9
Yinh kaw yeli waqꞌ wanmahan wohtanhenilojan sunil tzetaj ye tuꞌ, hak tuꞌ yu wohtanhenilojan sunil hunteqꞌan tiꞌ. Haꞌ ebꞌnaj tohol isbꞌeybꞌal yebꞌ ebꞌnaj ay isnabꞌal yebꞌ tzetaj chiswatxꞌe ebꞌnaj, sunil tuꞌ yul isqꞌabꞌ Komam Dios aya. Haꞌ anma, matzet yohtaj yibꞌanhilo yinh isxahannhen isbꞌa maka ischiwa iskꞌul yinh yet anmahil, waxanhka ayko yinh sat, yajaꞌ mach chitxumcha yu.2 Hunlahannhe chꞌelkaniko anma sunil,
haꞌ tzet chihul yinh anma tohol isbꞌeybꞌal,
chihulpaxo yinh anma txꞌoj isbꞌeybꞌal;
haꞌ tzet chihul yinh anma kꞌul yebꞌ anma saj yehi,
haꞌ chihulpaxo yinh anma mach sajo yehi.
Haꞌ tzet chihul yinh anma chiyaqꞌ isxahanbꞌal,
haꞌ chihulpaxo yinh anma mach chiyaqꞌ isxahanbꞌal;
haꞌ tzet chihul yinh anma machi ismul,
haꞌ chulpaxo yinh anma ay ismul.
Haꞌ tzet chihul yinh anma chiꞌaqꞌni bꞌinaho isbꞌi Komam Dios yinh hunu tzet ye tuꞌ,
haꞌ chihulpaxo yinh anma chixiw yaqꞌni bꞌinaho isbꞌi Komam.
3 Haꞌ xol sunil tzet chiyu anma yalanh yoj tzꞌayik ay huneꞌ tzet ye tuꞌ tiꞌ kaw bꞌiskꞌulal, yuto lahan chiꞌelkaniko anma sunil; yebꞌ xin nohna yanma anma yu istxꞌojal, chiswatxꞌenpaxo issukal yulbꞌal itzitz sat yibꞌanhqꞌinal tiꞌ, lahwi tuꞌ, kat iskami, kat istokano xol anma kamom.
4 Haꞌ anma itzitz ayto iskawxobꞌal iskꞌul, yuto ekꞌbꞌalto kꞌul hunu metx txꞌiꞌ itzitz sata hunu noꞌ bꞌalam kamomxa.
5 Yuto haꞌ anma itzitz yohtaj tato chikami, yajaꞌ wal anma kamom matxa tzet yohtajoj, machi istohol chischahpaxoj, wal xin nahulnhebꞌilxato yu anma. 6 Haꞌ anma tuꞌ xatanhpaxilo iskꞌulchꞌanil iskꞌul, ishowal, yebꞌ ischichon iskꞌul yinh yet anmahil, matxa bꞌaqꞌinhal xin ay yok yinh tzet chiwatxꞌi yalanh yoj tzꞌayik.
7 Asiꞌ kat hawaꞌ yinh tzalahilal, yinh tzalahilal chawukꞌpaxo havino,
yuto haꞌ tzet hawatxꞌe kaw kꞌul yul sat Komam Dios.
8 Sunilbꞌalojabꞌ tiempo saj xil haqꞌap,
machojabꞌ bꞌaqꞌin chitanh hawanahto anh kaw xuqꞌ sam xol xil hawiꞌ.
9 Aqꞌ tzalaho hakꞌul yebꞌ hawixal kaw chawoche sat yibꞌanhqꞌinal tiꞌ,
yuto haꞌ hakawil, nabꞌnhe matzet chaliloj.
Haꞌ tzalahilal tuꞌ chiꞌaqꞌlax ispaj selelo tawet sat yibꞌanhqꞌinal tiꞌ,
kat hawaqꞌnipaxo tzalaho hakꞌul yinh tzet chiyaqꞌ hamunil bꞌay chachekꞌ yaꞌ yalanh yoj tzꞌayik.
10 Sunil tzet chaxhqꞌojwi hawatxꞌeni, watxꞌe hatatikꞌa hawip,
yuto haꞌ yul kambꞌal bꞌay chachapni matzet chiwatxꞌelaxi,
machi munil, machi nabꞌale, machipaxo helanile.
11 Inmeltzohan wilnipaxojan hunteqꞌan tzet ye tuꞌ yalanh yoj tzꞌayik.
Machnhetaj ebꞌnaj helan yaqꞌni anhe chiꞌapni bꞌabꞌel,
maxhnhetajpaxo ebꞌnaj ay yip chiqꞌoji yinh howal;
maxhnhetajpaxo ebꞌnaj ay ishelanil ay tzet chislo;
machnhetaj ebꞌnaj ay isnabꞌal ay isqꞌalomal,
machnhetaj ebꞌnaj kuywina ay yelapno yul sat anma,
wal xin tet hunun mak chꞌapni istzꞌayikal, yebꞌ yilchalo yu.
12 Yebꞌpaxo xin machi hunu mak yohta bꞌaqꞌinh chihul isyaꞌtajil yinh.
Lahan anma hakaꞌ noꞌ kay chiꞌaykꞌay yul txꞌanh hakꞌ,
maka hakaꞌ chu yaykꞌay noꞌ chꞌik yul txꞌanh txꞌanh,
hak tuꞌ chu yaykꞌay ebꞌnaj winaj yinh istiempohal isyaꞌtajil chinhehul lemna yibꞌanh ebꞌnaj.
13 Yebꞌpaxo xin wilan huneꞌ helanile yul sat yibꞌanhqꞌinal tiꞌ, chiyaqꞌ huneꞌ niman kuybꞌanile jet. 14 Ay huneꞌ nichꞌan konhobꞌ, haywanhnhe xin ebꞌnaj winaj ay bꞌey tuꞌ, yapni huneꞌ naj rey kaw ay yip, yebꞌ issoldado yanoko howal yinh huneꞌ nichꞌan konhobꞌ tuꞌ, ishoynayo ebꞌnaj yebꞌ ischꞌen yet howal. 15 Yajaꞌ haꞌ yul huneꞌ konhobꞌ tuꞌ ay huneꞌ naj winaj mebꞌaꞌ, kaw helan. Iskolnilo naj konhobꞌ tuꞌ yu ishelanil, yajaꞌ xin machi hunu mak chꞌekꞌ yinh isnabꞌal yinh naj mebꞌaꞌ tuꞌ. 16 Walnihan hakaꞌ tiꞌ: «Ekꞌbꞌal yelapno helanile sata hunu mak kaw ay yip; waxanhkami xin ishelanil naj mebꞌaꞌ machi yelapno yul sat anma, mach xin chischah anma yabꞌeꞌ tzet chal naj,» kinchihan.
17 Haꞌ tzotiꞌ chiyal ebꞌnaj ay ishelanil yinh aqꞌankꞌulal chischah anma yabꞌeꞌ,
yuto ekꞌbꞌalto kꞌul sata yet chiꞌel yaw naj yahaw konhobꞌ xol anma mach isnabꞌal.
18 Kꞌulto yitzꞌatil wiꞌe sata chꞌen munlabꞌal yet howal,
yajaꞌ hunchꞌannhe istxꞌojal chiwatxꞌelaxi, kaw niman tzet ye tuꞌ chiꞌetaxto yu.