12
Nati Komam Dios kach watxꞌeni yulbꞌal istzꞌayikal hatzehal,yalanhto maxhto chihul hunteqꞌan tzꞌayikal bꞌay chul isyaꞌtajil tawinh, yebꞌ istiempohal bꞌay chawala:
«Machi nino chitzala inkꞌulan,» kachi.
2 Nati Komam tinanh, yalanhto maxhto chitanhilo ismujli tzꞌayik, sajilqꞌinal,
ixahaw yebꞌ txꞌumel,
kat ismoyanbꞌilo yet lahwi yaqꞌnikanilo haꞌ nhabꞌ.a
3 Yet chiluylunkanh ebꞌnaj chitanhen teꞌ nha,
yet kꞌonhanxa ye ebꞌnaj winaj kaw ay yip,
yet matxa haweh chikachꞌni tzet chaloh,
yebꞌ chitanhilo yip isbꞌaqꞌ hasat chimujliti yul wentanah.
4 Yet matxa chawabꞌe tzet chiyu yulaj bꞌeh,
yet matxa chawabꞌe isbꞌilipaxo chꞌen kaꞌ,
yet chibꞌitni noꞌ chꞌik yinh hasat, yajaꞌ matxa chawabꞌe.
5 Yet chachxiw hawekꞌ yibꞌanh bꞌay nahat yekanh,
yebꞌ yinh tzet chiyu tawinh yulaj bꞌeh,
yet chisajbꞌilo xil hawiꞌ hakaꞌ isxumakli teꞌ almendro,
yebꞌ noꞌ qꞌul ijatz chuko noꞌ tawinh chawabꞌe.
Hayet ichamachxa tuꞌ matxa chaxhnhochahi,
yuto lanhanxa hato yul hawehobꞌal yinh sunilbꞌal tiempo,
haxa yulaj bꞌeh xin yoqꞌxakanh anma yu hakamxa.
6 Nati Komam kach watxꞌeni yalanhto maxhto chilinhmo hacadena plata,
yebꞌ yet maxhto chipohto haxi nabꞌa oro,
yebꞌ maxhto chipohto hatzꞌahabꞌ istiꞌ ha haꞌ,
yebꞌ yet maxhto chiqꞌahto te teꞌ chibꞌaqꞌonati haꞌ yul kꞌuh.
7 Yebꞌ yet yalanhto maxhto chimeltzoko hanimanil pojojal,
hakaꞌtikꞌa ye yet yalanhtokanoj,
kat ismeltzo hawanma iskꞌatanh Komam Dios, Komam kach watxꞌeni.b
8 Yalni yaꞌ chihalnilto tzotiꞌ hakaꞌ tiꞌ:
«Haꞌ sunil tzetaj ye tuꞌ nabꞌanhe, nabꞌanhe, matzet chaliloj,» xhi yaꞌ.
3. ISTANHBꞌANIL KUYBꞌANILE
(12:9-14)
Islahobꞌal tzotiꞌ yibꞌanhilo tzet yilal iswatxꞌen naj winaj
9 Hayet yahkanokanh ishelanil yaꞌ chihalnilto tzotiꞌ, ahpaxkanokanh iskuyni yaꞌ anma yinh helanile; kaw kam yohtanhe yaꞌ helanile tuꞌ, iskam iskuynipaxo yaꞌ, txꞌiꞌal kuybꞌanile kaw ay yelapnoj yakaniko yaꞌ yinh istxolal. 10 Haꞌ yaꞌ chihalnilto tzotiꞌ tuꞌ, kaw yako yaꞌ yinh iskꞌul issayni tzotiꞌ saqꞌal yoki; istzꞌibꞌnhen yaꞌ tzotiꞌ kaw yel chala yebꞌ kaw haꞌ yehi.
11 Haꞌ tzet yelapno tzotiꞌ chal ebꞌnaj ay ishelanil, lahan hakaꞌ te teꞌ xixiꞌ ye iswiꞌ, haxa yet chihunayo istzotiꞌ ebꞌnaj kuywawom, huneꞌnhe xin naj ijbꞌalomal chihalni, lahan hakaꞌ chꞌen lawuxh pahbꞌilkanh. 12 Yuxin wal tinanh hach kꞌahol, yintajilo hunteqꞌan kuybꞌanile chihal-laxkano tiꞌ, nanojabꞌnhe hawu tato teꞌ libro machi islahobꞌal iswatxꞌelax teꞌ, yebꞌpaxo xin, ta kaw chaxhkuywi chitibꞌayo hawu.
13 Haꞌ bꞌay chilahwikano sunil hunteqꞌan kuybꞌanile tiꞌ, haꞌ ton tiꞌ: Xiwanh tet Komam Dios, kat hayijen chejbꞌanile chaqꞌ Komam, yuto haꞌ huneꞌ tiꞌ yilal isyijen naj winaj. 14 Yuto chiꞌilchahoti sunil anma yu Komam Dios yinh sunil tzet chiswatxꞌe, yebꞌ hunteqꞌan tzet kꞌul maka txꞌoj chiwatxꞌelax yinh ewantajil.