Naj ichamile:
5
Lanhan woktojan xol intzꞌunubꞌan hach wixal, hach bꞌay kaw ayko wanmahan.Lanhan winilojan teꞌ mirra yebꞌ te teꞌ kaw xuqꞌ sam;
manlohan issajil noꞌ ajan, mantzꞌubꞌnihan noꞌ kabꞌ,
mawukꞌnipaxojan invinohan yebꞌ inlechan.
Hunbꞌulan anma:
Waꞌanh wuxhta wanabꞌ kaw ochebꞌil juanh,
kat heyukꞌni tzet cheyukꞌ yibꞌanh heyoch, hantatikꞌa cheyoche.
Isbꞌiskꞌulalil yet machi naj ichamile iskꞌatanh yixal
Ix ixale:
2 Lanhan inwayan, yajaꞌ wal wanmahan itzitz.
Hayet lanhan inwayan wabꞌenan yul isnuqꞌ naj bꞌay ayko wanmahan,
yalni naj:
«Hach wixal, hach kaw ochebꞌil wuhan,
hach tiꞌ lahan hach hakaꞌ noꞌ kuwis,
hach tiꞌ kaw tohol hachkanoj.
Haj pulta wetan, yuto kaw chiꞌay yal chew yibꞌanh inwiꞌan,
kaw chakꞌan xil inwiꞌan yu yal chew.
3 Mawilojan xil inqꞌapan, ¿tom xin chinokan waqꞌaꞌpaxiko xil inqꞌapan hunelxa?
Mantxꞌahan wojan,
¿tom xin chintzꞌilnhepaxtojan wojan hunelxa?» xhi naj.
4 Haꞌ naj bꞌay kaw ayko wanmatiꞌan yaqꞌlen naj ishajlen pulta.
Isbꞌilikanh wanmahan yu tzalahilal.
5 Wahwanojan inhajnojan pulta tet naj bꞌay kaw ayko wanmahan.
Xanhe chitꞌuhli yal mirra yinh inqꞌabꞌan yebꞌ yinh yiximal inqꞌabꞌan, yay yal mirra tuꞌ yibꞌanh isqꞌanh pulta.
6 Inhajnihan pulta tet naj bꞌay kaw ayko wanma tuꞌan,
yajaꞌ xatohna naj, matxa naj.
Hayet wabꞌenan yul isnuqꞌ naj tuꞌ kaw elti wanmahan wabꞌehan.
Insayan naj yajaꞌ matxa ilcha naj wuhan;
kinawihan yinh naj, yajaꞌ matxa taqꞌwi naj wetan.
7 Wilchahan yu ebꞌnaj chitanhen konhobꞌ,
kinismaqꞌnihan ebꞌnaj, inlahwihan yu ebꞌnaj,
istziknipaxilo ebꞌnaj chitanhen iskꞌubꞌal konhobꞌ wenhelan aykoj.
8 Hex ix qꞌopotaj ah Jerusalén,
taqꞌeweko teyinh,
tato ay bꞌay cheyil yinh naj bꞌay kaw ayko wanmahan,
cheyal tet naj tato kaw chinkaman yu wochenan naj.
Ix ixale choche ix yichamil
Hunbꞌulan ebꞌix qꞌopotaj:
9 Hach ix kaw kꞌulchꞌan xol ebꞌix ix,
¿tzet yinh xin kaw ekꞌbꞌal yelapno naj winaj
bꞌay kaw ayko hawanma xol yet winajil yul hasat?
¿Tzet kaw iskꞌulal chiꞌilchalo yinh naj bꞌay kaw ayko hawanma tuꞌ,
yuxin chaqꞌana ta chikotaqꞌwekojanh jalnihanh hachejbꞌanil?
Ix ixale:
10 Haꞌ naj winaj bꞌay ayko wanmahan sajla winaj naj,
hanhe naj kaw kawla winaj xol 10 (lahonhebꞌ) mil ebꞌnaj winaj.
11 Haꞌ iswiꞌ naj kaw hakaꞌ chꞌen oro, chꞌen kaw kꞌul.
Haꞌ xil iswiꞌ naj kꞌolotxtanhe, qꞌej jilni hakaꞌ jilni isqꞌejal yinh noꞌ hoh.
12 Haxa isbꞌaqꞌ sat naj lahan hakaꞌ kakꞌonh noꞌ kuwis chiꞌekꞌ istiꞌla ha haꞌ; chꞌaxhni noꞌ xol yal yim noꞌ wakax,
istiꞌ haꞌ chiꞌay pajno noꞌ.
13 Haꞌ isqꞌotx naj lahan hakaꞌ hunu tzꞌunubꞌ bꞌay ay te teꞌ kaw xuqꞌ sam,
yebꞌ hakaꞌ isxuqꞌal sam teꞌ kaj.
Haxa istiꞌ naj lahan hakaꞌ teꞌ lirio, kaw xuqꞌ sam chiꞌay tꞌultꞌun mirra yinh.
14 Haꞌ isqꞌabꞌ naj lahan hakaꞌ chꞌen jolqꞌabꞌ oro.
Aypaxiko chꞌen jacinto yelawiloj.
Haꞌ isnimanil naj kaw saj, hakaꞌ jilni chꞌen marfil,
ayko chꞌen zafiro yelawiloj.
15 Haꞌ yoj naj lahan hakaꞌ kabꞌebꞌ oy mármol,
linhanayo yibꞌanh chꞌen oro, chꞌen kaw kꞌul.
Kaw saqꞌalkano jilni naj hakaꞌ txꞌotxꞌ Líbano,
kaw saybꞌiliko naj hakaꞌ teꞌ cedro.
16 Kaw chiꞌ istiꞌ naj, sunil tzet ay yinh naj kaw ochebꞌilkanoj.
¡Hak tuꞌ jilni naj bꞌay kaw ayko wanmahan,
hex qꞌopo ah Jerusalén!