6
Aypaxo huneꞌ istxꞌojal wilan yalanh satkanh tiꞌ, naunhe chiyuni xol ebꞌnaj winaj sat yibꞌanhqꞌinal tiꞌ. 2 Ay mak tiꞌ chaqꞌ Komam Dios niman isqꞌalomal yebꞌ chaqꞌ Komam ismay, sunil tzet chiyoche ay yul isqꞌabꞌ, yajaꞌ xin mach chaqꞌ Komam Dios isqꞌalomal naj tuꞌ yocheꞌ, wal xin nanxa mak chiꞌochenkanoj. Haꞌ huneꞌ tuꞌ kaw nabꞌnhe, matzet chaliloj, yebꞌ xin kaw bꞌiskꞌulalkanoj.a 3 Waxanhka ay hunu naj winaj tiꞌ ay hunu 100 (hokꞌal) yuninal, yebꞌ xin kaw txꞌiꞌal habꞌil chꞌekꞌ yul sat yibꞌanhqꞌinal tiꞌ, yajaꞌ ta mach chaqꞌ iskꞌulal yoche yanma, yebꞌ ta mach ismujbꞌal, ekꞌbꞌalto kꞌul hakaꞌ nixhte unin tonhe chꞌel yinh ismiꞌ maxhto istzꞌayikal ispitzkꞌahi, sata huneꞌ mak tuꞌ.b4 Haꞌ nixhte unin hakaꞌ tuꞌ nabꞌanhe chuli,
tonhe chitokano xol qꞌejholo, matxa mak xin chinaniti isbꞌi.c
5 Yebꞌpaxo xin mach yil sajilqꞌinal mach yilpaxo tzꞌayik,
yajaꞌ xin ekꞌbꞌalto kꞌul chixew sata huneꞌxa naj tuꞌ. 6 Waxanhka kabꞌ mil habꞌil chꞌekꞌ huneꞌ naj tuꞌ, yajaꞌ ta mach yaqꞌ naj iskꞌulal yocheꞌ yanma, haxa yinh islahobꞌal xin, ¿tom mach huneꞌnhe bꞌay chitokano naj yebꞌ nixhte unin tonhe chꞌel yinh ismiꞌ?
7 Naj munlawom, chimunla naj yu iswaꞌi,
yajaꞌ xin maxhtikꞌa chinoh iskꞌul naj.
8 ¿Tom ekꞌbꞌalto hunu naj ay isnabꞌal sata hunu naj machi isnabꞌal? ¿yebꞌ tom ekꞌbꞌalto naj mebꞌa, kꞌul chute isbꞌa xol yet anmahil? 9 Ekꞌbꞌalto kꞌul jochen jilni tzet ayonh, sata ta tonhe chijocheko tzetaj ye tuꞌ. Haꞌ huneꞌ tuꞌ nabꞌanhe, matzet chaliloj.
10 Haꞌ tzet ye tuꞌ ay tinanh payxataxtikꞌa yichi isbꞌinahi, ohtabꞌilxatikꞌapaxoj. Haꞌ mak machi kaw yip, mach chu iskajlen isbꞌa yebꞌ mak kaw aykano yip.
11 Yinh kaw yeli haꞌ mak kaw echo istzoteli ay tzotiꞌ tiꞌ mach yelapnoj chala, ¿tzet xin chiyiqꞌ naj winaj yinh huneꞌ tuꞌ?
12 Yuxin ¿mak yohta bꞌaytet ej iskꞌulal chiyaqꞌle naj winaj yet itzitz, yuto lahan isqꞌinal naj hakaꞌ yenhel hunu tzet ye tuꞌ chitanhayoj? ¿Mak xin chihalni tet naj yet kamomxa naj yinh tzet chiyu yul sat yibꞌanhqꞌinal tiꞌ yinh tzujaniloxa?d