8
¿Mak chu islahbꞌalax yebꞌ mak ay isnabꞌal?¿Mak hakaꞌ naj chisje yalnilo tzet yelapno hunu tzet ye tuꞌ?
Haꞌ helanile tuꞌ chiꞌaqꞌni tzalaho sat mak ay ishelanil,
kat yaqꞌni tzebꞌo sat mak how yilni.
2 Chiwalan tawet tato chayije ischejbꞌanil naj rey,
hakaꞌ yu hataqꞌweniko tawibꞌanh sata Komam.
3 Mach yinh anheho chachelti sata naj rey;
mach xin chalutꞌnhe habꞌa yinh hunu tzotiꞌ txꞌoj sata naj,
yuto haꞌ tzet chal iskꞌul naj haꞌ chiswatxꞌe naj.
4 Yuto haꞌ tzet chiyal naj rey tuꞌ mach chu ismanhkꞌolaxi.
Machi hunu mak tiꞌ chu isqꞌambꞌen tet naj,
«¿tzet chawatxꞌe?» mach xhihoj.
5 Haꞌ mak chiyijen chejbꞌanile, machi isyaꞌtajil chitit yibꞌanh,
haꞌ mak ay ishelanil yohtaj bꞌaqꞌinh yebꞌ xin yinh tzet chu isyijen chejbꞌanile.
6 Yuto sunil tzet chijoche kowatxꞌeꞌ ay istzꞌayikal yebꞌ ay istxolal yinh tzet chu kowatxꞌeni,
waxanhka xin ay isyaꞌtajil chiyaqꞌle naj winaj,
7 to mach yohtajo tzet chitit yibꞌanh yebꞌ tzet tzꞌayikal, yuto machi mak chihalni tet.
8 Machi hunu mak ay yip yibꞌanh iskawil, mach chu ishitzni yoj iskawil,
machipaxo hunu mak ay yip yibꞌanh kamikal.
Mach chu iskolni isbꞌa tet kamikal yu chꞌen chꞌen yet howal.
Yebꞌpaxo xin haꞌ mak chiwatxꞌen istxꞌojal mach chu iskol-laxiloj.
9 Haꞌ sunil hunteqꞌan tiꞌ wilan yet wokan wilnojan sunil tzet chiwatxꞌelax yalanh yoj tzꞌayik, hayet chiqꞌnikanh yip naj winaj chiswatxꞌe naj istxꞌojal yinh yet anmahil.
Ay hunteqꞌan tzet chiwatxꞌelaxi mach chischale isbꞌa
10 Wilan ebꞌnaj txꞌoj isbꞌeybꞌal kaw alaxiko ismay ebꞌnaj yu anma yet ismujlaxi, wal ebꞌnaj aynhetikꞌa bꞌey ehobꞌal kaw kꞌul, machi mak chinaniti ebꞌnaj yul iskonhobꞌ bꞌay iswatxꞌe ebꞌnaj istoholal. Haꞌ huneꞌ tiꞌ xin nabꞌnhe. 11 Yu machi alaxayo isyaꞌtajil yinh anhe yibꞌanh mak chiwatxꞌen istxꞌojal, yuxin hanhkꞌanhe istxꞌojal chako ebꞌnaj kꞌahole yinh iskꞌul iswatxꞌeni. 12 Waxanhka 100 (hokꞌal) el chiswatxꞌe anma mulum istxꞌojal, kat ishitzpaxto yoj iskawil sat yibꞌanhqꞌinal, yajaꞌ wal hanintiꞌan wohtajan tato haꞌ mak ay yelapno Komam Dios yul sat, kat isxiw sata Komam, kꞌul chiyilaꞌ. 13 Wal ebꞌnaj chiwatxꞌen istxꞌojal, txꞌoj chiꞌeliko ebꞌnaj, haꞌ iskawil ebꞌnaj sat yibꞌanhqꞌinal tiꞌ chiꞌekꞌto hakaꞌ yenhel hunu tzet ye tuꞌ, yuto mach chixiw ebꞌnaj sata Komam Dios.
14 Haꞌ yul sat yibꞌanhqꞌinal tiꞌ, ay tzet ye tuꞌ tiꞌ machi yelapno chiwatxꞌelaxi. Ay anma tiꞌ tohol isbꞌeybꞌal chiyil isyaꞌtajil hakaꞌto ay istxꞌojal chiswatxꞌe; aypaxo anma txꞌoj isbꞌeybꞌal, kꞌul chiyila hakaꞌto iskꞌulalnhe chiswatxꞌe. Haꞌ chu intxumnihan yinh huneꞌ tiꞌ, nabꞌnhe, matzet chaliloj.
15 Yuxin chiwalan tato tzalahilal kaw kꞌulkanoj, machi hunuxa tzet ye tuꞌ tiꞌ kꞌul yinh naj winaj sat yibꞌanhqꞌinal tiꞌ, kachannhe iswaꞌi yebꞌ yukꞌni tzet chukꞌu, kat yaqꞌni tzalaho iskꞌul; yuto haꞌ tuꞌ chiyiqꞌ naj yinh ismunil yu Komam Dios yulbꞌal tiempo itzitz naj yalanh yoj tzꞌayik.
16 Hanintiꞌan waqꞌ wanmahan wohtanhenilojan helanile, wilnihan yebꞌ wohtanhenilojan sunil munil chiwatxꞌelax yul sat yibꞌanhqꞌinal tiꞌ. 17 Wilnihan ta haꞌ sunil tzet chiswatxꞌe Komam Dios yul sat yibꞌanhqꞌinal tiꞌ, mach chitxumchalo yu anma; waxanhka kaw chiꞌekꞌyaꞌ yochen istxumniloj, machi txumchalo yu. Waxanhka chiyal ebꞌnaj winaj kaw ay ishelanil tato yohta ebꞌnaj, yajaꞌ xin machi qꞌoji ebꞌnaj yohtanheniloj.