2. YAꞌ CHIHALNILTO TZOTIꞌ CHAL YAꞌ YINH TZET YELAPNO YE ISQꞌINAL ANMA YUL YIBꞌANHQꞌINAL TIꞌ
(3:1–12:8)
Sunil tzet ye tuꞌ ayko yinh istxolal istzꞌayikal
3
Sunil tzet ye tuꞌ ay istzꞌayikal,sunil tzet chijoche kowatxꞌe yalanh satkanh ay yorahil.
2 Ay istzꞌayikal bꞌay chipitzkꞌa anma,
ay istzꞌayikal bꞌay chikampaxo anma; ay istzꞌayikal bꞌay chitzꞌunlax tzꞌunubꞌ,
aypaxo istzꞌayikal bꞌay chihokꞌlaxkanh tzet tzꞌunbꞌil.
3 Ay istzꞌayikal bꞌay chimaqꞌlaxkamo anma,
aypaxo istzꞌayikal bꞌay chiꞌanhtelax anma;
ay istzꞌayikal bꞌay chiꞌuchkꞌalaxayo teꞌ nha,
aypaxo istzꞌayikal bꞌay chiwatxꞌelaxkanh teꞌ nha.
4 Ay istzꞌayikal bꞌay chiꞌoqꞌ anma,
aypaxo istzꞌayikal bꞌay chitzebꞌi anma;
ay istzꞌayikal bꞌay bꞌiskꞌulal ye anma,
aypaxo istzꞌayikal bꞌay chikanhalwi yu tzalahilal.
5 Ay istzꞌayikal bꞌay chitixhlaxto chꞌen chꞌen,
aypaxo istzꞌayikal bꞌay chikutxbꞌalaxiko chꞌen;
ay istzꞌayikal bꞌay chislaqꞌle isbꞌa anma,
aypaxo istzꞌayikal bꞌay mach chislaqꞌle isbꞌa.
6 Ay istzꞌayikal bꞌay chisaylax tzetaj ye tuꞌ,
aypaxo istzꞌayikal bꞌay chikꞌaytoj;
ay istzꞌayikal bꞌay chikꞌubꞌalax tzetaj ye tuꞌ,
aypaxo istzꞌayikal bꞌay chiqꞌojlaxtoj.
7 Ay istzꞌayikal bꞌay chitzil-laxto hunu xilqꞌape,
aypaxo istzꞌayikal bꞌay chitzꞌislaxayoj;
ay istzꞌayikal bꞌay mach chitzotel anma,
aypaxo istzꞌayikal bꞌay chitzoteli.
8 Ay istzꞌayikal bꞌay chisxahannhe isbꞌa anma,
aypaxo istzꞌayikal bꞌay chisyahlekanh isbꞌa anma;
ay istzꞌayikal howal,
aypaxo istzꞌayikal aqꞌankꞌulal.
9 ¿Tzet chiyiqꞌ naj winaj yinh ismunil bꞌay kaw chiꞌekꞌyaꞌ ismunlahi? 10 Xawilan munil chiyaqꞌ Komam Dios yubꞌ ebꞌnaj winaj yu yekꞌ yu. 11 Kaw kꞌulchꞌan yu iswatxꞌenkano Komam Dios sunil yinh istzꞌayikal. Yaqꞌ Komam ishelanil isnabꞌal anma yohtanhen yinh tzet chu yekꞌto ej tzꞌayik; waxanhka xin mach chitxumcha yu anma tzetaj iswatxꞌe Komam yet yichebꞌanil, yebꞌ tzetaj chiswatxꞌe yinh islahobꞌal.a
12 Wohtanhenilojan tato machi hunuxa tzet ye tuꞌ tiꞌ wal kowatxꞌeni, kachannhe kotzalahi, kat kowatxꞌen iskꞌulal yulbꞌal istzꞌayikal yet itzitzonhto. 13 Yebꞌ xin haꞌ Komam Dios chiꞌaqꞌni huneꞌ iskꞌulal jet kowaꞌi, chijukꞌni tzet chijukꞌ yibꞌanh tzet chikolo, chijaqꞌni tzalaho kokꞌul yinh sunil tzet chiyaqꞌ komunil jet. 14 Intxumnipaxilojan tato sunil tzet chiswatxꞌe Komam Dios aynhetikꞌa yinh sunilbꞌal ej tiempo.
Haꞌ tzet chiswatxꞌe Komam tuꞌ mach chu yalaxiko yaqꞌbꞌil,
mach chu yilaxpaxilo yaqꞌbꞌil;
iswatxꞌe Komam hakaꞌ tuꞌ yunhe isxiw ebꞌnaj winaj sata Komam.b
15 Haꞌ tzet ay tinanh ayxatikꞌa yet payxa,
haꞌ tzet chito yuhi ayxatikꞌapaxo yet payxa,
tonhe chismeltzobꞌtanhe isbꞌa yu Komam Dios.
Ay tzet ye tuꞌ mach toholo chibꞌeybꞌalnhelaxi
16 Wilnihan isbꞌeybꞌal anma yalanh yoj tzꞌayik,
haꞌ xin istxꞌojal yaqꞌ anma selelo istoholal,
yebꞌ xin ismachiswalilal haꞌ iswatxꞌe anma selelo iskꞌulal.c
17 Walnihan yebꞌ wanmahan hakaꞌ tiꞌ: «Haꞌ anma tohol isbꞌeybꞌal yebꞌ anma txꞌoj, haꞌ Komam Dios chiꞌilni yinh tzet chꞌelikoj, yuto chiꞌapni istzꞌayikal bꞌay chiyil Komam yinh tzet chiꞌeliko yinh tzet chiyoche, yebꞌ xin yinh tzet chiswatxꞌe,» kinchihan.
18 Walnipaxojan yebꞌ wanmahan hakaꞌ tiꞌ: «Hak tiꞌ chꞌeliko hakaꞌ tiꞌ, chiyayo Komam Dios ilwebꞌal yibꞌanh ebꞌnaj winaj yu yohtanheniloj tato lahan ebꞌnaj hakaꞌ no noqꞌ,» kinchihan. 19 Yuto naj winaj yebꞌ no noqꞌ, lahan chu istanhkanoj; chikam naj winaj, chikampaxo no noqꞌ. Lahan chu ishiqꞌni naj jaqꞌeqꞌ hakaꞌ ishiqꞌnipaxo no noqꞌ jaqꞌeqꞌ; matzet ay ekꞌbꞌal naj winaj yibꞌanh no noqꞌ, yuto sunil tzet ye tuꞌ, matzet chal yelapnoj.
20 Huneꞌnhetikꞌa haꞌ chu istanhkano naj winaj yebꞌ no noqꞌ,
yuto yinh pojoj watxꞌelax naj winaj yebꞌ no noqꞌ,
hak tuꞌ xin chu ismeltzopaxiko pojojal.
21 ¿Mak yohtaj tato haꞌ yanma naj winaj chito satkanh, kat istopaxkano yanma no noqꞌ yalanhayto txꞌo txꞌotxꞌ?d
22 Yuxin wilan tato machi hunu tzet ye tuꞌ kaw kꞌul sata yaqꞌni tzalaho iskꞌul naj winaj yinh tzet chiqꞌ yinh ismunil, yuto haꞌ chiꞌaqꞌlax ispajo tet naj; ¿yuxin mak chu yaqꞌni meltzoho naj yilaꞌ tzet chiyu yet kamomxa naj?