11
Qꞌojayto hapan xol ha haꞌ, yuto yet xaꞌekꞌto txꞌiꞌal tzꞌayik,kat yilchapaxo hawu hunelxa.a
2 Itxqꞌako tzet ayach yinh hujwanh, maka waxajwanh hawet anmahil,
yuto machi hawohtajo tzet isyaꞌtajil chihul yibꞌanh txꞌo txꞌotxꞌ.
3 Tato ay haꞌ nhabꞌ iqꞌbꞌil yu moyan, haꞌ yibꞌanh txꞌo txꞌotxꞌ chiꞌay haꞌ nhabꞌ tuꞌ.
Hayet chiꞌaykꞌay hunu teꞌ qꞌebꞌtaj yinh yetkꞌulal sur maka norte,
haꞌ bꞌay chiꞌaykꞌay teꞌ haꞌtikꞌa tuꞌ chikankano teꞌ.
4 Haꞌ mak chiꞌok ilno jaqꞌeqꞌ, machi bꞌaqꞌinh chiꞌok istzꞌunuꞌ istzꞌunubꞌ;
maka mak chiꞌok ilno moyan machi bꞌaqꞌinh chihatxꞌwi.
5 Hakaꞌ jaqꞌeqꞌ, mach hawohtajo bꞌay chitohi, mach hawohtajopaxoj tzet chu ischꞌibꞌ isbꞌajil nixhte unin yet ijbꞌiliko yu ismiꞌ, hak tuꞌ xin mach hawohtajopaxo tzet chiswatxꞌe Komam Dios, Komam chiwatxꞌen sunil tzetaj ye tuꞌ.
6 Tzꞌun habꞌabꞌel tzꞌunubꞌ, lahwi tuꞌ kat hatzꞌunnipaxo hatzujan tzꞌunubꞌ, yuto mach hawohtajoj bꞌaytet tzꞌunubꞌ kꞌul chꞌelikoj, mato haꞌ bꞌabꞌel tzꞌunubꞌ makato haꞌ tzujan tzꞌunubꞌ, makato kꞌul chꞌeliko iskabꞌ majanil.
7 Haꞌ issajilqꞌinal kaw saqꞌal jilni, kaw saqꞌal jilnipaxo yoj tzꞌayik. 8 Yajaꞌ waxanhka ay hunu naj winaj tiꞌ kaw txꞌiꞌal habꞌil iskawil yul sat yibꞌanhqꞌinal tiꞌ, yebꞌ xin tzalahilalnhetikꞌa chila, yajaꞌ yilal isnahnitij ta haꞌ tiempo chiꞌehikꞌo yul kambꞌal xol qꞌejholo kaw nimankanoj. Haꞌ sunil tzet chihuli nabꞌanhe, matzet chaliloj.
Kuybꞌanile tet ebꞌnaj tzehtaj
9 Hach tzeh hach tiꞌ oche hatzehal, aqꞌ tzalaho hakꞌul yulbꞌal istzꞌayikal hatzehal, aqꞌ tzet choche hawanma yebꞌ tzet chil isbꞌaqꞌ hasat, yajaꞌ yilal chawohtanheloj tato haꞌ Komam Dios chiꞌilni tzet chachelikoj yinh sunil tzet chawatxꞌe. 10 Ilo chíwakꞌulal yinh hawanma, hitzanhilo yinh istxꞌojal chiꞌetanto hanimanil, yuto haꞌ istzꞌayikal hatzehal yul sat yibꞌanhqꞌinal tiꞌ nabꞌnhe, matzet chaliloj.