Naj ichamile kaw ayko yanma yinh yixal
Naj ichamile:
4
Kaw kawla ixach, hach bꞌay kaw ayko wanmahan,kaw kꞌulchꞌan kach jilni.
Haꞌ isbꞌaqꞌ hasat lahan jilni hakaꞌ noꞌ kuwis;
chiwiliktojan isbꞌaqꞌ hasat yalanh qꞌap qꞌap ayko yenhelo hasat.a
Haꞌ xil hawiꞌ lahan jilni hakaꞌ yet chiꞌayti bꞌulbꞌon noꞌ chiw yinh istzalanil txꞌotxꞌ Galaad.
2 Haxa haweh, lahan jilni hakaꞌ hunbꞌulan noꞌ meꞌ lanhanto yilaxilo xil, lanhanto yaxhnhelaxi.
Haꞌ sunil noꞌ miꞌe meꞌ tuꞌ katakꞌonh yunin noꞌ,
machi hunu noꞌ tiꞌ machi uninwi.
3 Haꞌ xaj hatiꞌ, lahan hakaꞌ txꞌal kaj txꞌal;
haꞌ yul hanuqꞌ kaw chikꞌay inkꞌulan wabꞌehan.
Haqꞌotx majan yu yenhel hasat,
lahan hakaꞌ hun chayan teꞌ granada.
4 Haꞌ hanuqꞌ lahan iskꞌulchꞌanil hakaꞌ torre watxꞌebꞌil yu yaꞌ David,
bꞌay kꞌuwan chꞌen chꞌen yet howal,
bꞌay lokan mil chꞌen escudo.
Haꞌ sunil chꞌen escudo tuꞌ yet ebꞌnaj soldado kaw helan yinh howal ye chꞌen.
5 Haxa kabꞌebꞌ hawim, lahan hakaꞌ nixhte kakꞌonh yunin noꞌ miꞌe sajche chilow xol teꞌ lirio.
6 Yaqꞌ isbꞌa maxhto chiꞌekꞌ jaqꞌeqꞌ yet sahabꞌ sakꞌayal,
yet maxhto chisajbꞌi.
Chintohan bꞌey witz bꞌay ay teꞌ mirra,
yebꞌ yinh istzalanil wonhan bꞌay chichꞌibꞌ teꞌ pom.
7 Hach kaw ochebꞌil wuhan, haꞌ sunil hanimanil kaw kꞌulchꞌankanoj,
machi nichꞌano hatzakaꞌil.
8 Tonh wintajan bꞌey txꞌotxꞌ Líbano, hach wixal,
kat hawaypaxti yinh iskꞌul Líbano wintajan,
kat hamujlaytij yibꞌanh iswiꞌ witz Amana yebꞌ witz Senir yebꞌ witz Hermón,
bꞌay ay isnhachꞌen noꞌ bꞌalam,
yebꞌ bꞌay qꞌebꞌtala bꞌay chiꞌekꞌ noꞌ tzꞌibꞌinh bꞌalam.
9 Maxawelqꞌato wanmahan, wixal,
hach kaw ochebꞌil wuhan.
Hunelnhechꞌan kaxhoktanhno winhan hawelqꞌanto wanmahan,
yebꞌ yu huneꞌnhe txꞌanhil hawuwe ayko yinh hanuqꞌ.
10 Hach wixal, hach kaw ochebꞌil wuhan,
kaw saqꞌal yet chachtzalako winhan.
Hayet chachtzalako winhan, ekꞌbꞌal iskꞌulal sata teꞌ vino.
Haꞌ isxuqꞌal sam haperfume ekꞌbꞌal kꞌul sata hunteqꞌanxa perfume kaw xuqꞌ sam.
11 Hach wixal, hakaꞌ noꞌ ajan kaw ay iskabꞌil ayko yinh hatiꞌ;
hakaꞌto yal kabꞌ yebꞌ lech ayko yalanh hawaqꞌ.
Haꞌ isxuqꞌal sam xil haqꞌap,
lahan hakaꞌ isxuqꞌal sam te teꞌ ay bꞌey txꞌotxꞌ Líbano.
12 Hach wixal, hach kaw ochebꞌil wuhan,
lahan hach hakaꞌ peyabꞌ bꞌay ay teꞌ kaj kaw pebꞌilayoj,
yebꞌ hakaꞌ hunu isnuqꞌ ha haꞌ majan,
kaw kꞌul yekaniko ismajil.
13 Lahan hach hakaꞌ hunu tzꞌunubꞌ kaw saqꞌal jilni,
bꞌay chiwolni teꞌ granada,
kaw chiꞌ koloni, yebꞌ bꞌay kaw ay isxumakil teꞌ alheña.
14 Bꞌay ay teꞌ nardo yebꞌ teꞌ azafrán yebꞌ teꞌ caña kaw xuqꞌ sam, yebꞌ teꞌ canela,
bꞌay ay teꞌ qꞌebꞌtala pom, teꞌ mirra yebꞌ teꞌ áloes,
yebꞌ sunil te teꞌ kaw xuqꞌ sam.
15 Lahan hach hakaꞌ isnuqꞌ ha haꞌ chiꞌekꞌ xolaj tzꞌunubꞌ
yebꞌ hakaꞌ haꞌ nime haꞌ chiꞌekꞌ yojomal chiꞌayti bꞌey txꞌotxꞌ Líbano.
Ix ixale:
16 Titanh jaqꞌeqꞌ Aquilón,b titanh hach jaqꞌeqꞌ Austro,
kat heyekꞌ hexunikꞌo isxuqꞌal sam intzꞌunubꞌan.
Titanh hach bꞌay kaw ayko wanmahan,
kat hawilni hapeyabꞌ bꞌay ayko hatzꞌunubꞌ,
kat halohni sat kaw chiꞌ.