4
Lahwi tuꞌ inmeltzohan wilnipaxojan sunil istxꞌojal chiswatxꞌe ebꞌnaj winaj yalanh yoj tzꞌayik yul sat yibꞌanhqꞌinal tiꞌ. Wilnihan yoqꞌ anma chiꞌetalaxi, machi mak xin chiꞌaqꞌni yaqꞌlobꞌal iskꞌul; haꞌ ebꞌnaj chiꞌetan anma tuꞌ kaw aykanokanh yip ebꞌnaj, machi mak xin chikolnilo anma yul isqꞌabꞌ ebꞌnaj. 2 Intxumnihan tato kaw kꞌul yet anma kamom sata anma itzitzto.a 3 Yajaꞌ kaw xin ekꞌbꞌalto kꞌul yet mak maxhto chipitzkꞌahi sata kamom anma yebꞌ anma itzitzto; yuto haꞌ mak maxhto chipitzkꞌahi, maxhto chiyil istxꞌojal chiwatxꞌelax yul sat yibꞌanhqꞌinal tiꞌ.4 Wilnipaxojan, tato haꞌ mak kaw chimunlahi, kat ischꞌibꞌkanh isqꞌalomal, chiꞌok ishowal yet anmahil yinh. Haꞌ huneꞌ tuꞌ nabꞌanhe, matzet chaliloj.
5 Haꞌ mak machi isnabꞌal, chiskulusnhe isqꞌabꞌ,
chaqꞌ kamo isbꞌa ischukil.
6 Ekꞌbꞌalto kꞌul hunnhe bꞌetx ay yul isqꞌabꞌ,
tanhe tzalahilal yehi, sata ta kaw niman tzet aya,
mach xin aqꞌankꞌulalo yehi yu chꞌekꞌkano yaꞌ yu munil.
7 Inmeltzohan hunelxa, wilnipaxojan yaqꞌbꞌilxa tzet ye tuꞌ mach yelapnoj yalanh yoj tzꞌayik. 8 Ay mak tiꞌ ischukilnhechꞌan, machi mak chikan seleloj yet chikami; machi yuninal, machi yuxhtaj, yajaꞌ xin maxhtikꞌa chixewninoj, maxhtikꞌa xin chinoh iskꞌul yinh isqꞌalomal, yajaꞌ xin mach chisqꞌambꞌe hakaꞌ tiꞌ: «¿Mak yu yuxin kaw chinmunlahan? ¿tzet yinh xin kaw chiweta inkꞌulan?» Mach xhihoj. Haꞌ huneꞌ mak tuꞌ nabꞌanhe chiꞌekꞌyaꞌ ismunlahi.
9 Kaw kꞌul yinh kawanh anma chimunlahi, sata ta ischukil, hayet chischani istohol niman chischah yu ismunil. 10 Ta chiꞌaykꞌay hunuj, haꞌ huneꞌxa yetbꞌi chiꞌinikanh, yajaꞌ ta ischukilnhe, machi mak chiꞌinikanh. 11 Yebꞌpaxo xin ta hun chiway kawanh anma chiqꞌaxnakanh, yajaꞌ ¿tzet chu isqꞌaxnakanh ischukil? 12 Ta ischukilnhe hunu mak chiyaqꞌ howal, mach chiqꞌoji, yajaꞌ ta kawanh yiqꞌni isbꞌa, ay yip isqꞌoji; yebꞌ xin hakaꞌ hunu txꞌanh txꞌanh oxebꞌ pajan chijuteyoj, mach subꞌuta istꞌinhmohi.
13 Ekꞌbꞌalto kꞌul hunu naj tzeh mebꞌaꞌ ay yitzꞌatil iswiꞌ,
sata hunu naj rey kaw ichamxa yebꞌ kaw lutꞌ,
mach chischah yabꞌeꞌ hunu kuybꞌanile.
14 Waxanhka yul preso ispeto naj tzeh tuꞌ,
waxanhka mebꞌaꞌ naj, yajaꞌ chꞌok reyal.
15 Wilnihan anma tzujaniko yinta naj tzeh tuꞌ, chalni anma tato kꞌul yok naj reyal selelo naj ichamxa tuꞌ. 16 Kaw xin mach isbꞌi hanta isbꞌisil anma tzujaniko yinta naj kaw chitzalako yinh naj, yajaꞌ wal yuninal anma tuꞌ matxa chitzala yinh naj yet bꞌaqꞌinh. Haꞌ huneꞌ tuꞌ nabꞌnhe, matzet chaliloj, bꞌiskꞌulal chaqꞌ tet janma.