh sat ismunil. Chiwohtanhenan ta hunteqꞌan tuꞌ tet Komam Dios chitita. 25 Yuto ¿mak hunu tiꞌ chiloni tzet chislo, yebꞌ mak chitzala iskꞌul ischukil ta maxhtaj Komam chiꞌaqꞌni tet? 26 Yuto haꞌ naj winaj bꞌay chitzala Komam Dios chiyaqꞌ Komam ishelanil, isnabꞌal yebꞌ tzalahilal tet naj, walpaxo ebꞌnaj mulum xin chiꞌaqꞌlax munil tet ebꞌnaj, chistenbꞌan ebꞌnaj isqꞌalomal; haxa isqꞌalomal ebꞌnaj tuꞌ xin chiꞌaqꞌlax tet anma chiwatxꞌen tzet chal iskꞌul Komam. Haꞌ huneꞌ tuꞌ matzet chal yelapnoj, nabꞌanhe chiꞌekꞌyaꞌ yanma ebꞌnaj yinh ismunil tuꞌ.