Ix ixale:
2
Hanintiꞌan lahan hinan hakaꞌ teꞌ rosa chichꞌibꞌ bꞌey Sarón,ayebꞌ hakaꞌ teꞌ lirio chichꞌibꞌ sat akꞌal.
Naj ichamile:
2 Haꞌ ix bꞌay kaw ayko wanmahan,
lahan yeko ix xol yet qꞌopohal hakaꞌ yehikto teꞌ lirio xolaj teꞌ txꞌix.
Ix ixale:
3 Hakaꞌ yeko teꞌ manzan xolaj teꞌ qꞌebꞌtaj,
hak tuꞌ yeko naj bꞌay kaw ayko wanmatiꞌan xol ebꞌnaj tzehtaj.
Yalanh yenhel naj winaj kaw ochebꞌil tuꞌ chinaytzꞌonhnojan.
Kaw chiꞌ sat teꞌ islobꞌehal naj chiwabꞌehan yul ishomal intiꞌan.
4 Kinyitojan naj bꞌey nha bꞌay ay qꞌinh, bꞌay ay wah;
tꞌanhxiko naj winaj winhan yu iskꞌulchꞌanil iskꞌul.
5 Aqꞌ teꞌ uva tajtzebꞌil, yebꞌ teꞌ manzan inlobꞌan yu yok wipan,
yuto kaw chinkaman yu chachwochehan.
6 Haꞌ ismekqꞌabꞌ naj chiyakto yalanh inwiꞌan,
kat kinislaqꞌnihan naj yu iswatxꞌqꞌabꞌ.
Naj ichamile:
7 Hex qꞌopo hex ay yul Jerusalén chiwaqꞌ bꞌinahojan noꞌ nixhte sajche
yebꞌ noꞌ miꞌe sajche chiꞌekꞌ xolaj qꞌebꞌtaj,
chinqꞌannihan teyet tato mach cheyilo iswayanh ix ix bꞌay kaw ayko wanmahan,
wal xin wayojabꞌ ix hantatikꞌa choche iskꞌul.
Ix ixale:
8 ¡Lanhan wabꞌenan yul isnuqꞌ naj bꞌay kaw ayko wanmahan!
Lanhan yul naj,
chꞌekꞌ tꞌujla naj yinh ej iskꞌul witz yebꞌ ej wonhan.
9 Haꞌ naj bꞌay kaw ayko wanmahan,
lahan naj hakaꞌ noꞌ sajche maka hakaꞌ noꞌ yunin sajche.
Ayxakꞌo naj yinta nha, chitꞌanhxikti naj yul wentanah.
10 Istzotel naj, yalni naj wetan hakaꞌ tiꞌ:
«Hach bꞌay kaw ayko wanmatiꞌan yebꞌ hach kaw kawla ixach tiꞌ, ahanhwanoj kat kotohi.
11 Yuto xaꞌekꞌto sunil ixahaw bꞌay chaqꞌ haꞌ nhabꞌ, matxa chaqꞌ haꞌ.
12 Lanhan isxumakli teꞌ telaj, xahul ixahaw yet chibꞌitni anma,
xajabꞌepaxo isbꞌitni noꞌ kuwis sat kotxꞌotxꞌ.
13 Lanhan issatnipaxo teꞌ higuera,
kaw saqꞌal yekꞌ isxuqꞌal sam teꞌ uva.
Hach bꞌay kaw ayko wanmatiꞌan yebꞌ hach kaw kawla ixach tiꞌ,
ahanhwanoj, kat kotohi.
14 Hach tiꞌ wetan hawehi,
lahan hach hakaꞌ noꞌ kuwis chiswatxꞌe yatut yinh ej iskꞌul chꞌen nimeta chꞌen,
kaw nahat yekanh bꞌay kaw ewan.
Ye habꞌa wetan, kat hatzoteli,
yu wabꞌenan yul hanuqꞌ, yuto kaw chiꞌ hatzoteli,
yebꞌ kaw saqꞌal kach wilnihan,» xhi naj wetan, xhi ix.
Ix ixale yebꞌ yichamil:
15 Kotzabꞌayo ej noꞌ pay, yebꞌ noꞌ nixhte yunin,
chiyetato noꞌ kotzꞌunubꞌ uva yuto lanhan isxumakli teꞌ.
Ix ixale:
16 Naj ochebꞌil wuhan, wetan ye naj, yetpaxo naj wehan;
chistanhe naj noꞌ meꞌ xol teꞌ lirio.
17 Hach kaw chachwochehan,
meltzohanh yaqꞌ isbꞌa maxhto chiꞌekꞌ jaqꞌeqꞌ yet sahabꞌ sakꞌayal,
yet maxhto chisajbꞌi.
Lahanojabꞌ habꞌelwi hakaꞌ noꞌ sajche maka hakaꞌ noꞌ tzehla sajche
toxanhe chiꞌah tꞌujla istit yinh istzalanil witz Beter.