Mach kꞌuloj ta chikotaqꞌweko hunu tzet ye tuꞌ jibꞌanh yinh anhe
5
Hayet chaxhto yul Yatut Komam Dios nanhkꞌulal chaxhoktoj, kat hahitziko hawabꞌeni, mach tonhe chawaqꞌ haxahanbꞌal hakaꞌ chiyute anma mach isnabꞌal, mach chistxumu ta txꞌoj chiyu.2 Mach yinh anheho chawal yu hatiꞌ maka yinh hawanma hayijen hunu tzet ye tuꞌ sata Komam Dios; yuto haꞌ Komam yul satkanh aya, wal hach xin sat txꞌo txꞌotxꞌ ay hach, yuxin machojabꞌ nimano tzet chawala. 3 Yuto yu txꞌiꞌal tzet ye tuꞌ chatxumu yuxin chisyeko isbꞌa hunteqꞌan tzet ye tuꞌ yinh hasat, yebꞌpaxo xin ta tzetkꞌa hatzoteli aypaxo tzotiꞌ maxhtaj haꞌ ye chawala.
4 Hayet chataqꞌweniko tawinh hayijen hunu tzet ye tuꞌ tet Komam Dios, machojabꞌ chiꞌekꞌto istzꞌayikal hayijeni, yuto haꞌ mak tonhe chistaqꞌweko yinh machi xin chisyije, mach chitzala Komam Dios yinh. Haꞌ tzet chataqꞌweko tawibꞌanh yilal hayijeni. 5 Ekꞌbꞌal kꞌul matzet chataqꞌweko tawibꞌanh sata ta chataqꞌweko tawibꞌanh, machi xin chayijepaxoj.a
6 Machojabꞌ chawako hamul yu tzet chawala, chawalni sata ischejabꞌ Komam Dios tato mach nano hawu yinh tzet hawala; yinh hakaꞌ tuꞌ hach kaw hach chawaqꞌtij ishowal Komam Dios tawibꞌanh, chꞌetaxto tzet chawatxꞌe yu tzet chawala.
7 Haꞌ mak kaw echo iswayikli yebꞌ echo istzoteli matzet chiswatxꞌe, nabꞌnhe. Wal hach tiꞌ xin xiwanh tet Komam Dios.
Isnabꞌnhehal tzet chiwatxꞌelax yul sat yibꞌanhqꞌinal tiꞌ
8 Ta chawil yetalax anma mebꞌaꞌ yul konhobꞌ, kat hawilnipaxoj tato mach chiyijelax istoholal yebꞌ iskꞌulal, mach chikꞌay hakꞌul hawilni huneꞌ tuꞌ, yuto naj ay yelapnoj aytopaxo huneꞌ naj kaw ekꞌbꞌal yelapnoj chikolni naj, haxa ebꞌnaj kawanh tuꞌ ayto huneꞌxa naj kaw ekꞌbꞌalkano yelapno chikolni ebꞌnaj.b 9 Chalni ebꞌnaj ta hak tuꞌ chiyu yahkanokanh konhobꞌ, yebꞌ ta haꞌ naj rey chitanhen anma komon.
10 Haꞌ mak chiꞌochen chꞌen melyu,
maxhtikꞌa chiyiqꞌ iskꞌul,
hakpax tuꞌ mak chiꞌochen qꞌalomal
mach chinoh iskꞌul yinh tzet aya,
wal xin kaw choche yaqꞌbꞌil.
Haꞌ huneꞌ tuꞌ nabꞌnhe, matzet chaliloj.
11 Hayet chichꞌibꞌkanh isqꞌalomal hunu maka
chipohpaxokanh mak chilonito isqꞌalomal tuꞌ.
¿Tzet chaqꞌ qꞌalomal tet yahaw munil,
hanhkꞌanhem yilni naj yekꞌ qꞌalomal yul isqꞌabꞌ?
12 Kaw chiꞌ iswayanh naj munlawom waxanhka ay tzet chislo naj maka matzet chislo naj, yajaꞌ wal naj qꞌalom, mach chiway naj yu isqꞌalomal.
13 Ay huneꞌ tzet ye tuꞌ bꞌiskꞌulal chiyu sat yibꞌanhqꞌinal tiꞌ, haꞌ ton yinh mak chistenbꞌa isqꞌalomal, mach xin yohtajoj ta haꞌ isqꞌalomal tuꞌ txꞌoj chitit yibꞌanh yu. 14 Chiskꞌaytzelo isqꞌalomal tuꞌ yinh tzettaj ye tuꞌ matzet chiyaqꞌ tet, hak tuꞌ xin matxa tzet chikankano yul isqꞌabꞌ yuninal yet bꞌaqꞌinh. 15 Tꞌilan yu ispitzkꞌa yinh ismiꞌ, tꞌilan chu ismeltzopaxoj; hakaꞌ yu ispitzkꞌahi, hak tuꞌ chu ismeltzohi. Machi qꞌalomal chitoj yet chikami. 16 Haꞌ huneꞌ tiꞌ kaw bꞌiskꞌulal, yuxin ¿tzet chiqꞌ naj winaj ismunla yinh isnabꞌnhehal? 17 Yebꞌpaxo xin sunilbꞌal tzꞌayik chiwaꞌ naj xol qꞌejholo yinh yekꞌyaꞌ yebꞌ yaqꞌlen isyaꞌtajil yebꞌ yetan iskꞌul.
18 Haꞌ iskꞌulal chiwilan, haꞌ ton kowaꞌi, yebꞌ jukꞌni tzet chijukꞌu, kat jochen tzet chaqꞌ komunil jet, bꞌay chonhekꞌyaꞌ yalanh yoj tzꞌayik yinh sunilbꞌal tiempo ayonh sat yibꞌanhqꞌinal tiꞌ, yuto haꞌ huneꞌ tuꞌ chaqꞌ Komam ispaj selelo jet.c 19 Yebꞌpaxo hunxa tiꞌ, tato chiyaqꞌ Komam Dios tzet ay ebꞌnaj winaj yebꞌ qꞌalomal tet ebꞌnaj, yu islohni yinh tzalahilal. Chischah ismajul kat istzala iskꞌul yinh ismunil, haꞌ huneꞌ tuꞌ, haꞌ Komam Dios chisani tet. 20 Hak tuꞌ xin matxa chisnati hunteqꞌan tzꞌayik xaleekꞌto sat yibꞌanhqꞌinal tiꞌ, yuto haꞌ Komam Dios chiꞌaqꞌni tzalahilal yul yanma.