Haꞌ mak ay ishelanil mach chischah isbꞌa tzet chiswatxꞌe yebꞌ mak machi isnabꞌal
7
Haꞌ mak kꞌul istzotel anma yinh,ekꞌbꞌalto kꞌul, sata anh kaw xuqꞌ sam kaw ay istohol chijako jinh.
Ekꞌbꞌal kꞌul istzꞌayikal yet chonhkami sata istzꞌayikal yet chonhpitzkꞌahi.
2 Ekꞌbꞌalto kꞌul kotoh ilo aqꞌbꞌal bꞌay ay hunu kamom sata kotoh bꞌay ay qꞌinh,
yuto haꞌ kamikal tuꞌ haꞌ ayko konhistanhtzenilo kosunil,
haꞌ huneꞌ tuꞌ kꞌul konanitij hanhonh itzitzonh tiꞌ.
3 Ekꞌbꞌalto kꞌul joqꞌi sata kotzebꞌi,
waxanhka bꞌiskꞌulal chiꞌeliko kosat yet chonhoqꞌ tuꞌ,
yajaꞌ wal janma xin kaw chꞌaqꞌlo iskꞌul.
4 Haꞌ mak ay ishelanil chiꞌekꞌ isnabꞌal yinh yet anmahil chikami,
wal mak machi isnabꞌal hanhkꞌanhe bꞌay ay tzalahilal chiꞌekꞌ yinh yanma.
5 Ekꞌbꞌalto kꞌul jabꞌen kachbꞌanil chiyaqꞌ ebꞌnaj ay isnabꞌal
sata jabꞌen bꞌit chiyako ebꞌnaj machi isnabꞌal.
6 Hayet chitzebꞌi ebꞌnaj machi isnabꞌal,
lahan hakaꞌ yet chiꞌah qꞌaꞌ yinh teꞌ txꞌix yalanh hunu xi,
haꞌ huneꞌ tuꞌ nabꞌnhe, matzet chaliloj.
7 Yinh kaw yeli haꞌ istxꞌojal, chetato isnabꞌal ebꞌnaj ay ishelanil;
hakpax tuꞌ chꞌen melyu chihaltelax yinh ewantajil tet ebꞌnaj ay isnabꞌal tuꞌ,
chꞌetaxto yanma ebꞌnaj yu chꞌen.
8 Ekꞌbꞌalto kꞌul yet chitanhayo hunu txonh sata yet chiꞌichikoj.
Ekꞌbꞌalto kꞌul chewchotanhe chijute kobꞌa sata jinikanh kobꞌa.
9 Machojabꞌ yinh anhe chititlemna hahowal, yuto haꞌ mak yinh anhe chitit ishowal machi isnabꞌal.
10 Machojabꞌ chaqꞌambꞌe kat hawalni hakaꞌ tiꞌ: «¿Tzet yinh xin haꞌ yet payat kaw ekꞌbꞌalto kꞌul sata tinanh?» tajka kachi; yuto haꞌ mak chiqꞌambꞌen hakaꞌ tuꞌ machi isnabꞌal.
11 Kaw kꞌul yet mak ay ishelanil, kat ischahnipaxo ismajul, yuto kaw kꞌul yinh mak ay yalanh yoj tzꞌayik. 12 Yuto haꞌ helanile chonhiskolo, hakaꞌ chu iskolwa chꞌen melyu jinh, yajaꞌ helanile tuꞌ ekꞌbꞌal yelapno yibꞌanh sunil tzet ye tuꞌ, yuto chiyaqꞌ kawile tet mak ay ishelanil tuꞌ.
13 Kam ilah yinh tzet watxꞌebꞌil yu Komam Dios, ¿Aymi hunu mak chu istoholbꞌanhen tzet kotxbꞌabꞌil yu Komam? 14 Hayet ayayo istzꞌayikal iskꞌulal tawibꞌanh oche iskꞌulal, haxa yet chiꞌayilo istzꞌayikal isyaꞌtajil tawibꞌanh okanh tuknoj, chatxumni ta haꞌ Komam Dios watxꞌenhe iskꞌulal haꞌ watxꞌenpaxo isyaꞌtajil, yuxin mach yohtajo naj winaj tzet chul yinh naj hekal kabꞌe.
