Haꞌ naj ichamile yebꞌ ix ixale kaw ayleko yanma yinh hunun
Ebꞌix qꞌopo chibꞌitni:
6
¿Bꞌaytuꞌwal mato naj winaj bꞌay kaw ayiko hawanma,hach kaw kꞌulchꞌankano xol ebꞌix ix?
¿Bꞌaytuꞌwal kaw istoko naj bꞌay kaw ayiko hawanma?
Chonhtohanh kosayaꞌanh naj tawintaj.
Ix ixale:
2 Haꞌ naj bꞌay kaw ayko wanma tuꞌan mato naj bꞌay ay istzꞌunubꞌ,
mato naj yiqꞌalo sat te teꞌ kaw xuqꞌ sam,
mato naj istanheꞌ ismeꞌ xolaj istzꞌunubꞌ,
mato naj iskutxbꞌakanh teꞌ lirio.
3 ¡Hanintiꞌan yet naj bꞌay kaw ayko wanma tuꞌan wehan,
wetpaxojan ye naj!
Chiyaqꞌ tzala iskꞌul naj xolaj teꞌ lirio.
Naj ichamile:
4 Hach kaw xahan ay wuhan, kaw kꞌulchꞌan hach,
kaw ochbꞌetanhe hawil-laxi hakaꞌ yil-lax konhobꞌ Tirsa yebꞌ konhobꞌ Jerusalén.
Yuto kaw aykano yip,
hakaꞌ hunu majan ebꞌnaj soldado chibꞌelwi yinh istxolal isto yinh howal.
5 Hekꞌilo hatꞌanhxiko winhan tinanh
yuto haꞌ isbꞌaqꞌ hasat tuꞌ kinaqꞌni aykꞌayojan yul haqꞌabꞌ.
Haꞌ xil hawiꞌ lahan jilni hakaꞌ yet chiꞌayti bꞌulbꞌon noꞌ chiw
yinhla istzalanil witz Galaad.
6 Haxa haweh lahan jilni hakaꞌ hunbꞌulan noꞌ meꞌ lanhanto yaxhnhelaxi,
katakꞌonh yeko yunin noꞌ miꞌe iskꞌatanh,
machi hunu noꞌ tiꞌ machi uninwi.
7 Hakaꞌ jilni ischayanil teꞌ granada,
hak tuꞌ jilni haqꞌotx yalanh yenhel hasat.
8 60 (oxkꞌalwanh) ebꞌix reina yixal naj rey,
yok 80 (kanhwinajwanh) ebꞌix iskabꞌ yixal naj,
haxa ebꞌix qꞌopotaj matxa chibꞌischa ebꞌix.
9 Wal ix wetan hunchꞌan ix, lahan ix hakaꞌ noꞌ kuwis,
yebꞌ xin kaw toholkano ix yul insatan.
Hanhechꞌan ix yu ismiꞌ;
machi hunuxa ix ix hakaꞌ ix yul sat ismiꞌ.
Hayet yil-lax ix yu ebꞌix qꞌopotaj,
yalni ebꞌix ta kaw saqꞌal yet ix;
haxa yet yil-lax ix yu ebꞌix reina, yebꞌ yu ebꞌix iskabꞌ yixal naj rey
yok ebꞌix yalno tzotiꞌ kꞌul yinh ix.
Ebꞌix qꞌopo chibꞌitni:
10 ¿Mak anmahil huneꞌ tiꞌ chisye isbꞌa hakaꞌ isyeni isbꞌa sajilqꞌinal yet chisajbꞌiloj?
Ix tiꞌ kaw saqꞌal jilni hakaꞌ ixahaw,
kaw saqꞌalpaxo hakaꞌ istzejla yoj tzꞌayik.
Ix kaw aykano ismay jilni hakaꞌ ismay hunmajan ebꞌnaj soldado
chibꞌelwi yinh istxolal isto yinh howal.
Ix ixale:
11 Kinaytojan bꞌay ay tzꞌunubꞌ,
bꞌay ay teꞌ nogal,
kinbꞌeyan wilaꞌan teꞌ lobꞌehal ay sat akꞌal,
yunhe wilnihan tato lanhan iswolni teꞌ uva,
yebꞌ ta lanhan isxumakli teꞌ granada.
12 Lanhantotikꞌa xin yet matxa nano wuhan,
kinyinitojan wanmahan yul carruaje ah Aminadab.
Hunbꞌulan anma:
13 Hach sulamita meltzohanh, meltzohanh,
yuto chijochehanh kach jilaꞌanh.a
Ix ixale:
¿Tzet kaw cheyil yinh ix sulamita?
Hunbꞌulan anma:
Chijochehanh jilaꞌanh iskanhalwi ix sulamita xolbꞌal campamento.