Kꞌulchꞌankano helanile
10
Haꞌ noꞌ kamom us chito xol anh kaw xuqꞌ sam, chiꞌetaxto isxuqꞌal sam anh tuꞌ yu noꞌ;hak tuꞌ naj winaj kaw ay yelapnoj yebꞌ kaw ay ishelanil,
tato ay nichꞌano issukal bꞌay chiꞌaykꞌay naj.
2 Haꞌ yanma mak ay yitzꞌatil iswiꞌ ayko yinh iskꞌul iswatxꞌen iskꞌulal yu iswatxꞌqꞌabꞌ,
walpaxo tzet choche mak machi isnabꞌal hanhe iswatxꞌen istxꞌojal yu ismekqꞌabꞌ.
3 Haꞌ mak machi isnabꞌal hayet chꞌekꞌ yul bꞌeh chisyenilo tato mach yitzꞌatil iswiꞌ;
haꞌ xin kaw chalilo isbꞌa tet anma tato machi isnabꞌal.
4 Waxanhka chitit ishowal naj yahaw konhobꞌ tawinh,
wal xin mach chakꞌayto hachewchotajil,
yuto haꞌ mak chewchotanhe chute isbꞌa chitanhayo nimeta howal yu.
5 Ay huneꞌ istxꞌojal wilan chiswatxꞌe ebꞌnaj yahaw konhobꞌ sat yibꞌanhqꞌinal tiꞌ yalanh yoj tzꞌayik, 6 yuto haꞌ tet ebꞌnaj machi isnabꞌal chiꞌaqꞌlax munil kaw niman yelapnoj, wal tet ebꞌnaj qꞌalom xin, haꞌ munil machi yelapno chiꞌaqꞌlax tet ebꞌnaj. 7 Wilnipaxojan yekꞌ ebꞌnaj chejabꞌ yibꞌanh cheh, wal ebꞌnaj yahaw konhobꞌ xin yoj ebꞌnaj chiꞌinikoj, hakaꞌto chejabꞌ ye ebꞌnaj.
8 Haꞌ mak chiwatxꞌen hunu holan haꞌtikꞌa chiꞌaykꞌayto yul holan tuꞌ;
haꞌ mak chiholni iskꞌul kꞌubꞌ chichilax yu noꞌ labꞌa.
9 Haꞌ mak chihosni chꞌen chꞌen, chilahwi yu chꞌen;
haꞌ mak chipohni teꞌ siꞌ ay ismay istzokꞌnito isbꞌa.
10 Tato matxa ye hunu chꞌen eche, niman ip chitoj,
yajaꞌ tato chꞌahti ye chꞌen mach nimano ip chitoj,
yajaꞌ huneꞌ kaw kꞌul yilal yokniko yitzꞌatil wiꞌe.
11 Tato bꞌabꞌel chichilax naj chiꞌaqꞌni ayo iskꞌul noꞌ labꞌa,
matzet chꞌoknikoj naj chꞌaqꞌni ayo iskꞌul noꞌ labꞌa tuꞌ.
12 Haꞌ tzotiꞌ chiꞌelti yul istiꞌ mak ay isnabꞌal kaw saqꞌal yoki;
wal mak machi isnabꞌal, haꞌ tzotiꞌ chꞌelti yul istiꞌ haꞌtikꞌa chiꞌetantoj.
13 Hayet chiꞌichiko istzoteli, haꞌ tzotiꞌ machi yelapno chiyala,
haxa yet chilahwi istzotel xin haꞌ tzotiꞌ kaw txꞌoj chala.
14 Haꞌ mak machi isnabꞌal kaw echo istzoteli,
yajaꞌ xin machi hunu mak yohtaj tzet chihul sataj,
yuxin ¿mak hunu chu yalnilo tet tzet chiyu yet matxa ayokꞌoj?
15 Haꞌ mak machi isnabꞌal, chipaxkano yip yu yekꞌyaꞌ ismunlahi,
yuxin matxa chitxumcha isbꞌelal konhobꞌ yu yet chimeltzohi.
16 Kaw kꞌanchꞌan anma tato ay hunu isreyal kaw nichꞌanto,
yebꞌ ta chisajbꞌinilo ebꞌnaj yahaw konhobꞌ isqꞌinhnheni.
17 ¡Kaw saqꞌal yet anma haꞌ iskꞌahol ebꞌnaj winaj kaw ay yelapno ayko isreyaloj,
yebꞌ xin haꞌ ebꞌnaj yahawil chiwaꞌ yinh yorahil yu yiqꞌni yip,
mach yuho yukꞌikanh!
18 Haꞌ mak isah tonhe chislaqꞌ isqꞌabꞌ chiyilni yaykꞌay iswiꞌ yatut,
yuxin nimeta tzꞌu chiꞌay yul yatut tuꞌ yet chiyaqꞌni haꞌ nhabꞌ.
19 Haꞌ wah chiꞌok yinh qꞌinh kaw chinoh iskꞌul anma yu,
kat istzalapaxo yanma anma yu vino;
haꞌ chꞌen melyu sunil tzet chiyu yu chꞌen.
20 Machojabꞌ chiꞌekꞌ istxꞌojal yinh hanabꞌal yinh naj rey,
yebꞌ xin mach chaxhtzotel yinh ewantajil yul hawatut yinh ebꞌnaj qꞌalom,
kꞌuxantaxka isto noꞌ chꞌik yalno tet ebꞌnaj.