Ix ixale elti ix saywal yinh yichamil
Ix Ixale:
3
Hayet aqꞌbꞌalil insayan naj ochebꞌil yu wanmahan sat intxꞌatan,kaw insayan naj yajaꞌ mach ilcha naj wuhan.
2 Intxumnihan hakaꞌ tiꞌ:
«Wal tinanh chinahwanojan kat wekꞌan inhoynojan konhobꞌ,
chinsaynihan naj bꞌay kaw ayko wanmahan,
chinsaynipaxojan naj yulaj calla yebꞌ yulaj txonhbꞌal,» kinchihan.
Lahwi tuꞌ wahwanojan, intohan insaynojan naj,
yajaꞌ mach ilcha naj wuhan.
3 Hayet lanhan wekꞌan insaynojan naj kinyilnihan ebꞌnaj chitanhen konhobꞌ, inqꞌambꞌenan tet ebꞌnaj:
«¿Machim maxeyil naj winaj bꞌay kaw ayko wanmahan?» kinchihan.
4 Lanhantotikꞌa welan iskꞌatanh ebꞌnaj tuꞌ, yilcha naj wuhan,
naj bꞌay kaw ayko wanmahan, wok tzabꞌnojan yinh isqꞌabꞌ naj,
matxa xin inbꞌejtzohan naj; winitojan naj bꞌey yatut inmiꞌan,
bꞌey iscuarto inmiꞌan bꞌay kinpitzkꞌahan.
Naj ichamile:
5 Hex qꞌopo hex ay yul Jerusalén chiwaqꞌ bꞌinahojan noꞌ nixhte sajche
yebꞌ noꞌ miꞌe chꞌekꞌ xolaj qꞌebꞌtaj,
chinqꞌannihan teyet tato mach cheyilo iswayanh ix ix bꞌay kaw ayko wanmahan,
wal xin wayojabꞌ ix yinh hantatikꞌa choche iskꞌul.
Yet chito naj ichamile yebꞌ yixal mohyoj
Ebꞌix qꞌopo chibꞌitni:
6 ¿Mak huneꞌ chitit bꞌey txꞌotxꞌ desierto,
hakaꞌ hun topan nhubꞌ,
ayko xol isnhubꞌal mirra yebꞌ teꞌ pom
yebꞌ xol txꞌiꞌal majan anh kaw xuqꞌ sam?a
7 Haꞌ ton bꞌay chibꞌatxlaxikꞌo yaꞌ Salomón,
hoyaniko 60 (oxkꞌalwanh) ebꞌnaj soldado yinh,
haꞌ ton ebꞌnaj soldado kaw ekꞌbꞌal yip xol ebꞌnaj Israel.
8 Sunil ebꞌnaj soldado tuꞌ iqꞌbꞌil yespada ebꞌnaj,
kaw helan ebꞌnaj yinh howal;
kꞌalbꞌiliko yespada ebꞌnaj yinh yiktaj ta ay tzet yinh aqꞌbꞌalil.
9 Haꞌ yaꞌ rey Salomón iswatxꞌe yaꞌ huneꞌ teꞌ iscarruaje,
yinh te teꞌ kaw kꞌul titna bꞌey Líbano.
10 Haꞌ yoyal, plata aykoj yinh,
haxa istel yichinh bꞌay chisqꞌebꞌa isbꞌa yaꞌ oro ayko yinh;
haxa bꞌay chiꞌay tzꞌonhno yaꞌ qꞌap qꞌap kajmutzꞌmunhe ayayo yibꞌanh,
haxa yinh qꞌap tuꞌ iswatxꞌeko ebꞌix qꞌopota Jerusalén yelawil,
yuto kaw chitzala ebꞌix yinh yaꞌ rey Salomón.
11 Hex ix qꞌopo ah Siónb elanhwetij,
kat heyilni yaꞌ rey Salomón, ayahto iscorona yaꞌ yinh iswiꞌ,
huneꞌ corona watxꞌebꞌil yu ismiꞌ,
haꞌ ton corona yet istzꞌayikal bꞌay chimohyi.
Haꞌ huneꞌ tzꞌayik tuꞌ, istzꞌayikal bꞌay chitzala yanma yaꞌ.