15 Haꞌ yulbꞌal istzꞌayikal inkawilan kaw matzet chaliloj, xawilan sunil hunteqꞌan tiꞌ; ay anma kaw kꞌul isbꞌeybꞌal chikami, waxanhka haꞌ istoholal chiswatxꞌe, aypaxo xin anma kaw txꞌoj isbꞌeybꞌal, yajaꞌ chihitzto yoj iskawil sat yibꞌanhqꞌinal tiꞌ waxanhka istxꞌojal chiswatxꞌe.
16 Machojabꞌ chipalkꞌon hawuten habꞌa kaw kꞌulal,
yebꞌ xin machojabꞌ chaxhpalkꞌon hawuten habꞌa yinh kaw ay hahelanil,
yuto hach kawach chawetato habꞌa yinh hakaꞌ tuꞌ.
17 Machojabꞌ chaxhpalkꞌon hawatxꞌen istxꞌojal, mach chawute habꞌa sukal,
¿tzet yinh chaxhkami yalanhto yet maxhto chul hakamikal?
18 Kaw kꞌul tato chitzabꞌcha hunu tzet ye tuꞌ hawu yu huneꞌ haqꞌabꞌ,
yajaꞌ mach chabꞌejtzo tzet tzabꞌilayo hawu yu huneꞌxa haqꞌabꞌ;
yuto haꞌ mak chixiw tet Komam Dios kaw kꞌul chiꞌeliko yinh sunil tzet chiswatxꞌe.
19 Haꞌ mak ay yitzꞌatil iswiꞌ chischah yip yu ishelanil tuꞌ
sata 10 (lahonhwanh) ebꞌnaj winaj kaw aykano yip ay yul hunu konhobꞌ.
20 Yinh kaw yeli machi hunu naj winaj kaw toholkano sat txꞌo txꞌotxꞌ tiꞌ chiwatxꞌen iskꞌulal; machi hunu mak tiꞌ xin mach chako ismul.
21 Machojabꞌ chawako yinh hawanma hawabꞌen sunil tzet chihal-laxi, haxinwal mach chawabꞌe istxꞌojal tzet chal ebꞌnaj hachejabꞌ tawinh. 22 Yuto yohta hawanma tato ay bꞌay txꞌiꞌal el txꞌoj hatzotel yinh hawet anmahil.
23 Haꞌ yinh sunil innabꞌalan wilwehan sunil hunteqꞌan tiꞌ, walnihan hakaꞌ tiꞌ: «Chinhin hinbꞌahan intzujnayojan helanile,» kinchihan. Yajaꞌ xin helanile tuꞌ ishekꞌilo isbꞌa wetan. 24 Haꞌ tzet xayuhi nahatxa yeloj, haꞌ tzet kaw nahat yehayto yich ¿maktaxka chu yohtanheniloj iskachbꞌanil?
25 Inmeltzohan waqꞌni wanmahan wohtanhenilojan tzet yehi. Inkuynihan yebꞌ xin insaynihan helanile yebꞌ nabꞌale yu wohtanhenilojan istxꞌojal yebꞌ issukal yebꞌ tzetaj maxhtaj ye iswatxꞌebꞌanil.
26 Haꞌ tzet ilchalo wuhan, ekꞌbꞌalto bꞌiskꞌulal sata kamikal,
haꞌ ton ix ix chimonten naj winaj chiꞌaqꞌni aykꞌayo naj.
Haꞌ naj winaj chiyijen tzet chiyal Komam Dios mach chiꞌaykꞌay naj yul isqꞌabꞌ ix;
wal naj txꞌojtikꞌa isnabꞌal xin chiꞌaykꞌay naj yu ix.
27 «Abꞌe xin,» xhi yaꞌ chihalnilto tzotiꞌ. «Malebꞌilxa sunil tzetaj ye tuꞌ wuhan yinh hununtajil, yu wohtanhenilojan bꞌaytet haꞌ yekoj. 28 Haꞌ tzet kaw insayikꞌojan mach ilchalo wuhan.
Haꞌ xol mil ebꞌnaj winaj huneꞌnhe naj kaw ay yelapno xaꞌilchalo wuhan;
wal xol ebꞌix ix machi hunu ix ay yelapno ilchalo wuhan.
29 »Haꞌ xol sunil tuꞌ, hunchꞌannhe tzet ilchalo wuhan; wal Komam Dios, kaw tohol yu iswatxꞌen anma, yajaꞌ haxa anma yetato isbꞌa, iswatxꞌen txꞌiꞌal istxꞌojal,» xhi yaꞌ.